世事往往柳暗花明又一村，好似一哭成名嘅前「新聞小花」黃紫盈（Connie）離開無綫一年，工作量即十級跳，由以往齋逗2萬幾蚊月薪急增至月入過6位數，尤以密集式接司儀job賺到笑，單係今年年尾的annual dinner司儀工作就接到手軟。日前紫盈BB抽空置裝時，一口氣揀選4對秋冬新款鞋，埋單盛惠$5,000，為工作落重本，黃紫盈都面不改容。
《頭條日報》報道，回復自由身的黃紫盈，除做司儀、品牌代言人外，仲做埋電台，另又擔任公關，為香港可持續發展研究中心出任企業傳訊顧問、為聯合國東南地區綠色產業推廣，最近再做埋Roadshow《擁抱愛》同馬會節目《尚駿生活》主持等等，百足咁多爪。
問她係咪賺到笑？她避談說：「最重要係開心同有嘢學。（靚女容易搵到食？）唔關事，我相信以往嘅工作有幫助，而且我開設粉絲專頁，亦可以保持住人氣。」
黃紫盈為新城主持《晨希GoodDay》
工作堆滿身的紫盈BB日前抽空去shopping，見她獨自去尖沙咀柏麗大道的Millie's鞋店掃貨，主攻兩、三吋高跟鞋，出活動或做司儀都啱，揀完高跟鞋再睇boots，不停在鏡前擺甫士，心情靚靚的她仲唔睇價錢，試着即買，最後一口氣掃了4對鞋，埋單約5千元。
