楊千嬅中環行街被集郵態度親民成身紫色好SHARP醒

日前楊千嬅於中環行街，被粉絲野氐捕獲要求合照。千嬅也十分客氣應承，事後該名粉絲在小红書分享巧遇楊千嬅的經歷！

該名粉絲指當時她在CHANEL巧遇千嬅準備進去購物，好自然想影張相。千嬅很大方答應，但似乎不想引起太多騷動，合照時跟粉絲說：「低調點！」相中千嬅以招牌標誌性紫色頭髮示人，穿上白色長袖襯衫配搭牛仔褲，休閒得來帶點型格。

楊千嬅宣布將於2024年2月14-15日假澳門銀河綜藝館與行《MY TREE OF LIVE世界巡迴演唱會》。

楊千嬅今年啟動《MY TREE OF LIVE世界巡迴演唱會》，星馬、內地場場爆滿，轉眼間已經唱到第17場，剛剛又完成了多倫多、康州、拉斯維加斯、馬里蘭州四個地方的演出，今日（12月7日）又宣布將於2024年2月14-15日假澳門銀河綜藝館繼續開騷，勢如破竹，成績極佳。

今次的美加之行，千嬅更帶媽咪一起出發，工作之餘，盡孝道帶媽咪去食好嘢、又同丁生重遊當年於拉斯維加斯先斬後奏註冊結婚的小教堂，讓媽咪感受一下兩人當年的《勇》。千嬅指2019年去過美國演出之後，就已經4年未去過，拉斯維加斯也改變了不少，很多新科技、新的騷很精彩，此行非常開心很多朋友都是為了看她演出，開幾個鐘車來，觀眾的反應熱烈，令她感到很是溫暖，「每一場演出都似大形KTV咁，首首歌都大合唱，真係好勁呀班觀眾，好多謝佢地咁支持。」

工作之餘，千嬅亦有帶媽咪一齊去玩，看魔術表演、去了新地標Sphere睇騷，「我媽咪勁呀，佢時差都搞得掂，仲精靈過我。去到當年我同丁生註冊個小教堂，因為當年註冊媽咪無係現場，我咪講番當時情況，同啲小故事比佢聽，佢都聽得好開心。」回想當年同丁生去旅行期間，突然註冊結婚，那一刻的《勇》，千嬅謂真的改變了自己整個人生，「依家諗返，由一個人變兩個人，再變三個人，人生其實很多事個天都安排好，跟住命運帶俾你的流水向前行，你就神奇地行左個人生出來㗎啦，哈哈。第日放假，我諗住再帶囝囝來，再同佢講當年Daddy，媽咪故事。」

此外，千嬅謂丁生在今次美加之行就像個「管家」，管住她的飲食，但她也食了這一年最多的澱粉質，「芝士、漢堡，Pizza，意粉，幾乎日日食，丁生最叻係每到一個地方，就問家晒朋友，有咩最好食一定要食，帶晒大家去，去到就係咁叫好嘢，但係就剩係管我一個，次次都話你唔好食咁多...比佢激死。我梗係唔理佢啦，不過今次食多左，咁返來就要還，開始又節制多啲囉，因為之後過年係澳門開騷，過年你知咁多好嘢食，依家減定，留多些quota過年個陣用，哈哈。同埋都要保養下把聲，唱左十七場，明年巡迴繼續，要保持一個好體能。」

是次澳門，千嬅選在2024年2月14-15日開騷，年初五開第一場，「我未試過農曆年做騷，仲係情人節，都幾開心，以往過年多數係一家人去旅行，今次就終於係香港過年，再帶埋家人過澳門睇騷兼一齊玩囉。情人節開騷覺得好好，人大個左就唔係剩係諗情人得兩個人，呢啲日子，愈多朋友愈好愈開心，又可以見下fans，我都好期待。」