廖碧兒釀酒18年再攻咖啡界 咖啡控愛犬叫Latte、Cappuccino

廖碧兒（Bernice）接受薛家燕、范振鋒及思敏主持的《開心大派對》節目錄音訪問，Bernice由參加選美勇奪國際華裔小姐冠軍，到參演電視劇，繼而投身紅酒界成為酒商。最近更鑽研咖啡，推出自家品牌罐裝咖啡，家燕姐在節目中不停大讚Bernice叻女。

廖碧兒（Bernice）接受新城《開心大派對》訪問。

廖碧兒與家燕姐合照。

Bernice表示由出世，爸爸都一直在做飲食，她形容自己一出世就與食物結下不解之緣。而她本身喜歡讀化學，於是專心考酒試，之後自己釀紅酒、白酒，並成為評酒師，她說：「不經不覺，自己釀酒已經18年喇，在法國波爾多有個少少酒莊。」講到評酒，她試過一日試飲二百五十款紅酒及白酒，她坦言一定要「吐」酒：「否則，每款酒，飲一滴，都頂不順。更規定每星期跑步三次、行山一次，及做瑜伽保持健康。」

廖碧兒送咖啡給家燕姐。

廖碧兒送上自家品牌咖啡給主持薛家燕、范振鋒及思敏。

除了紅酒，她亦愛研究咖啡及飲食，她對咖啡的熱愛，以前飼養的七隻愛犬都是以咖啡及酒命名Bailey、Latte、Cappuccino、Kahlua、Misto、Caramel及Macchiato。她說：「咖啡、酒同茶都好相似，我會研究飲食對身體健康的影響，某些食物對身體會有甚麼反應？點解食某些食物會肥？」

而她最近推出四款即飲咖啡，不但親自研究咖啡豆，從原材料到產品一手包辦。主持再談到疫情期間，Bernice創立網上平台，協助本地餐廳與海外交流，成功為多間餐廳創造七位數收入，為飲食界付出不少貢獻，她說：「疫情時，好多餐廳開唔到，好慘，儲存費最貴。」而最近她再復出拍電影，接拍了一部由香港、澳洲及美國合拍片，鬼妹仔的她，笑言以前拍劇講得廣東話太多，如今拍新片要全英對白，竟然：「而家好似唔識講英文咁，好搞笑！」

廖碧兒釀酒18年再攻咖啡界。

詳細節目內容，請留意11月8日，下午2-3時，新城知訊台《開心大派對》節目，網址：https://www.metroradio.com.hk/MetroInfo/

歌手尹光到新城廣播接受李有毅與李國煒主持的《Ben同Benson「Chur」到行》訪問，分享由黃偉文（Wyman）為他度身訂造的新歌《你阿爸的無常宇宙》。現年81歲的尹光，在新歌中從出生唱到往生，說的是放下執著，接受上天的安排。然而在拍攝MV時，導演張子丰不讓尹光「死去」。

尹光接受新城《Ben同Benson「Chur」到行》訪問。

尹光談及新歌《你阿爸的無常宇宙》時難掩興奮，他表示歌曲由Wyman操刀：「自從《Dear Myself》之後，佢覺得佢想寫一首歌畀尹光唱。我聽到佢想寫畀我，嘩！開心到。我求都未必求到佢寫畀我，難得佢肯寫畀我，我開心到不得了。」

尹光介紹歌曲內容時滔滔不絕：「呢首歌係講一個人由出世到往生，以前人生幾十年，依家人生可以過百年，我都識幾個九十幾歲，現代人壽命長咗。佢講嘅往生同出生，叫人唔好太執著，每件事上天都安排好。你想健康就運動；你想開心就唔好諗太多，咁你個人就冇問題喇！」

左起：李有毅、尹光、李國煒

新歌MV由張子丰（Fred）執導，拍攝過程甚為有趣，他分享MV中的特別安排：「原本首歌係講我往生，講我死，但Fred話唔好畀尹光死住，我哋仲有排玩。」尹光續說：「MV入面我死咗經過奈何橋，佢話我冇手帶唔走得住。我問佢點解我唔走得？佢話『你未係時候，依家你鍾意去邊就去邊，鍾意做乜就做乜，玩夠再返嚟』。」

談及與兒子的關係，尹光提到自己歌曲《老豆》正正是講述父子關係，他坦承：「年輕時同個仔冇咁密切，長大之後就比較密切。」他解釋：「因為佢細個嘅時候要搵食，個個年輕時都會去拼搏去賺錢，賺錢時就好少顧個仔，多數請工人或者太太照顧，到依家想接觸個仔，佢又識諗嘢，覺得老豆以前冇照顧我咁好，依家想補救，同個仔都OK。」

新城CEO馬浚偉歡迎尹光到訪。

81歲尹光推出新歌《你阿爸的無常宇宙》。

尹光特別感謝影帝張家輝為《老豆》拍攝MV：「我喺呢到借個機會多謝張家輝，佢拍《老豆》個MV真係拍得好好。雖然三兩分鐘，佢個表情真係絕頂，頭髮雖然梳咗兩個鐘，但拍咗兩三秒，轉咗個頭，但嗰吓好有感覺，所以真係影帝。」尹光又透露與兒子的日常溝通：「我個仔冇咁多嘢講，佢同我老婆就講好多嘢，由我老婆講畀我聽。」

另外，尹光將於5月19日舉行《爆笑勁歌晒冷演唱會2026》，他笑言：「曬冷就唔敢講話曬冷，曬冷唱多啲歌畀大家聽，即係有啲歌冇唱過都曬畀你聽。」同時介紹兩位演出嘉賓：「第一個是蝦頭（楊詩敏），佢會同我唱一首好搞笑嘅歌，另一係鄭雅琪，佢喺粵曲界好出名，佢同我會唱幾首廣東小曲。」

唱盡出生到往生。

詳細節目內容，請留意4月25日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/