煉成年輕心境 林日曦的「奇幻逆緣」

電影《奇幻逆緣》中的畢彼特出生時是老伯，愈長愈年輕，林日曦說某程度上代表他，只是愈大愈年輕的是心境。

有份創辦的雜誌《黑紙》和《100毛》的林日曦以年輕人為目標讀者，他糾正：「我覺得係講啱一半，唔係年青人，係心境年青的人，我出的書都有伯伯婆婆來買，可能心境年輕，唔代表唔啱佢哋睇。年輕人亦未必啱睇，如果佢哋心境非常老邁，成日都話睇得好化，就唔啱睇。」

同事平均年齡二字頭，34歲的林日曦是最老一位。「我覺得比起十年前我仲年輕咗，對世界更有感覺，更多關心，有更多看法，這是年輕的表現。」細路哥直率，情感表露無遺，大言不慚談夢想，林日曦曾經遺失年輕的感覺，漸漸又找回青春的心。

整個訪問，林日曦就是維持這一號表情，但自稱親善大使，說服力弱咗小小。

有讀者在書展買林日曦的書，之後後在Instagram留言，說他面口太黑，不夠膽上前索簽名合照。當事人無奈：「唔笑就惡過人，天生嘅，冇辦法。」

林日曦百科中，有兩種人不表達情感，一是大人，二是男人，他兩者皆是，簡稱「佬」。以為黑面神如此絕不輕易流露情感，他卻在新書高呼做人要肉麻，將情話說出口，畫公仔要畫出腸：「既然大家都唔係你肚裏面條蟲，對你最重要的事，面對最重要的人，不妨有時坦白一啲，表達下愛意同珍惜。」如此骨痺，只因曾經肉麻不起。

畢彼特在《奇幻逆緣》以奇人身驅出生，愈長大外表愈年輕，林日曦解讀成心境的比喻。(電影截圖)

林日曦自嘲反叛期延續至今，面對家人有時自愧，會無謂地收起情感：「對愈親嘅人就愈差，咁大個人唔係仲攬住阿媽講我愛你呀。」平時阿媽著他裝多碗湯，頂心杉就偏不理會，阿媽沒有刻意提醒，反而會自動飲多碗。像電視劇中關懷友愛樂也融融？當然不可能出場。

直至約五年前林媽媽驗出患癌，林日曦在病塌邊緊握她的手：「我估係我人生第一次主動捉實佢隻手，同佢講咗句好簡單嘅說話『你唔洗驚嘅，有咩事大家一齊面對囉，冇事嘅。』 」自己回想起都打冷震，肉麻到痺。

後來阿媽康復，阿仔態度打回原形，再過幾年，阿媽參加社區中心活動上台分享，提起阿仔當時的難得窩心：「我都冇咗件事，之後又維持我非常冷感嘅態度，但原來一件我心目中覺得好小嘅事，佢記住喺心，覺得係醫病動力，阿仔支持原來好緊要。你以為好小事，你衝破嗰吓，就嗰一吓，呢一世人肉麻嗰一次，原來對親人都好有意義。」

一家人照常食飯飲茶，照常只談生活不談感情，但關係好像改善了一點點：「好似有層隔膜打破咗。」

同事平均年齡二十多，林日曦居然是最老一位。

長大成人開始收收埋埋，情感以外不再說出口的還有夢想：「只要你心境年輕嘅話，點解唔可以講夢想唧，你三十幾歲啫，四十歲啫，仲有一半人生，咁多時間點解唔可以講夢想？」而矛盾在於林日曦也有個很少說出口的夢。

林日曦是筆名，2007年發表第一首填詞作品時與林夕一起擇字起名，也從林字輩：「佢有教我填歌詞，但我覺得自己唔叻，好介意話自己係林夕徒弟，好似影衰佢咁。」

2007年發表第一首填詞作品〈（東京鐵塔下）gulugulu〉，由903 DJ有耳非文主唱，歌曲入選當年叱吒十大。(MV截圖)

林日曦21歲於IVE設計系中途輟學，無學返無工做的一年間愛上填詞：「填詞係一種好講毅力的工作，你要好唔放過自己，死諗爛諗先完成到歌詞。咁艱辛地完成到好開心，完成得好更有滿足感。」

入行七年間填過不少電視劇主題曲，累積發表近百首歌詞，到今年產量驟跌至兩首：「你寫一隻歌詞，交出去時永遠覺得最正，masterpiece一樣，但往往你傾注腦汁、日月精華擺晒落去之後，以為掂喇包紅喇呢次，監制就話俾你聽，唔得，要改呢度呢度呢度。」

改過後的作品不合自己意思，覺得總是二流貨色，亦自覺性格不適合在詞圈發展，愈來愈無心機：「如果你依家問我想唔想成為填詞人，好坦白講，我都想，我都鍾意填詞，因為填詞帶俾我好多滿足感，但我不太敢講，因為好難。」

那麼出版也是夢想？「絕對係。我是把自己想法或性格都放進我的生意上，正如我出版雜誌、寫書，同樣比較關心社會。要搞出版社也傾向找社會性的書。」

2009年起與友人涉獵出版，膽粗粗夾錢出雜誌諷刺時政；去年開出版社，出版的書亦與社會緊扣，部分甚具爭議性，例如同志組織的《大愛同誌》，香港電視不獲發牌後出版《TVB血淚屎》、《王維基百科》：「十年前的我未必有這樣的心，或這樣的視野。有時人大了看世界多了，說不定可以幫你心境更年青。」

「更年輕的其中一個定義是更認識這世界，但又更相信自己，缺一不可。如果你對世界妥協，而不相信自己一些可能較幼稚或天真的想法，那是另一種老邁。」學會與人說感情，大談夢想，定義上已經是個「佬」的林日曦，返老還童，像畢彼特。