關心妍幫囡囡搞4歲生日會 壽星妹首次食糖好滿足

生日快樂呀！

着到靚靚嘅心心一出房門就見到好多汽球同人。

關心妍(Jade)個囡囡楊榮心（Jovia）尋日四歲生日，因為Jovia好鍾意麵包超人，為氹囡囡開心，做阿媽嘅當然諗盡計仔，首先搵公司吹咗好多個麵包超人角色嘅吹氣公仔，然後再約埋長輩及親友齊為心心開生日會。

媽媽拖住囡囡出場。

佈置好晒就召喚壽星女出場，戴住粉紅閃閃皇冠及着住桃紅紗紗裙嘅心心一見到個廳放晒麵包超人已經笑晒，媽媽問佢開唔開心?佢怕怕醜醜咁答開心，然後媽媽錫啖佢再講Happy Birthday，之後心心行去禮物堆，仲興奮過佢嘅關心妍捉住囡囡問佢點解咁冷靜?然後再問佢鍾唔鍾意，囡囡答鐘意，好似一般阿媽咁，關心妍再追問又幾鐘意?其實點答啫，但佢個女好叻笑笑口答好鍾意，阿媽終於滿意個答案。

第一次食糖嘅心心一臉滿足。

心心再係禮物堆揀咗份大禮物出嚟。

生日Party嘅賓客。

心心三歲生日會都係以麵包超人做主題。

全日生日會嘅最精彩環節就係壽星女食糖，有幾精彩呀?冇錯，精彩嘅地方係心心活咗4年，第一次食糖，見佢拎住支紅色棒棒糖好肉緊咁咬，阿媽即教佢要慢慢含，再問佢係咪第一次食糖，心心即點頭，然後背後所有麵包超人公仔及生日禮物都唔及口中嘅糖，最後環節當然就係唱生日歌同切蛋糕，翻查資料，心心三歲嘅生日會都係以麵包超人做主題，下年五歲生日會，關心妍要再諗吓計嘞。

關心妍日前在廣州完成《約》22周年演唱會，全場爆滿之餘，囡囡更自薦做嘉賓！

呢次演唱會原訂Jade出道20周年時舉行，但受疫情影響延至22周年舉行，但無阻歌迷熱情，來自內地粉絲紛紛撲飛：「呢次廣州係第一站，嚟緊仲有幾站會舉行，因為延遲咗兩年，所以都加啲新衫、新歌單比佢哋補數！今次香港Fans都組團二百人嚟支持，我叫佢哋乘機去吓啲大熱超市潮聖，其中一個Fans更加喺日本趕翻嚟睇騷。」

關心妍（Jade）日前在廣州舉行《約》22周年演唱會。

囡囡心心自薦做嘉賓！

因為關心妍久未舉行巡唱，現場一票難求，有哈爾濱樂迷南下捧場，到步後才發現全場爆滿：「我都唔知點算好，真係一張飛都冇晒，冇理由我地自己買黃牛㗎嘛！但見佢咁遠嚟到都要諗吓方法，最終我比咗囡囡張飛佢，我同心心講佢係嘉賓，要喺後台準備，唔洗門票嘅！啲Fans見到佢都好開心，話佢高咗好多，唔知下次開騷佢仲肯唔肯上台唱。」

全場爆滿！

Jade以新歌衫登場。

母女再度舞台合體成焦點，Jade亦帶新歌衫登場：「因為我剛剛簽咗新唱片公司(中國SONY)，希望比大家有新嘅感覺，加上心心都入咗小學，開始有翻啲時間做嘢，所以都趁佢返學日子錄新歌，不過我同公司講好咗，要跟學校校曆表去安排工作。」

Jade透露簽約新唱片公司(中國SONY)，希望給歌迷有新的感覺。