運輸署推出咗智能咪錶一段時間，但唔少駕駛者仲未好熟識。Kelly近日實測過，「入錶易」App用家可預先睇到有無空位，到現場透過App連接咪錶後，之後遙距入錶延長泊車時間，真心方便。
「入錶易」App相當實用，用家喺駛到泊車位前，手動更新泊車位狀態，預先睇到有無空位。到達泊車位後，記得使用「入錶易」App掃描咪錶熒幕上嘅二維碼，連接手機。
依家，所有咪錶以十五或三十分鐘作單位計算，如上一手剩餘嘅泊車時間喺完整單位嘅倍數，就可以即場補購至最長泊車時間。唔想現場呆等的話，可以先離開再遙距入錶，謹記要確認App或相關咪錶上嘅泊車時間已更新。
如果你所購買嘅泊車時間未能即時更新喺咪錶上，先耐心等候一陣，因新咪錶或因接收訊號問題等因素，未能即時更新。若一直未能更新泊車時間，就可立即致電咪錶營辦商嘅24小時服務熱線（電話號碼：2332 3700）問清楚啦。
