謝霆鋒演唱會2025｜老闆楊受成包廂 邀逾200政商界好友名人藝人支持

事隔25年再開騷的謝霆鋒，昨天迎來首場在啟德體育園的個人演唱會《Evolution Nic Live 謝霆鋒進化演唱會》。英皇集團主席楊受成博士安排包廂越嶺廳，拉大隊率英皇娛樂集團超過30名藝人以及政商界好友名人共200多人，一同觀賞英皇大師兄演唱會。包廂更特意為在場賓客安排由霆鋒主理的食物品牌《鋒味》精心準備的美食體驗，全場食到讚不絕口！

英皇集團老闆楊受成博士及副主席楊政龍 Alex率領旗下超過 30 位藝人到場支持大師兄霆鋒。

現場官蓋雲集，星光熠熠，包括不少來自政商界的名人及朋友：羅淑佩、蔡志明、馬時亨、張松橋、張宇人、石禮謙、劉業強及李子良等，更特別邀得勞力士（Rolex）大中華區行政總裁Mr Maxim Lamarre攜夫人出席；同時亦邀得其他藝人到場。英皇大家庭一共有30多位藝人到場支持大師兄，包括張敬軒、何佩瑜、女團VIVA、衛詩雅、歐陽震華及任達華等。當中祖兒、阿Sa、Kenny及Gin近乎企足全晚唱個不停，不斷叫喊。

蔡志明,馬時亨,李子良—旭日國際主席蔡志明（左一）、富衛集團主席馬時亨與百老匯董事長李子良（右四），一同支持霆鋒演唱會。

文化體育及旅遊局局長羅淑佩（中）親身到場支持霆鋒，並大讚舞台效果華麗震撼。

勞力士(ROLEX)大中華區行政總裁 Mr. Maxim Lamarre 及夫人（左三及左二），與楊受成伉儷（右一及右二）及英皇鐘錶珠寶主席楊諾思（左一）一同合影。

行政會議成員張宇人(左一)及前立法會議員石禮謙(右二)攜夫人觀賞霆鋒演唱會，並與楊受成伉儷（左三及四）合照。

英皇集團老闆與旭日國際主席蔡志明（左一）在啟體主場館舞台前合照。

老闆率英皇娛樂集團行政總裁張雅麗（左一）及英皇娛樂集團營運總裁霍汶希與藝人一同撐場霆鋒。

英皇娛樂集團上下一同支持謝霆鋒演唱會。

老闆楊受成全程笑個不停，拉住大熱影后衛詩雅滿場飛，並希望Michelle能沾沾霆鋒旺氣，於星期日金像獎頒獎禮上勇奪影后，並且為英皇電影《破.地獄》帶來傑出成績。張敬軒亦有捧場霆鋒，表示知道舞台是由英國團隊重金打造，效果十分觸目。自己都不禁思考如何可以提升現場感染力，與現場超過四萬多位觀眾互動。老闆更特別囑咐Hins：「下個到你呀！」

祖兒笑言：「我同霆鋒係同期出道，係同班同學，今日見到佢成為亞洲第一人率先於香港啟德體育園這個世界級場地開個人演唱會，真係既感動又驕傲！」祖兒表示，霆鋒隻隻歌自己都識，聽返簡直係童年回憶，完全係將自己的成長歷程show晒出來，都好期待自己快啲可以登上啟德大舞台。

Mani 與Joey及Sa跟俞琤相見甚歡。

阿Sa整晚與Kenny及Gin企足全場，手舞足蹈。阿Sa大讚霆鋒靚仔又有型，自己同Kenny及Gin全場不斷尖叫大嗌，搞到完場後把聲都沙晒。阿Sa話：「睇返霆鋒以前啲MV，我諗佢都做唔返以前咁樣，真係回憶殺呀！」

曾打造謝霆鋒、容祖兒等無數經典，兼一手捧紅Twins成當紅女團的音樂人伍樂城，今年再戰本地樂壇，從其音樂學校選出六位年齡介乎13至16歲的女生，組成全新女團Honey Punch，先後派上兩首作品《蝶式》及《滑到入心》瞄準今年樂壇新人獎。入行30年的伍樂城接受雷霆881商業一台《星光背後》專訪，憶述由學習古典音樂走進流行樂壇變身金牌監製的辛酸外，亦披露當年與初入行的阿Sa、阿嬌合作點滴，伍樂城指：「Twins嘅schedule係痴線！」

伍樂城

於牛頭角下邨一家五口成長的伍樂城，九歲開始學鋼琴，他1990年遠赴美國著名學府伯克利（Berklee College of Music）修讀音樂製作及電影配樂，他坦承五年才完成大學，跟經濟負擔有莫大關連，「因為每一個課程都係錢，譬如一個學期可以讀六科，但我唔夠錢只可以讀兩、三科，就好慢。」為了交學費，伍樂城求學期間兼職過不少工作，「五年我都無返過香港，Waiter、唐人街卡拉OK打碟都做過，最影響我係做Berklee音樂廳嘅帶位，因為所有有名嘅Musician嚟Boston開騷，都會嚟我哋學校，呢份工無得坐係好攰嘅，但乜嘢騷都會睇，譬如音樂劇、Heavy Metal、Jazz，甚至最勁嘅Celine Dion，係令我領略何謂先入為主，好多嘢我以為無乜特別，但表演期間原來玩得好正！」

謝霆鋒唱《無聲彷有聲》表達對愛不後悔。

伍樂城95年回港加入許願星工廠先做《山水有相逢》電影配樂，因而遇上人生兩大伯樂黃偉年及趙增熹，亦因趙增熹96年監製梁漢文的專輯，讓伍樂城寫了首支大熱作《衣櫃裡的男人》，繼而再獲英皇賞識，先後為謝霆鋒監製《無聲彷有聲》、《愛後餘生》、《非走不可》等經典。談及霆鋒給人少說話及火爆的印像，伍樂城說：「我同佢合作無嘢喎，同佢溝通係最簡單直接！最記得《非走不可》，因為佢一邊錄我一邊諗到歌名，最初公司覺得唔吉利唔想用，係霆鋒撐呢個歌名。」亦因霆鋒的成功，英皇亦將未出道的Twins交到伍樂城手上，一批伍氏校園情懷作，順利幫Twins走上當紅偶像階梯，伍樂城說：「好多謝佢哋公司畀我哋好大自由度，無乜理我同填詞人點設計。」由Twins未出道到成名後多張專輯，伍樂城見證二人的辛苦，「佢哋好早已經忙到死，一年等於人哋五、六年，未出道仲好啲，佢哋嘅Schedule係痴線嘅，突然間就話要出，唔係一首歌喎，係一隻碟，好彩係兩個，嚟到一個瞓一陣先，一個叫嘢食錄歌先，所以連我根本都無得瞓，但亦訓練到我無乜問題解決唔到。」

見證Twins痴線時間表。

伍樂城跟四大天王也先後合作過，他承認其中一次夢幻經驗，是監製及灌錄劉德華及梁朝偉合唱的《無間道》，令他登上金像獎頒獎台，摘下2003年金像獎最佳電影原創歌曲。談及獲得為這經典電影創作主題曲的機會，伍樂城自揭要擊敗眾多競爭對手，「我哋寫歌都係靠投稿，我要再次好多謝陳德建先生，當時佢處理晒劉德華先生嘅電影，好記得當時我食緊飯，求其問佢要唔要歌，佢話有套電影，故事係：『兵就係賊，賊就係兵！』就係咁多，我就即刻諗到Intro，仲即時喺餐廳攞張紙巾寫喺上面，其實我寫好多歌都係同人食緊飯，《風箏與風》都係咁寫出嚟。最後好好笑，陳德建話恭喜我，佢哋最後揀咗兩首，其中一首係我，咁仲慘，我嗰陣幾日都瞓唔著，End Up中咗，係好開心。」

今日(12月6日)，下午二時至三時於雷霆881商業一台播放的《星光背後》，主持人梁泰來邀得伍樂城任嘉賓。