家燕姐與梁醒波乖孫齊玩問答 《咁你都唔識》鄧梓峰玩被爆私下係燈神

由鄭詩君（C君）、「自稱J2一姐」的黃紫恩（Jojo）、「女版金剛」謝嘉怡（Lisa）擔任主持的全新遊戲問答資訊節目《咁你都唔識》，逢周四、五晚上10點半翡翠台播映。「Common sense（CS）一啲都唔common」，聽落「淺到喊」的「常識題」，原來可以十個人有九個答錯。《咁你都唔識》雲集一堆抵死又貼地的刁鑽問題，透過有趣的答問環節，測試參與遊戲嘉賓「CS（Common Sense）指數」。

三組藝人+素人嘉賓包括江嘉敏與閨密化妝師楠楠

家燕姐及梁醒波乖孫Andrew，Andrew仲要係本集MVP

鄧梓峰（十郎）與好友Ophelia，十郎用呢個招牌動作出場，正呀！

三位主持（左起）：謝嘉怡、C君、黃紫恩

今晚（28日）一集《咁你都唔識》邀得的三組藝人+素人嘉賓包括江嘉敏與閨密化妝師楠楠、家燕姐及梁醒波醒目乖孫Andrew，及鄧梓峰（十郎）與好友Ophelia。當中以大晒香肩、名副其實並肩作戰的「江楠」組合最吸睛，而家燕姐組則憑能勾起港人集體回憶的「家燕癦」成功搶「頭」威。向來予人感覺專業又莊重的十郎，被C君踢爆私下是「相當靠唔住」的燈神，C君連環爆大鑊謂：「領過佢好多次嘢，有時錯嗰啲佢都肯定。我人生第一部電影，就係同十郎一齊拍，佢日日都話：『肯定今晚唔會開到咁夜喇』。」至於江嘉敏則因自爆收過情信遭集體「鄙視」：「情信呢家嘢，我相信大家都有收過啦。」豈料全場聞言不但鴉雀無聲，三位主持更急忙劃清界線。

睇吓家燕姐扮水滾聲幾咁全情投入！

十郎扮警車聲嘅像真度，令到家燕姐都佩服到目瞪口呆。

江嘉敏明顯係玩古怪表情搭救。

被爆係「燈神」嘅十郎，成集遊戲都好似遊魂咁，大家睇吓佢幾咁低分就知啦，到底佢最後有冇機會反敗為勝呢？

C君笑Jojo似孫耀威 家燕姐反眼扮水滾聲勁可愛

未知是否受C君「出口術」影響，十郎答題表現果然麻麻，不過「聲演題」卻搶盡光環，事緣C君叫家燕姐扮「水滾聲」，可愛的家燕姐竟全程投入至反眼，相當可愛；至於加入戰團聲演警車聲的十郎，則因聲音幾能「以假亂真」贏盡全場掌聲，家燕姐更佩服至目瞪口呆。除了十郎，家燕姐亦十分玩得，不斷拿自己額頭的「家燕癦」及「十字步」開玩笑，結果遭佻皮的C君乘虛而入爆金句：「佢就係跳得太多（十字步），佢不停跳十字步跳到叫十字車呀！」C君還將「搗蛋魔爪」伸延至兩位女拍檔，先是捉著江嘉敏拍檔化妝師猛問Jojo「似唔似孫威耀」，再取笑謝嘉怡搞笑語法：「佢冇話你冇分，佢話你有零分」，十分抵死。

家燕姐好搞笑咁解釋咗，點解「家燕癦」會成為集體回憶。

C君嘅「十字車」金句，氹得家燕姐勁開心。

江嘉敏忽然自爆有收過情信，即刻畀全村人劃清界線，好搞笑。

一共五集的《大航假期呈獻：玩轉桂林懶人包》，今晚10點半翡翠台播出最後一集，由薛家燕、何廣沛、林正峰擔任主持。

品嚐桂林Style螺螄粉。

家燕姐形容林正峰似螺螄粉，形容得貼唔貼切？

桂林行程精彩之餘，主持們之間的搞笑互動亦是節目焦點，尤以昨晚（18日）一集互動最有記憶點。三人品嚐當地著名美食螺螄粉期間，家燕姐突然表示螺螄粉似足林正峰：「鍾意佢就覺得佢幾Nice，唔鍾意佢就覺得佢...」，然後何廣沛竟加把嘴：「寒酸...總之係孤寒啦！」，林正峰亦七情上面扮介意：「我覺得比喻得幾好，只係我個心硬係覺得有啲唔舒服」，十分搞笑。另外何廣沛和林正峰亦體驗「竹筏遊」，近距離觀賞灕江兩岸景色。期間二人興奮地在竹筏上擺出各種甫士，林正峰更即興向岸上女子請求幫忙打卡拍照，被何廣沛笑指：「原來林正峰係咁樣溝女嘅！」

何廣沛+林正峰孖寶兄弟搭竹筏欣賞灕江兩岸景色

做甫士吸引岸上女士注意，呢個就係林正峰識女仔嘅秘技？

何廣沛+林正峰「成親」儀式笑料滿載
何廣沛和林正峰這對孖寶兄弟除了互寸外，二人亦相當賣力哄「皇太后」家燕姐開心。前晚（17日）一集，三人到訪有「天下第一長髮村」之稱的黃洛瑤寨，這對孖寶兄弟更親身上台和當地的紅瑤婦女舉行「成親」儀式，過程中二人和紅瑤婦女載歌載舞，更接連被摸屁股，逗得台下的家燕姐大笑兼拍爛手掌。

孖寶兄弟在尋找美食方面亦是相當落力。主持們上天下海，體驗在隱世雲端Cafe浸住腳歎咖啡欣賞美景外，亦品嚐路邊攤檔滋味竹筒飯，而林正峰落力尋找美食的舉動亦獲家燕姐垂青：「峰峰，你每次發現都係食啊食啊食啊...不過好啱我！」而二人亦乘機「嗲」家燕姐親自餵食竹筒飯，林正峰更賣口乖：「覺得家燕姐餵畀我嘅飯特別甜！」而轉數快的家燕姐笑言：「因為有我啲口水！」互動相當搞笑。

何廣沛+林正峰親身上陣，同當地嘅紅瑤婦女嚟一場「成親」儀式！

禮成！

家燕姐睇到好開心！

林正峰自我感覺「非常油膩」？
除了路邊滋味，三人亦享用各式各樣盛宴，包括昨晚一集，以金桔為主題的「金桔宴」。當何廣沛將充滿霧氣的「金桔餅桂花煲藕」形容成「仙氣」時，林正峰即時賣口乖：「好似家燕姐，仙氣飄飄啊！」哄得家燕姐笑逐顏開；除「金桔宴」，前晚的桂式「農家宴」亦令人胃口大開，當何廣沛即場將「待客肉」塞進口感似豬油撈飯的「鼎鍋飯」時，林正峰竟口快快形容自己「油膩」：「你嗰啲咁就叫邪惡？邊有得（同我）鬥呀？我油膩過你好多！」然後馬上意識自己用錯形容詞，但仍被何廣沛無情揶揄：「你係真係油膩過我哋好多嘅！」

三人在隱世雲端Cafe，體驗浸住腳歎咖啡欣賞美景。

家燕姐親自餵孖寶兄弟食竹筒飯

就算品嚐金桔宴，孖寶兄弟依然唔會錯過任何機會哄家燕姐開心。

仲有地道農家宴。

林正峰竟然話自己油膩！

家燕姐乘船觀賞灕江景色，家燕姐更憶起當年拍攝電影時的回憶。

至於今晚（19日）播出的最後一集，三人將體驗觀賞灕江兩岸美景的「興坪遊船」。家燕姐望見灕江，更想起其年輕時曾和修哥（胡楓）、吳君麗拍攝電影《灕江河畔血海仇》（1963年）的點滴，雖然時隔62年，但家燕姐對當年的拍攝細節印象深刻，十分厲害！想知道家燕姐會分享當年什麼精彩的拍攝點滴，而製作組又為三人預備了什麼行程，萬勿錯過今晚播出最後一集的《玩轉桂林懶人包》。