周柏豪正面看待網民批評

華納一哥「大文豪」周柏豪去年風生水起，首度在紅館開Show，又橫掃各大頒獎禮，更首登「叱咤」男金之位。無奈「逢紅必反」幾乎已成網絡定律，柏豪早前擔任楊千嬅演唱會嘉賓時，被人狂插級數跟一眾前輩歌手爭九條街。被封「奀星」的柏豪阿Q上身：「我有做健身一啲都唔奀，大大隻仲有肚腩。」。

 

周柏豪,連詩雅

「華納一哥」周柏豪率領同門連詩雅（Shiga）、Dear Jane及新成員陳詠謙及孖妹AOA齊打邊爐開年，柏豪勁好胃口，眉飛色舞猛讚食物好味道。

對被指「奀星」，柏豪坦言未有打擊其自信心：「行得出嚟就要接受所有人批評，唔可以輸打贏要，係要去承受，其實我覺得自己喺去年嘅成績真係唔差，身價仲比以前貴咗好多，計落都有升價十倍，但我抵同值。不過，最開心反而係機會方面，近年真係多咗好多機會，尤其喺一啲夢寐以求嘅品牌例如殿堂級牛仔褲品牌同我合作。另一方面，唱片公司全力support我，唱片製作費愈嚟愈多，可以搵更多人玩樂器，唔會好似以前咁得四個人幫我拉小提琴咁單調。」

因為千嬅演唱會嘉賓有Sammi又有郭富城，柏豪迅即被封「嘉賓奀星」 （資料圖片）

對於公司投放大量資源去凸顯他的一哥地位，柏豪就謙虛否定：「冇分係咪一哥嘅，我只係喺華納比較耐，盡力做好本份同時幫到新加入嘅師妹、師弟們，當日係人幫我，而家好應該幫番人。呢行俾人吹捧好易迷失，有過以前衰過嘅經歷，時刻提醒自己唔可以驕傲，要知道自己定位，珍惜眼前一切！」

同場的Shiga眼見公司歌手陣容愈來愈強大，笑言一班同事一齊食飯，真有一家人熱熱鬧鬧的感覺。問她會否爭寵時，她大笑：「唔怕，良性競爭係需要嘅，反而好開心榮升師姐，喺公司咁多年覺得自己成熟咗唔少，好想分享經歷畀師弟妹聽。」新一年，連詩雅好想多唱國語歌，最想當然想學師兄周柏豪一樣開到演唱會。