袁富華表示第一次見到主人同狗狗一齊睇戲都感動到眼濕濕！
溫暖小品電影《得寵先生》徇眾要求，上周末分別在黃竹坑和將軍澳的戲院，加開兩場「人寵場」，門票火速售罄。男主角鄭丹瑞（旦哥）、飾演燒臘店「石師傅」的袁富華（Ben哥）、飾演朗朗惡媽咪的黃美芬、飾演佳叔外籍女婿陳俊利和導演兼編劇李志偉現身謝票。旦哥宣布好消息，電影上映踏入第三周票房突破300萬港元，本周增至33間戲院，每日約60場次上映，是很大的認同和鼓舞，他們表示很開心和感謝支持。
點擊看圖輯
陳俊利、導演兼編劇李志偉、鄭丹瑞、袁富華及黃美芬現身謝票。
Ben哥第一次見到主人同狗狗一齊睇戲都感動到眼濕濕。
Ben哥因為有其他工作，所以今次是第一次參與謝票，但他一直都有留意着《得寵先生》的消息。
陳俊利、導演兼編劇李志偉、鄭丹瑞、袁富華及黃美芬現身謝票。
電影完場後團隊謝票，觀眾報以掌聲，亦有狗吠聲回應，部份觀眾情緒未平伏還在哭泣。Ben哥眼濕濕好感動，「見到你哋我好感動，第一次見到主人同狗狗一齊睇戲，我自己都好鍾意狗。」他又扮狗狗說話時嗚嚕嗚嚕聲，表示多謝狗狗捧場。有觀眾讚旦哥演出脫胎換骨，「我細細個就睇你做戲，今次好唔同，完全相信你就係呢個孤獨老人。」亦有觀眾表示自己都是被寵物拯救心靈，很有共鳴。不少觀眾大讚狗演員Little演「燒腩」好精彩，被牠的眼神打動。
Ben哥第一次見到主人同狗狗一齊睇戲都感動到眼濕濕。
Ben哥說：「我從來未去過『人寵場』，今日第一次。剛才入到戲院，見到啲狗狗，我幾乎標眼淚。我之前有其他工作無嚟，其實一直都好想跟《得寵先生》謝票，咁好嘅電影應該要回饋畀觀眾。」得知票房有好成績和增加上映場次，他表示開心，「雖然我喺出面做緊其他工作，但一直掛住，有留意套戲嘅消息，事關我經理人（黃美芬）都有份拍呢部戲仲成日去謝票。我哋呢行有句話：『每部電影都有條命』，睇住（票房）一路上一路上，我個心好感動。因為有好演員、導演、故事，一定會係好命！」
Ben哥因為有其他工作，所以今次是第一次參與謝票，但他一直都有留意着《得寵先生》的消息。
旦哥非常認同，「呢個亦係我毛管戙嘅原因。當我哋好努力去拍一部戲，好努力令更多人睇，到底有幾多人睇？要靠觀眾入場和傳口碑，我哋每次謝票都收到觀眾好好嘅回嚮。」Ben哥說：「好多影評稱讚，亦有好多人網上分享一啲連我哋都唔發現到嘅觀點。」他又透露其「石師傅」角色有隱藏寓意，他說：「雖然我得一場戲，對白亦唔多，兩位導演都無話我知，但我認為『石師傅』其實係另一個『佳叔』，佢都係因為被『燒腩』改變，否則會變成一個神憎鬼厭嘅孤獨老人。」他堅持不劇透，希望由觀眾親身感受。
Ben哥又大爆「石師傅」角色有隱藏寓意。
與觀眾和狗狗們大合照。
入行50年，縱橫歌影視播、幕前幕後公認瓣瓣掂的鄭丹瑞(阿旦)今年踏入人生70之齡，快將成為外公的阿旦永不言休，更揚言活到老學到老。他今年公開拜27歲音樂鬼才陳恩碩為師，並於10月正式於港島西區新劇場推出二人合力監製的全港第二齣長壽音樂劇《小男人周記》。阿旦接受雷霆881商業一台《星光背後》專訪，憶述《小男人周記》由80年代經典廣播劇變身千萬票房電影的傳奇經過。節目中，曾三入三出商台的阿旦，自揭入行50年人生最大遺憾，他說：「人生最大遺憾係《6 PAIR半》呢張碟無我！」
鄭丹瑞入行50年，縱橫歌影視播、幕前幕後。
阿旦1978年由商台轉戰麗的電視，83年再獲邀加盟港台後，憑《小男人周記》廣播劇創出於港台的首個事業高峰，故事除了衍生一系列暢銷小說外，更於89年起被拍成三齣電影及兩齣電視劇。當年首齣《小男人》電影票房賣過千六萬，阿旦於節目披露最初本來是邵氏斟拍，演主角梁寬，亦另有其人，「最初係邵氏先，導演黃泰來話想拍《小男人周記》，到我搞好劇本畀邵氏，就諗搵人演梁寬。第一個係搵許冠傑，佢話好鍾意故仔，但就話：『我八嚿腹肌，一啲都唔小男人！』之後我搵阿倫，阿倫話好想演，但話要忙巡唱，要兩年後；我再搵最神似嘅阿Lam，阿Lam聽完故仔話：『你信我啦阿旦！係你自己做至得！』咁你即係推我啫，我無票房保證，方逸華點會肯？我都試過搵學友，學友又係忙到癲，咁成件事就停咗。」阿旦指《小男人》能拍成電影，一定要感謝當年執掌嘉禾的蔡瀾，「擺低咗件事成年，就係蔡瀾先生有一日同我食飯，話睇咗我本書，話一定要拍戲，仲話：『你做！我話得就得！』」
阿旦憶述《小男人周記》由80年代經典廣播劇變身千萬票房電影的傳奇經過。
當年首齣《小男人》雲集一眾如鄭裕玲、鍾楚紅、胡慧中、李美鳳等當紅女神參演，阿旦說：「老婆阿Ann，我哋從來諗住Do Do嚟寫，蔡生叫我搵佢，但《小男人》擺明係襯你鄭丹瑞，最初都估佢唔肯，我就嘗試喺TVB一齊做司儀嘅時候問佢，佢就話：『有錢咪得囉！哈！』鍾楚紅當時咁紅，都係好多合作過朋友一齊遊說，畀埋劇本佢睇，先至成就咁多女神襯托我呢個無名小子。」
今年阿旦70歲快將成為外公，回望入行50年創出事業多個高峰，原來亦有不少挫敗及遺憾。節目中，他坦言人生最大遺憾是來自三入三出的商業電台，他亦把經過記錄於剛推出的新書《我失敗希望你成功》中，他說：「我人生第一份工就係商台，我本來係第一代元祖『6 PAIR半』，當時就嚟浸會畢業，做緊中午節目《阿旦日記》，我做得好差，但我以為自己做得好好，到畢業麗的搵我過去同林奕華一齊做年青人節目，我就同俞琤(YT)傾想兩邊都做，點知YT話：『你連自己節目都未做好，我唔同意。』當年我年少氣盛，咪拍枱唔做商台囉，做電視喎，覺得自己叻咗喎。」
由鄭丹瑞授權，爆炸戲棚藝術總監陳恩碩包辦作曲、填詞、編劇、導演，並由二人共同監製的音樂劇《小男人周記》，於10月正式於港島西區新劇場推出。
雖然阿旦過檔麗的有份創作《天蠶變》、《天龍訣》、《IQ成熟時》等經典，但他坦承俞琤一答應他請辭已即時後悔，但最後悔還是看到商台於1980推出了一張經典唱片《6 PAIR半》，「麗的我做得好開心，但我人生最大遺憾同挫敗就係，突然之間一張《6 PAIR半》唱片橫空出世，入面點解無我？呢個係我到今日，人生嘅最大遺憾。所以到我88年返商台做二台台長，我第一時間做《叱咤新一代》嘅碟，裡面就有首《留給最愛的說話》，同埋之前喺港台，我亦第一時間做咗首《無可奉告》。呢一批歌，都係我想做返《6 PAIR半》，我要有我份呀！到今日，我仲係耿耿於懷。」三入三出商台的阿旦，最感謝人生伯樂俞琤對他的鞭撻，原來新書《我失敗希望你成功》，俞琤亦義務為他做校對，更為他親筆撰寫書中最後一章。
今日(11月29日)，下午二時至三時於雷霆881商業一台播放的《星光背後》，主持人 梁泰來邀得鄭丹瑞任嘉賓。
