吳業坤自爆發生家庭血案晒爪痕照報告傷勢：我隻貓開我年

2023年01月20日21:46 最後更新: 21日11:39

坤哥傷口滲晒血！

吳業坤（坤哥）兩年多前領養長毛家貓Rabu，更為愛貓開設Instagram帳戶分享Rabu萌爆日常，後來還養多一隻布偶貓仔Raki，吸引不少粉絲派Like。不過，1月19日坤哥於社交網貼出臂上爪痕照並透露：「我隻貓開我年。」還笑問網民自己會否變貓貓，好友吳若希隨即搞笑幫他改名做「貓Man」，有網民則取笑去年5月升呢人夫的坤哥：「你呢排顧住老婆（濱口愛子）忽略咗佢呀！」

直至1月20日，坤哥再於社交網貼圖報告傷勢，其中一張近鏡驚見兩道爪痕滿是鮮血，估計是「案發」不久後拍下，真係隔住個Mon都覺得痛。另一張則是坤哥與愛貓的「牀照」，原來「真兇」正是Rabu，而相中的Rabu卻沒半點悔意，而且一臉霸氣！經過一晚後，坤哥的傷口亦已結痂，他坦言沒有嬲Rabu，反而擔心Rabu留下陰影，坤哥留言：「幾過份都好，唔洗（使）道歉我都原諒佢仲錫番佢，怕佢有陰影唔再痴（黐）我。如果對人都可以好似對貓一樣咁寬容，世界就會和平，所以大家見到唔鐘意既（嘅）人當佢係貓，摸下佢下巴就好了。」豁達樂觀的他又笑稱「坤媽」指Rabu替他擋了一劫，有網民就留言笑說︰「慳咗洗牙錢。」

- 閱讀更多 -