今次頭都大！手機通訊程式WhatsApp今日新增功能，若對方已閱讀你發出訊息，信息旁的「剔」圖案，就會變成兩個藍色剔，有睇、無睇無得抵賴，發訊息者當然話方便，不過WhatsApp 「深潛一族」今次有排頭痕！
天下男性最怕嘅一句說話，相信就係另一半的一句「你仲咩睇完WhatsApp唔覆我！」以前即使有「Last seen」，都仲可以喺設定到關閉功能，但今次呢個藍剔，無論你係iOS定係Android，只要你一開啟「Chat Room」，想再潛水扮隠形就唔使旨意！
點擊看圖輯
新增的功能，只需長按訊息，然後再點選「Message info」（紅圈所示），不論係送達時間，以及對方讀取的時間，都無所遁形！
WhatsApp表示，若果未見到孖灰剔變孖藍剔，可能係對方未upgrade做最新的版本、對方出現網絡異常，又或者，真係未睇到囉。
對於一個咁智能嘅更新，有網友話係「毒男末日」，萬一向女神表白完，收到2個藍剔但女神都未有講一句說話，就真係「IP都唔駛check」，直接被判「死刑」。
不過藍剔令男性「聞剔喪膽」之外，亦都令到一眾有群組的用戶大感頭痕，因為唔少人都好鐘意「唯讀」，睇完無乜想講就由得佢。但有本網讀者表示，「藍剔」出現，令到自己唔應唔得，好似有朋友喺群組約食飯，就不斷咁check住邊個「潛水」未應機，然後「點名」叫人「上水」，令佢想抖下都唔得。
但所謂你有張良計，我有過牆梯，好快就有人發現對付藍剔的方法。
各位Android的用戶，如果想繼續做「唯讀」又唔被發現的話，就可以試下喺手機桌面上，增加一頁空白桌面。然後加入Widget小工具，選擇WhatsApp 4x2大小，如果嫌太細就可以自行調整大小。
當訊息到的時候，就可以喺呢個小工具到睇而不被發現！無論係長訊息定短訊息，都可以輕鬆睇到！
不過如果係iOS用戶的話就對唔住啦，暫時仲未見有破解方法住。
