陳曉華公開緋聞處理手法 自揭成長期間曾因過度活躍長期被欺凌變孤獨內耗

陳曉華（Hera）參選2018年港姐及2019年華姐冠軍入行，入行七年，近日連續主演《金式森林》及《新聞女王2》兩齣台慶劇，當中《金式森林》更夥拍三屆視帝郭晉安做女一。七年來，Hera上位之快、緋聞之多，跑贏一眾同輩甚至前輩。Hera今日（11月16日）接受雷霆881商業一台《星光背後》梁泰來專訪回應緋聞名單外，更自揭成長期間曾因過度活躍長期被同輩欺凌變得孤獨內耗的過去。她稱參選港姐：「純粹想做護士前極速成長。」惟際遇讓她走上演員之路而飽歷最初的批評，她坦承曾經歷沮喪及崩潰，「當時會匿埋公司廁所同喺車上喊。」原來，Hera更曾因收入無法供養父母而一度後悔入行。

陳曉華接受雷霆881商業一台《星光背後》梁泰來專訪。

陳曉華在《金式森林》中的演技獲讚。

性格男仔頭的Hera受訪時口若懸河，但原來小學至中學階段她屬寡言孤獨內耗一族，她說：「我細個過度活躍，好鍾意搶住講嘢，同學睇唔慣就Bully我，變咗我唔敢講嘢，驚得罪人，試過喺小五、小六兩年無講過嘢，變得怕事內向。」她披露讀畢中大護理系同年參選港姐的主因，「一直覺得自己好細路女，好易喊好易放棄，一俾人打擊就匿埋內耗，連大學都係咁。畢業走去選美，就係好想要個過程，好多人話選美可以令人極速成長，純粹想正式做護士前極速成長。」當時的Hera，一心落選就專心做護士，「從來無覺得自己靚，如果做到幾年演員就幾年，無諗過會做到女主角。」

陳曉華IG圖片

選美改寫Hera人生，不單兼奪港姐華姐冠軍，卸任後即被力捧拍劇，20年先任《迷網》女二，翌年的《異搜店》更首任女一，惟Hera於《迷網》中的處女演出，招來一致負評，「係俾人圍插，最在乎係話我黐脷根，我唔怕俾人話我醜話我長頸鹿，係驚黐脷根成世都改唔到！好在當時拍緊《異搜店》，就嘗試改。當時會匿埋公司廁所同喺車上喊，何廣沛係陪我經歷呢個低潮。」談及怎改善黐脷根，Hera稱試過努力咬酒塞讀報紙等方法，最後再跟兩位老師彭秀慧及邱頌偉學戲，重構性格學懂放鬆，解決一讀對白就緊張的間題。

陳曉華IG圖片

由最初被彈是花瓶，到去年憑《異空感應》膺「飛躍進步女藝員」獲肯定，原來Hera也有過後悔入行的階段。被問及卸任港姐初入行的薪酬跟護士比較，Hera說：「哈！唔識答！總之我曾經後悔入行，有認為自己任性的階段。我入行淨係想照顧到爸爸媽媽，佢哋供書教學咁多年，但我一出嚟做嘢連家用都畀唔到，係咪一世都係咁呢？係有一段時間因為賺得唔多而後悔，從來無諗過而家終於賺到錢。」問Hera入行至那一年才叫作賺到錢養家，她說：「就係上年，哈！」

陳曉華IG圖片

被喻為中大校花，中學讀女校的Hera指唸大學才與同系同學譜初戀，至於入行以來緋聞多多，當中包括何廣沛、丁子朗、羅天宇、方力申、陳卓賢、及近期最鬧哄哄的朱敏瀚，她指最驚訝是何廣沛，「因為是第一個傳，我係好驚，答記者嘢手震。而家無所謂，最近又話我結婚又同居（跟朱敏瀚），係唔理得人點諗。」問「大纜都扯唔埋」的陳卓賢怎認識，Hera認有共同朋友，「係共同朋友介紹賣車，做緊啲手續啫，佢咁紅，傳嘅時候壓力好大，就匿埋冷處理。」

Hera入行以來緋聞多多，當中包括羅天宇。

Hera坦言近期應對朱敏瀚的緋聞，同樣用冷處理手法，但這回專訪，她沒法迴避，「總之大家覺得我哋CP好襯好靚搵我哋做嘢最好，哈！」談及是否欣賞朱敏瀚靚仔？Hera說：「你哋唔好淨係睇佢外表啦！佢優點好多，阿朱好細心，心思亦好細密，佢會諗好多嘢，又未必會講出口，佢嘅世界好豐富，真係要了解吓。」

Hera坦言近期應對朱敏瀚的緋聞，同樣用冷處理手法。

1985年15歲參加《歡樂今宵》模仿葉蒨文大賽入行的陳松伶(松松)，91年憑《天涯歌女》一劇飾演金嗓子周璇爆紅全港，唱片更大賣六白金。惟松松的半生儼如周璇般坎坷，因堅持學業與家人爆出誤會，導致不相往來20年。之後又與長期工作夥伴反目，最終身無分文離港。慶幸松松於05年在上海拍劇認識比她少9歲的內地演員張鐸，令這位天涯歌女定居北京不再漂泊。陳松伶為40周年企劃推出新歌《松伶》，並接受雷霆881商業一台《星光背後》專訪。節目中，松松憶述半生受盡打擊，曾跌入情緒低谷，慶幸認識老公重整人生，明白人生的苦難都是花開有時。

陳松伶憑《天涯歌女》爆紅，卻因學業與家人誤會決裂，更曾與工作夥伴反目，一度身無分文離港。

松松直認由陳少琪填詞的《松伶》如同她的自傳，當中一句「人未長高，已看懂人生」就像當年在家貧的情況下要邊讀書邊拍劇以幫補家計。松松與家人之間產生誤會多年，有指與她當年拒絕放棄學業有關，問她年輕時為何如此堅持讀書，她說：「唱歌拍戲都係被人安排，唔係由我控制。但讀書我可以主導，努力讀就考得好。」與家人誤會多年後，松松再與合作多年的工作夥伴反目，爆出是非，促使她心淡離港。「二零零幾年出咗啲事，我係心灰意冷，成個人失去重心，總之我想離開呢個是非地，當時好混亂，覺得自己嘅無能，但我都要生活，就去上海拍劇，亦喺上海認識我先生。」未認識老公及未與家人和好如初前，松松感謝今天的經理人陳淑芬於05年最黑暗期間向她伸出援手，給予她工作機會。「爸爸同外公先後在05、06年去世，嗰時我最崩潰。好彩《雪狼湖》喺國內巡演，陳太叫我幫手，期間我無返過香港，唔需要接觸傳媒可以休息。陳太的確係扶起我嘅人，佢其實知道我發生咗咩事，但從未問過，我亦一句都無講。總之發生了一啲事，佢一直俾咗一個空間我，令我仲可以有收入支撐自己，我唔會喺佢面前講，但佢呢40年來一直係我嘅恩人，我哋心知肚明。」

陳松伶將於2月28日在伊利沙伯體育館舉行演唱會。

陳松伶婚前檢查發現無法生育，曾主動退讓，老公卻堅定選擇共度餘生，令她感動稱幸遇良伴。

當年松松跟不少還未爆紅的男神，包括黎明、鄭伊健、古天樂、張智霖等合作，之後他們個個彈起，問她為何不曾仰慕過對手，她回答：「當時佢哋個個都有女朋友嘛。」至於06年能在上海與老公張鐸合作內地劇《血未冷》修成正果，松松說：「最重要係佢單身。擦出火花係套劇快拍完時，我一直以為佢年紀比我大，當我知佢細我九年，基本上我就話算啦，唔好啦，反正又未真正有深感情，但佢鍥而不捨地跟我話：『未試過，點知？』當我哋相處幾年後，係OK，佢用行動證明佢所講，佢比我更冷靜，可以梳理我情緒，講出我嘅問題。我亦唔係要對方完全聽我話嗰種人，而佢亦需要我呢種女朋友。」

松松指二人於07年開始拍拖，她用了4年時間觀察及磨合這段文化差異很大的關係是否適合更進一步結婚。「佢極北方，我係印尼華僑極南，譬如佢成日講『胡說』我都以為佢鬧我，但只不過係口頭禪。」至於夫妻二人曾否計劃生下一代，她說：「有呀！梗係想啦！但當我哋準備結婚做婚前檢查，就發現我係唔可以生小朋友。」松松直認這亦是她作為人妻的一個遺憾，「會係一個遺憾，當時一知結果，我已經同佢講，你仲有好多選擇。係！我又第二次落閘，因為都要為佢著想，但佢話：『我就係要我哋結婚。』之後甚至話：『我都可以唔鍾意小朋友！』哈！其實佢都鍾意小朋友，我真係覺得我識到一個好好嘅伴侶。」

陳松伶接受《星光背後》節目主持梁泰來訪問。