大學聯校歌唱比賽任評判 張敬軒乘機自肥為自家演藝學校揀卒

張敬軒日前受邀為「IAE大學聯校歌唱比賽」擔任評判及表演嘉賓，順便為自家演藝學校揀卒，更直言：「歡迎大家隨時DM我」。

張敬軒早前於《REVISIT張敬軒演唱會》上宣布將會開辦演藝學校，今年內將會正式公開招生。日前，軒仔受邀為由樹仁大學主辦的「IAE大學聯校歌唱比賽」擔任評判及表演嘉賓，順便為演藝學校揀卒，軒仔直言：「歡迎大家隨時DM我」，發掘有潛質年青新一代。

軒仔早前受邀為「IAE大學聯校歌唱比賽」擔任評判及表演嘉賓，順便為演藝學校揀卒。

由於主辦方事前保密功夫做到足，當歌唱比賽開始時，司儀介紹軒仔出場，觀眾的歡呼聲接近炸爆禮堂，同學們紛紛大叫：「張敬軒你好靚仔呀」、「我愛你呀張敬軒」、「張敬軒除衫！」而軒仔還未表演，同學又已經嗌定encore及encore歌曲，「張敬軒《下次愛你》」、「張敬軒encore」、「張敬軒《雪花抄》」，甚至sidetrack 都識，氣氛高漲！

現場氣氛高漲！

比賽前，軒仔不忘為各參賽同學打氣，又笑說：「聽講今日好似有人唱我啲歌𠻹喎，邊個咁沙膽！」隨後表示自己今次到來也是學習，「每次睇啲大學比賽我都覺得：『嘩！好勁呀佢哋！』有啲已經好似可以即刻出唱片咁樣，所以今日都希望嚟呢度睇吓有冇啲有潛質嘅新人，大家要加油啦！」

軒仔專心欣常參賽者演唱。

當二十多位參賽者演唱過後，司儀便請軒仔上台分享表演心得，軒仔表示最重要是投入，enjoy台上的演出時間，他提到當日獨唱組冠軍演唱陳奕迅的《浮誇》時，絕對是全程投入，觀眾亦很自然地被他牽動情緒，「我覺得社會上嘅工種都帶唔到嗰種腎上腺素興奮嘅感覺，所以我覺得做表演嘅人係好開心，應該好好地咁enjoy個舞台。」

亦在台下為參賽者加油打氣。

問到站在台上，如何令自己冇咁驚，軒仔坦言「驚係正常」，就算現在做直播演出，事前綵排得很好，一樣會緊張，「呢啲叫做『Stage Fright』，係完全正常，就算無論幾大嘅super star，佢哋都會有呢樣嘢。只不過係佢哋嘅經驗同training有冇辦法令到佢哋喺首歌嘅前奏，或者喺佢嘅第二句就已經可以冷靜到自己。」他透露自己的抒緩方法就是與觀眾建交流，「譬如上台同大家打吓招呼呀、或者真係當你好想得到佢哋回應嘅時候，就可以派吓心心，哈哈。當你同觀眾建立咗一個關係嘅時候，其實你會對佢哋有信任，咁你就唔會怕佢哋。」

軒仔頒獎給得獎者。

與一眾得獎者合照。

隨後，軒仔便唱出《餘震》及《裝睡的情人》兩首歌曲，演唱過後觀眾不斷狂呼encore，而原來只預備演唱兩首歌的軒仔最後亦滿足觀眾需求，再次出台唱出《櫻花樹下》，期間有同學表示希望與軒仔合唱，軒仔亦一一答應，難得跟軒仔同台唱歌，兩位同學都十分興奮。

與參賽者大合照。

Encore前，軒仔謂在後台見到一眾參賽者時，覺得很開心，因為一班喜歡唱的人能夠相聚是一件很開心的事，「其實冇職業歌手同業餘歌手之分，當我哋沉浸喺音樂入面嘅時候，大家都係鍾意音樂嘅人。我每次喺學校入面表演，我都覺得好開心，因為嗰種距離好近，可能有啲朋友唔係成日聽我嘅作品，所以我好珍惜每次可以唱歌俾大家聽嘅機會。」歌唱比賽結束後，過三百歌迷及同學仍未離去，紛紛於校門外守候軒仔，馬路邊的人龍長達百餘米，認真誇張。

比賽結束後，過三百歌迷及同學於校門外守候軒仔。

張敬軒出席AI的營銷會議，分享AI對娛樂行業、音樂、藝術等創意工業的影響。

張敬軒昨日（9月26日）獲邀出席由IAB Hong Kong主辦全港最大型的AI的營銷會議「 IABHK C23」（C23），活動吸引了來自多個國家及地區、超過五百位業界管理高層親身參加，以及五百名人士在線上參與，探討人工智能對數碼營銷領域的變革性影響。

大合照

去年獲跨社交平台總結成為最Top KOL的軒仔，於會談中分享AI對娛樂行業、音樂、藝術等創意工業的影響。他坦言這十年中最大的恆常收入並非來自音樂，而是透過social media層面。而過去一年於youtube見到很多「AI尹光」、「AI張敬軒」等不同的AI藝人，都是一些好的嘗試，但同時自己亦存在矛盾，甚至偏向有點擔憂，「作為網民、消費者、用家嘅角度，AI嘅存在一定令到我哋嘅生活各方面嘅層面好方便；另一方面作為從業者、版權持有人，我哋見到嘅係一啲令我哋不安嘅未來。譬如當呢啲AI生成嘅sound bite喺internet viral嘅時候，copyright問題點去解決呢？唔同範疇嘅版權，呢啲可能會顯伸一啲再大啲嘅議題。」

軒仔分享AI對娛樂行業、音樂、藝術等創意工業的影響。

對於現在的AI時代，軒仔自言仍處於觀察者的角度，抱着學習心態。雖然擔憂，但他不得不承認AI對於修復舊母帶有一定的程度的貢獻，「譬如我接手Avon呢間錄音室時，有471餅母帶由於年代久遠而冇辦法修復。其中一餅係Beyond喺麥花臣球場一個從來未公開過嘅錄音。磁帶有啲溶化，就算通過焗爐，夾硬拉番開兩個磁帶，佢個磁粉都係食咗喺上一層，但有咗AI之後，由於佢有數據推算嘅模式，可以推算番家駒把聲，做到一個數碼修補。呢個修補方法令到我哋可以聽到一啲我哋從來未聽到過嘅錄音，或者一啲已經受損咗嘅錄音，對於我哋備份嚟講絕對有好處。不過始終文物嘅本身、嗰個錄音帶嘅本身佢所存在嘅歷史價值，亦都係佢稀有嘅原因。所以呢個係兩個層面嘅考量，但我覺得喺修復嘅過程入面係絕對有可能做得到。」

軒仔坦言對AI偏向有點擔憂，但不得不承認AI對於修復舊母帶有一定的程度的貢獻。

隨後，軒仔與主辦準備了一小段由「AI張敬軒」演繹的《Amazing Grace》於座談會上播放，軒仔表示自己聽完後都十分驚訝，「呢個係咪我嚟㗎？呢個sound bite生成嘅方式，就係用copilot嘅形式，通過某一個骨架，再結合張敬軒對樂句、對咬字嘅處理而生成嘅一段AI嘅sound bite。」播放完後，台下觀眾報以掌聲，軒仔笑說代「AI張敬軒」多謝大家的掌聲。他謂雖然AI張敬軒聲線酷似自己，但他的震音並非如此，更即席獻唱《Amazing Grace》的第一句，台下觀眾頓時起哄呼歡及拍掌，「所以喺音樂範疇，如果純粹以網友角度，大家如果好鍾意聽到尹光唱林家謙、林家謙唱尹光、張敬軒唱邊個邊個，係滿足網友一種情感投射，僅此而已。」

軒仔即場演繹的《Amazing Grace》。

軒仔又自爆跟Tyson Yoshi嘗試叫ChatGPT填詞，但效果並不理想，「邏輯上面係有問題，喺個story telling嘅邏輯上面係有bugs嘅，呢啲將來可能解決到都未定，但而家暫時呢一個以創作人嘅角度，我哋自己業內未係太擔心。廣東話係九音，係一個相當之複雜嘅語言體系，第二樣係廣東話中文入面都有一啲詞彙運用，首先如果真係有AI去做呢啲嘢，佢要識得分析，啊，呢隻歌想口語化啲，譬如有首歌「你唔愛我啦」，呢啲口語啲嘅，或者係「你不愛我了」，首先AI個data base要識得分辨呢啲先。」

軒仔不擔心AI會取代創作人，因為他與Tyson Yoshi嘗試叫ChatGPT填詞，但效果並不理想。

最後，問到對AI的發展潛力，軒仔認為人類所發明所有的科技，應該是要延續人類的文明，而並非摧毀，「所以我哋喺運用AI或科技嘅時候﹐我覺得我哋盡量keep番自己作為一個人類正常閱讀時間，每日一杯咖啡睇一本書，或者一本書裏面嘅一段，增長自己知識，培養自己要think out of the box，跳出框框，之後先會有更好嘅AI，咁我哋嘅文明先至唔會被我哋自己所發明嘅嘢摧毀，呢個係我自己嘅諗法。」