麥美恩「失聲」自創手語勁爆笑 黃子恆化身財神險中暑：套衫好似棉胎咁！

麥美恩透露劇中手語全是她自己設計！

由吳冠宇監製、冼翠貞編審的一連八集賀歲劇《福滿臨珠寶呈獻：黃金萬両》，於年卅（1月21日）至初七（1月28日）晚上8點半翡翠台播出。1月25日晚一集，萬家三房人初三接受的挑戰是不能犯赤口禁忌，三位夫人龍九（麥美恩Mayanne飾）、小玉（朱智賢飾）及金枝（江嘉敏飾）有備而戰，各出奇招阻止老公犯禁，笑料百出。之後萬家去到寺廟拜神，龍九為求老公萬帥（曹永廉飾）可以順利贏得金大碗，求來一道勁爆的開運符，惟副作用是陽痿一年，正當萬年準備飲下符水之際，龍九於心不忍出手阻止，更自食其果誤服符水搞到失聲。後來龍九發現寫符的青竹居士（煒烈飾）是一名神棍，更得悉青竹居士打算向小玉、金枝下手騙財劫色，龍九雖然與兩人時有齟齬，但念在大家一場妯娌，龍九不顧一切衝去救人，更突然開番聲鬧走青竹居士。雖然龍九犯了赤口禁忌理應輸掉比賽，但小玉、金枝見龍九奮不顧身救她們，兩人遂假意吵架犯禁讓龍九勝出，和氣收場。

龍九求咗道超勁嘅開運符畀老公，但係後遺症係陽痿一年。

最後龍九誤飲符水，自食其果搞到失聲。

是集最大亮點是Mayanne的搞笑演出，劇中突然失聲的她要靠做手語溝通，誇張的肢體動作加上搞笑表情，非常過癮。Mayanne受訪時透露劇中手語全是她自己設計：「其實都唔難演，因為擺明係玩嘢架喇，嗰時大家合作咗個幾月，已經好了解大家嘅性格同小動作，我自己諗咗一堆動作，去到現場再做畀佢哋三兄弟睇，睇吓佢哋畀咩反應，將最好笑嘅演晒出嚟，佢哋最鍾意我扮江嘉敏同朱智賢啲動靜！」講到與曹永廉合作默契十足，Mayanne笑言：「今次係第二次合作，上次《痞子殿下》佢係我情敵，今次就有感情線，夫妻嘅感覺好靠佢去Lead，佢做啲小男人真係好似，啲笠水怕老婆樣好好笑。」

龍九要靠做手語溝通，表情同動作勁爆笑。

點知啲手語得千紅睇得明。

龍九為咗救小玉同金枝，居然開番聲鬧走青竹居士。

1月25日晚初四一集繼續跟足傳統「迎財神」，萬家三兄弟萬帥、萬年（黃子恆飾）及萬世（馬貫東飾）齊齊化身財神派利是。子恆受訪時透露拍攝扮財神場口非常辛苦：「嗰套財神衫好有質感，好似棉胎咁，加上嗰段時間我開緊另一套劇，前一晚收咗廠就直接拍呢度，拍嘅時候又喺正中午12點，加上有少少動作戲，真係近乎去到中暑嘅邊緣。因為我比較少接觸喜劇，所以都盡力去做盡力去玩，覺得樂趣多過辛苦。」問到有甚麼消暑良方？子恆笑言：「就係一把風扇唔夠就兩把，兩把唔夠就三把，再頂唔順就要黐退熱貼！」

1月26日晚一集，萬家三兄弟化身財神派利是。

歷代「獎老」Reunion ！

清談節目《MORAZ天然草本驅蚊靈呈獻：Mayanne小喇叭》由麥美恩（Mayanne）擔任主持，曾展望（GM）擔任助理主持，本周四及五晚10點半翡翠台播映最後兩集。

Super~~

由於蘭茜講嘢相對正經，即刻激發咗嘉樂嘅「口賤」神經。

「大師兄」原來係暗藏特別任務架。

林曉峰初初做第一輯時直認好驚獎門人。

林曉峰笑言首度與獎門人會面時，排場似足電影《無間道》韓琛食飯經典場口。

今晚（18日）一集，兼任《獎門人》現任獎老的Mayanne，邀得四位獎老界前輩林曉峰、錢嘉樂、蘭茜及阮兆祥（按加入年期順序）擔任嘉賓，大談參與《獎門人》拍攝的喜與樂。四人之中，雖然嘉樂被專稱「大師兄」，但原來第一代獎老竟是林曉峰（阿Lo）及陳小春，阿Lo大爆當年嘉樂之所以被「獎門人」曾志偉睇中接小春棒，全因「把口夠賤」；嘉樂憶述當年接到獎門人邀約電話時相當意外，並笑言全靠獎門人自己的口賤才能才得以跳出武師界。談到獎門人當年為何睇中阿Lo，原因竟和張國榮和一條鞋帶有關，阿Lo說：「嗰時拍《金枝玉葉》，有一場戲講張國榮先生上樓梯，我做助手跟住後面，當時佢唔知左腳定右腳甩咗鞋帶。拍完嗰場後我哋放Break，返到嚟個甩嘅鞋帶就調轉咗喺另一隻腳。當時導演嗌完Roll機後，我就嗌『咪住，好似唔連戲喎』，大家咪即刻睇番錄影帶：『係喎』。嗰日原來獎門人都喺現場，佢心諗原來呢條𡃁仔都幾上心，就搵佢嚟做嘢啦。」至於蘭茜擔任獎老的原因，則與玩獎門人遊戲時全情投入「刨西瓜」及「刨粟米」有關。祥仔則暢談當年如何與志偉、洪天明及鄧兆尊夾計，以各人的腳毛及腋窩毛整蠱遲入組的姚樂怡，最後遭樂怡喊打喊殺，十分搞笑。

估唔到一條鞋帶咁細微嘅嘢，都會畀阿Lo留意到，再畀志偉發現到阿Lo細心嘅一面，足證志偉係幾咁積極同樂意提攜後輩。

錢嘉樂透露未做《獎門人》之前，自己其實算是寡言的人。

蘭茜回想當年玩遊戲時係幾咁投入。

嘉樂大嘆遊戲節目幕後唔易做。

麥美恩都好記得當年姚樂怡係點樣被整蠱，仲大嘆「童年被污染」。

阿Lo仲搞笑大談自己如何成為「公司殺手」。

阿Lo同「大師兄」齊齊回味當年一起創作的「嘉賓名字歌」，仲扮番當年獎門人點把關。

阿Lo重演當年點樣馬拉松式開會開到靈魂出竅。

嘉樂講嘢時係咁向上望，當時阿Lo已懷疑獎門人會唔會已經喺現場。

四人還大談當年錄影《獎門人》的「宵夜度橋日常」，當年因為電視台大戰，《獎門人》最高峯一星期連播五晚，阿Lo大方分享了當年的度橋及上班流程日常：「下午三點返嚟開會，一路開到八點五十分。當年我哋就諗咗改歌詞唱啲嘉賓名出嚟，咁每日揸車就要度18隻歌，每個嘉賓要有3隻，返到去獎門人就會坐喺度問邊隻好笑。然後度度度度到食飯，其實係食唔落架喎。有時做到一點鐘左右收廠，但未完架，喺化妝間再開會，開到三點度，跟住就宵夜架喇，然後再搵地方。記得有一次打風，我哋搵到地方時已天光，成六點幾七點。」

阿Lo嘉樂鬥扮獎門人。

阿Lo嘉樂鬥扮獎門人。

獎門人踩場！

全集最驚喜部分，是當眾人輪流模仿獎門人時，頑皮的志偉即手持小喇叭走入廠送驚喜，令當時除掉雙鞋跪地扮緊志偉的嘉樂大嗌驚驚。志偉一到埗即扮作氣沖沖搞笑謂：「幾多人打電話畀我呀，問：『你仲唔落去？佢哋踩到你一文不值呀！』」之後眾人瘋狂互窒，混亂間曾展望竟大叫志偉「Daddy」，隨即惹起哄動，志偉反應極快接招謂：「出得街架咩？你話畀大家聽媽咪係邊個？！」並親解為何被專稱「阿爸」，志偉說：「阿爸負責畀錢（埋單）架嘛，咁咪叫阿爸咯。」蘭茜聞言即指志偉另一外號是「埋單俠」。另志偉又會親解《獎門人》換主題曲之謎，答案更相當有愛，並與小朋友有莫大關係，欲知詳情？密切留意節目。

獎門人嚟咗氣氛即時升溫。

曾展望叫Daddy，嚇到志偉即刻望錶，現場陷入一片喧鬧。