陳蕾3月紅館演唱會海報面世全新造型頭頂「念」字發出紅光

娛圈事

陳蕾3月紅館演唱會海報面世全新造型頭頂「念」字發出紅光

2023年12月06日 22:00 最後更新：23:38

陳蕾2024年3月假紅館舉行其首個個人演唱會，對於海報白髮造型表示自己個人是非常非常之咁喜歡，創作過程也有參與構思！

陳蕾將於明年2024年3月假紅館舉行其首個個人演唱會，今日演唱會海報率先面世，歌迷都嘩嘩聲，因為海報之中是一個全新造型的陳蕾，一頭長長白髮，頭頂「念」字發出紅光，粉絲紛紛大讚非常有型。是次這個白髮造型，陳蕾表示自己個人是非常非常之咁喜歡，創作過程也有參與構思，「我當時同同事講，《沙門》演唱會之後，由《世界與你無關》之後的歌，全部都係黑暗中有道光的感覺，個海報背景可以好黑暗，我個人個妝就好白，我就係個道光嘅感覺。最終就有咗依家見到嘅白髮陳蕾啦，人生第一次紅館演唱會，都希望 poster 上有耳目一新嘅感覺，會質疑呢個係咪我嚟㗎就最好㖭。我想將自己塑造成一個純白狀態，話俾大家知，無論個世界幾黑暗都好啦，我願意成為你嗰道光！」

Poster出來之後，陳蕾謂第一眼見到設計師把「念」字放在一個紅色像瞳孔的物體上，更暗自開心偷笑，「我係諗，唔通佢都係fans？因為我諗個演唱會名「念」都係同動漫全職獵人《HUNTER×HUNTER》有關，《HUNTER×HUNTER》入面有個角色古勒比加，佢一憤怒眼睛就會變為紅色，設計師又用咗個紅色圓形圖案圈住個「念」字，所以我超鍾意。好多謝團隊做咗個咁好嘅設計效果比我。」

第一次做紅館，反應勢如破竹，問到她開始有壓力未？陳蕾笑謂因為內部認購反應好，所以壓力反而少左，通常壓力都係開騷前一個月先會來到，所以即日開始會做好自己身形管理，聲音管理，體能管理等等，免得有臨急抱佛腳的緊張，成個人Ready好就會減少心理壓力，可以做得更好，「演唱會我希望可以視覺上，音效上都帶俾大家一個沉浸式體驗，唔會有悶場，絕大部份先用音樂去交流，之後Encore環節先用打機來同大家再交流，哈哈....但係公司未知呢件事，哈哈哈.....。」

保誠保險呈獻陳蕾演唱會 2024 《念》

日期：2024年3月3至5日

時間：晚上8時15分

地點：紅磡香港體育館

票價：$880/ $680/ $480

主辦單位：Warner Music Hong Kong

Citibank 優先訂票

(Cityline購票通)

優先訂票日期及時間：2023年12月18日10:00 開始至2023年12月20日23:59, 售完即止

Tags:

陳蕾

往下看更多文章

陳蕾八年後重臨澳門辦首個個人音樂會腳踏7吋高踭鞋唱跳

2024年07月17日 23:00 最後更新：23:04

陳蕾承諾將辦更大型演唱會，以歌曲回饋歌迷沿路支持！

陳蕾剛在歐洲放假回港即火速重投工作，日前於澳門上葡京綜合渡假村，為澳娛綜合主辦的《澳娛綜合陳蕾凡星音樂會》演出。與澳門歌迷一別八年，陳蕾專程為澳門fans精心挑選歌單，唱了一些香港演唱會從未唱過的歌曲，台下觀眾反應熱烈，完場時觀眾更不停大嗌encore，陳蕾說：「多謝你哋嘅熱情，快啲同主辦反映，希望好快可以係個更大嘅場地，開個規模更大嘅演唱會。」

澳門大大小小演出，陳蕾有不少經驗，但談到個人音樂會，今次《澳娛綜合陳蕾凡星音樂會》可說是陳蕾首個在澳門的個人騷，而為答謝澳門粉絲不離不棄沿路支持，陳蕾挑選了不少cover兩曲，說：「對上一次澳門個人演出，大約係八年前，當時喺一間cafe，所以今晚嘅音樂會，特別挑選一啲冇係香港演唱會唱嘅歌曲，好似《魔幻季節》、《This Love》、《反方向的鐘》、《前前後後左左右右》及《面具》等，呢啲歌真係好耐冇唱，因為香港演唱會會有主題，歌曲選擇上要有關連，今晚歌單真係為今次澳門特定。」唔少得當然還有日文歌《惡魔之子》，陳蕾直言之前為演唱會練得辛苦，所以決定重新編曲的鋼琴版送給澳門歌迷。

音樂會觀眾反應熱情，一時大叫陳蕾好靚女，一時又會在台下歡呼大叫，陳蕾在首唱剛推出的新歌《五瓣玫瑰》時，腳踏七吋粗高踭鞋的她，在看到台下fans的燈海、熱情，最終也按耐不住，履行「歌迷跳我跳」承諾，在台上配合音樂，唱跳了新歌《五瓣玫瑰》及《伸縮自如的愛》，最後在唱今次音樂會主題同名《凡星》時，台下歌迷更是不捨大叫encore，最後陳蕾承諾大家會爭取盡快再到澳門開騷，辦一個更大型的演唱會報答澳門歌迷。