VIVA新居入伙爆笑實錄麻雀新手Carina一家贏三家 Macy出絕招氹Ada講「我愛你」

娛圈事

VIVA新居入伙爆笑實錄麻雀新手Carina一家贏三家 Macy出絕招氹Ada講「我愛你」

2025年11月15日 13:00 最後更新：13:12

女團VIVA真人騷《VIVA Medium Rare House第二季》今集火力全開！話說四人搬入新宿舍前已經出盡法寶，除咗齊齊掃傢俬，更請來玄學家陳定幫師傅睇風水指點迷津，連分房重任都交給幫幫師傅話事！入住後又舉行一個培養團魂之旅，到Macy老家廣州一日遊，又玩機動遊戲又參觀閨房，之後又要照顧混血B考驗愛心，雖然有成員「揦手唔成勢」，總算順利完成任務。

來到最新一集，四人搬入新宿舍後即開Home Tour及入伙Party，除咗大晒精心佈置的安樂窩，更上演一場「麻雀新手奇蹟逆襲」及「我愛你任務」大作戰，搞到笑料百出。

點擊看圖輯

《VIVA Medium Rare House第二季》

開Party前，VIVA帶冤枉團隊參觀新竇，最搶眼是五人大梳化，Ada笑言：「方便招呼朋友。」；而「VIVA's creative corner」放滿黑膠碟，情調十足；九宮格牆掛滿四人重要時刻的相片，由成團首日到韓國集訓、一週年fans meeting等都有，VALC感性話：「希望之後延伸到成堵牆都係相。」點知Macy即潑冷水，「好難抹啫我只係諗到，唔好意思。」四人即刻笑到標眼水。

參觀房間時，Carina介紹風水屏風，不過被踢爆前一晚成個屏風被她「踩冧」，當時刷牙中的Ada即衝入房救亡，場面搞笑。而Ada則特別擺放了一個小小香水櫃，更謂每日揀香水好有儀式感；Carina就為拍攝執到枱面立立令。至於Macy及VALC房間就走「簡約風」，Macy自言雖然房間不亂，但有點緊張，VALC即問原因，「我哋間房冇乜嘢喎。」Macy續說：「就係太冇嘢囉，哈哈。」VALC即補飛，「冇乜特別，但係好舒服嘅。」

其實正式拍攝前，冤枉團隊悄悄地拉Macy到一角，並派發兩個秘密任務：要幫每位成員披氈及要Ada親口講「我愛你」或「I Love You」，每個任務值五百元生活費！Macy立即諗計，先開大冷氣，待打麻雀時順勢為隊友披氈，第一關順利過關。隨後四人開枱，原來Carina完全不會打，要靠冤枉主理人枉阿姐背後教路，Macy亦是半桶水。最爆笑是Carina其中一局明明可以食糊，但竟然嗌碰！眼利的立即大叫叫她食糊。四圈大戰後，最終是新手Carina一家贏三家。

入伙party結束，正當要拍攝節目ending時，Macy殺出喝停：「唔好end住先！」然後直接對Ada出招，「你可唔可以同我講三個字？」見Ada一頭霧水，Macy即用身體語言攻勢，最終成功逼到Ada講出「我愛你」！其餘三人知真相後瘋狂歡呼，更揚言：「以後拍乜都要講『I Love You』先！」

往下看更多文章

VIVA隊長爭霸戰！Macy有感Carina為團隊付出太多自薦做隊長望幫對方減壓

《VIVA Medium Rare House第二季》第六集昨晚（11月25日）上架，今集戲肉十足，事關成軍一年半的VIVA終於要正式選隊長，今次更是全民投票，投票機制是網民佔40%、公司同事佔40%、VIVA自己則佔20%。

觀看相關影片按連結：https://youtu.be/Iszel3WU_zY

冤枉娛樂主理人枉阿姐在VIVA同居兩個月後的一個晚上，一開局便試探四人熟絡程度，十分為滿分，Ada、Carina跟VALC都給七至七點五分，不過Macy竟然只給了五分！她十分坦白地說：「你話去到好熟我又覺得未有，我覺得仲有好大進步空間。」另外三個隊友則謂其實已經摸透大家性格，不過為了團隊和諧，平時都會「就住就住」，避免嗌交。

隨後，當枉阿姐突然宣布要選隊長，對於突如其來的消息，四個女仔雖然呆了，不過都贊成有隊長是好事。講到心目中隊長條件，大家都甚有要求，除了要做決策、聽人意見、識整合想法，最重要是令全隊人都舒服，「有leader可以解決二對二情況，另外兩個隊友都會明白個決定係為團隊好。」

問到有誰想自薦做隊長，情況立即戲劇性起來！Carina指自己不太想，雖然一直處理開團隊行政及負責溝通角色；VALC就好認真話：「如果唔係因為要讀書，我真係會剔自己！」Ada就十五十六：「我有信心勝任，但會諗到個人好大壓力，唔知頂唔頂得順。」Macy成為唯一自薦隊員，又透露處事方式，「我通常聽晒佢三個意見，過濾一次先發言，個決定會係大家中間位。」不過其他三個隊友即有「微言」，怕她無記性，Macy反駁這個是「優點」，更爆出金句：「冇記性所以唔記仇，因為有仇我當場就報，我唔會記，哈哈！」

原來Macy自薦是想幫Carina減壓，因為覺得她已為團隊付出太多。說到這裏Carina突然感觸哽咽：「喺呢一年半裏面，我已經太將VIVA擺喺我自己前面，完全係Carina@VIVA，而冇咗Carina！所以有啲位就好似食咗我⋯⋯我覺得自己啱做隊長，係因為我係最錫VIVA嘅一個人！我可以好肯定呢樣嘢！」

今次投票更找來星級投票團，他人都各有心水，Gin Lee李幸倪、關智斌（Kenny）、周家怡及李靖筠（Gladys）齊齊投Ada，覺得她最識照顧人；洪卓立（Ken）就撐Carina，大讚「身邊好多朋友都問我呢個女仔係邊個，話佢好靚，腿長！」許靖韻（Angela）及枉阿姐投VALC，Angela理由搞笑，「我成日同佢一齊打波，佢開上手好穩陣，打波好穩陣。」枉阿姐就透露本來心儀Carina及VALC，但覺得Carina已經付出太多，想看看VALC做隊長會不會為團隊帶來新火花。

最後VIVA自己投票，Ada、VALC投給Carina，Carina、Macy就投自己。究竟最後誰會成為VIVA隊長？

你或有興趣的文章

VIVA新居入伙爆笑實錄麻雀新手Carina一家贏三家 Macy出絕招氹Ada講「我愛你」

娛圈事