張敬軒「中西區居民代表」 訪校暢談粵語流行曲七十年

日前，張敬軒獲聖保羅書院中文科邀請，聯同香港大學香港研究課程教授及總監朱耀偉教授，為中西區十二間中學的聯校講座「似水流年——漫談香港流行曲七十年」擔任講師，透過對談及互動，讓年青一代了解廣東歌歷史、演變、廣東歌市場所面對的問題及發展等。

張敬軒獲聖保羅書院中文科邀請擔任講師

聯同香港大學香港研究課程教授及總監朱耀偉教授

首次擔任講師，軒仔坦言做足功課，「雖然自己身處呢個行業二十年，對呢個行業都有一定程度嘅了解，但係講座形式分享同落手落腳做係兩回事，所以今次為咗呢個講座，自己都再去深入研讀咗一啲資料，過程當中又再令到自己有深一層嘅認識，所以今次除咗同大家分享，自己都有好多得着。」

首次擔任講師，軒仔坦言做足功課

講座當日，甫上台軒仔便謂十分開心能夠跟大家見面，特別見到中西區十二間中學同學在場，特別有親切感，他笑言自己作為中西區居民代表，回家途中經常經過聖保羅書院門外，覺得學校很漂亮，講座當天踏入校門的感覺很神奇，「我成日喺度諗，會唔會有機會可以真真正正作為喺呢個行業超過二十年嘅人，喺我呢個階段令到年青人多啲機會去認識我哋香港嘅流行音樂呢？所以好多謝各位嘅邀請，多謝邀請我嘅老師，我都好開心喺度同大家分享、多謝professor俾我呢個機會。」

甫上台軒仔便謂十分開心能夠跟大家見面

軒仔表示相信每一個十年當中，社會形態、人們的生活，其實都會通過歌詞去記錄當下。而作為二千年代的歌手，０二年到香港發展時，那個時代算是「台灣幫」的年代，「周杰倫、王力宏、張惠妹等等，粵語歌相對比起九十年代係式微，包括我自己『登陸』香港嘅第一隻碟都係國語唱片。」他又大讚的rapper、hip hop artist，「特別過去呢十年入面，我見到喺新一代歌手入面不斷將廣東話以各種形態，包括揉合一啲好美式嘅R&B、hip hop嘅style，係一啲好好嘅嘗試。」

軒仔表示相信每一個十年當中，社會形態、人們的生活，其實都會通過歌詞去記錄當下

講座尾聲，軒仔唱出《櫻花樹下》，台下學生頓時起哄，猶如進入演唱會mode，唱完後，全場不停大叫encore，一眾學生又大呼想聽《遇見神》，軒仔為了不讓學生們失望，在沒有預備的情況下，即席唱出《遇見神》，講座最後於一片歡呼聲下圓滿結束。

講座最後於一片歡呼聲下圓滿結束

張敬軒出席AI的營銷會議，分享AI對娛樂行業、音樂、藝術等創意工業的影響。

張敬軒昨日（9月26日）獲邀出席由IAB Hong Kong主辦全港最大型的AI的營銷會議「 IABHK C23」（C23），活動吸引了來自多個國家及地區、超過五百位業界管理高層親身參加，以及五百名人士在線上參與，探討人工智能對數碼營銷領域的變革性影響。

大合照

去年獲跨社交平台總結成為最Top KOL的軒仔，於會談中分享AI對娛樂行業、音樂、藝術等創意工業的影響。他坦言這十年中最大的恆常收入並非來自音樂，而是透過social media層面。而過去一年於youtube見到很多「AI尹光」、「AI張敬軒」等不同的AI藝人，都是一些好的嘗試，但同時自己亦存在矛盾，甚至偏向有點擔憂，「作為網民、消費者、用家嘅角度，AI嘅存在一定令到我哋嘅生活各方面嘅層面好方便；另一方面作為從業者、版權持有人，我哋見到嘅係一啲令我哋不安嘅未來。譬如當呢啲AI生成嘅sound bite喺internet viral嘅時候，copyright問題點去解決呢？唔同範疇嘅版權，呢啲可能會顯伸一啲再大啲嘅議題。」

軒仔分享AI對娛樂行業、音樂、藝術等創意工業的影響。

對於現在的AI時代，軒仔自言仍處於觀察者的角度，抱着學習心態。雖然擔憂，但他不得不承認AI對於修復舊母帶有一定的程度的貢獻，「譬如我接手Avon呢間錄音室時，有471餅母帶由於年代久遠而冇辦法修復。其中一餅係Beyond喺麥花臣球場一個從來未公開過嘅錄音。磁帶有啲溶化，就算通過焗爐，夾硬拉番開兩個磁帶，佢個磁粉都係食咗喺上一層，但有咗AI之後，由於佢有數據推算嘅模式，可以推算番家駒把聲，做到一個數碼修補。呢個修補方法令到我哋可以聽到一啲我哋從來未聽到過嘅錄音，或者一啲已經受損咗嘅錄音，對於我哋備份嚟講絕對有好處。不過始終文物嘅本身、嗰個錄音帶嘅本身佢所存在嘅歷史價值，亦都係佢稀有嘅原因。所以呢個係兩個層面嘅考量，但我覺得喺修復嘅過程入面係絕對有可能做得到。」

軒仔坦言對AI偏向有點擔憂，但不得不承認AI對於修復舊母帶有一定的程度的貢獻。

隨後，軒仔與主辦準備了一小段由「AI張敬軒」演繹的《Amazing Grace》於座談會上播放，軒仔表示自己聽完後都十分驚訝，「呢個係咪我嚟㗎？呢個sound bite生成嘅方式，就係用copilot嘅形式，通過某一個骨架，再結合張敬軒對樂句、對咬字嘅處理而生成嘅一段AI嘅sound bite。」播放完後，台下觀眾報以掌聲，軒仔笑說代「AI張敬軒」多謝大家的掌聲。他謂雖然AI張敬軒聲線酷似自己，但他的震音並非如此，更即席獻唱《Amazing Grace》的第一句，台下觀眾頓時起哄呼歡及拍掌，「所以喺音樂範疇，如果純粹以網友角度，大家如果好鍾意聽到尹光唱林家謙、林家謙唱尹光、張敬軒唱邊個邊個，係滿足網友一種情感投射，僅此而已。」

軒仔即場演繹的《Amazing Grace》。

軒仔又自爆跟Tyson Yoshi嘗試叫ChatGPT填詞，但效果並不理想，「邏輯上面係有問題，喺個story telling嘅邏輯上面係有bugs嘅，呢啲將來可能解決到都未定，但而家暫時呢一個以創作人嘅角度，我哋自己業內未係太擔心。廣東話係九音，係一個相當之複雜嘅語言體系，第二樣係廣東話中文入面都有一啲詞彙運用，首先如果真係有AI去做呢啲嘢，佢要識得分析，啊，呢隻歌想口語化啲，譬如有首歌「你唔愛我啦」，呢啲口語啲嘅，或者係「你不愛我了」，首先AI個data base要識得分辨呢啲先。」

軒仔不擔心AI會取代創作人，因為他與Tyson Yoshi嘗試叫ChatGPT填詞，但效果並不理想。

最後，問到對AI的發展潛力，軒仔認為人類所發明所有的科技，應該是要延續人類的文明，而並非摧毀，「所以我哋喺運用AI或科技嘅時候﹐我覺得我哋盡量keep番自己作為一個人類正常閱讀時間，每日一杯咖啡睇一本書，或者一本書裏面嘅一段，增長自己知識，培養自己要think out of the box，跳出框框，之後先會有更好嘅AI，咁我哋嘅文明先至唔會被我哋自己所發明嘅嘢摧毀，呢個係我自己嘅諗法。」