幾十年舊患痛腳甲 想不到俾枝雞眼藥水搞掂

講開我的美男老坑浴，就要講講，我近70年人生經驗 ，希望能與讀者大人，可以分享，我的身心工作，從商、人際經驗。我少年時，我都忘記了幾多歲呀，可能應該是六至七歲啦 ，我一條靚仔，寄居在旺角，豉油街姑媽家裡，小孩掛往媽媽 ，就自己獨自行，由旺角豉油街，走去媽媽，弼街經營的報紙檔，搵媽媽啦，怎知道橫過彌敦道，給一輛計程車疾駛輾過我隻腳掌，跌倒地，我記憶，我隻腳指及腳背爆曬血，坐我人生第一次救護車，送咗去伊利沙伯醫院呀 ，好利害的岑阿媽 ，鋼鐵的骨骼，孭我出院，還日日孭我從豉油街，經衛理道上伊院換藥，沒良心的我，今日忘掉了被她孭了多少天啊。

痊癒卅多年後，近四十多歲，有一天無端端，小童時輾傷的腳趾公，腳甲無端端又硬又灰，接住行行吓，行一步就痛一吓，即時一步一步，行去砵蘭街，銀泉足浴店，搵我們中國，不知經歷多少百年，傳統修腳師傅，查看腳趾甲發生什麼腳趾痛事情。一坐下，快快揾保哥來，肥保一望，「撐甲喎，車禍令腳甲隨住年齡增厚，壓住嫩肉，痛死你喇強仔，我幫你剷走去厚甲，再將死皮刮走，你就舒服曬呢。」不消半小時，中國傳統外科手術，將我痛苦剷走，穿回襪子再上路，但是一路行，腳皮還有小小痕癢。想起以前，有位朋友夫郎，在中環開設腳部治療中心，打正腳部專科醫生名牌，專門為站得多工作人士服務，例如銀行酒店酒家企堂等，他遇上簡單手術，自己不出手，都是叫上海批腳師傅，代為出刀咋，所以腳有事，我不搵朋友醫生夫君，直接搵上海保哥哥解決掉呀。

最近幾年，為了方便，我就轉咗幫襯荃灣足浴場，揸揸吓隻腳，人就入了夢境搵周公。突然有淒厲叫聲，一位男聲，大叫好痛呀，劃破我的美夢長空，我擘開對眼搜索 ，誰人呼叫呀 ，誰人叫救命呀 ，對面有位卅歲左右男子漢，不斷叫修腳師傅，細力啲小心D，流血喇。修腳大哥就講，攞咗你撐甲嚿死肉出嚟啦，好少血咋，我幫你洗洗，塗點紅藥水，包塊藥水膠布，搞掂啊，你可以埋單走喇。當年輕人包完膠布離開，嗰位修腳師傅，就揸住圓錐形小剷，對住全間足浴男女演講，我慢慢將錐伸入他腳甲邊，大力一轉，嚿死肉就甩掉啦，估不到生得牛高馬大，小小痛楚，都忍唔到，都呼叫救命，真是羞家喎。我瞓著覺都嚇醒，如果有一天，上海保叔老師傅退休，如我遇上新修腳師傅是這位仁兄，揸住圓錐小剷，對住我，我就肉在砧板，任他亂剷喎。想想吓，每次保叔修完撐甲，冇血冇痛，但是總有幾天痕癢，要塗抹曼秀雷敦舒緩，想想後就去寶靈街，找陳刀神， 除了襪， 舉高隻腳 ，畀隻大腳甲他去睇，問刀神，有咩工具可以解決，這個腳趾甲呀。刀神望望，小事一椿，買這個指甲鉗喇。從這個指甲鉗開始，每個月我都是自己，修理自己的腳拇指，但是久不久，都因為技術不夠，而剪深流少少血。

就是這種圓錐形指甲鉗。

最近三個幾月返多咗青龍頭村屋居住。不知是否沖涼房冇工人姐姐清潔，細菌充滿浴室，所以我中咗招，隻左腳底生咗個瘡，一路行一路痛，當然搵我位按腳師傅劉姑娘，問問什麼事啦。小強老闆，你隻左腳底，生了粒雞眼喎，當然行路磨擦痛死你啦，你快快去藥房，買樽雞眼藥水滴。飛車藥房，對藥劑師哥哥說，給我一枝鷄眼藥水。穿著白袍的藥師，不要急，坐下抬腳給我看看先。抬起隻左腳，藥師專心望，對呀鷄眼啊，好大粒哪，你要每晚臨瞓前，滴一至二滴雞眼水，周邊啲肉，就要用凡士林塗抹，保護你其他嬌嫩皮膚㗎，因為藥水勁，會殺錯好皮膚啊。70元買藥水，藥房藥劑師，咁細心咁好服務，真是唱好香港服務業，要揾香港藥劑師㗎。

我的雞眼藥水。

我塗抹咗一個星期，就去搵劉按腳，劉姑娘將雞眼藥水，殺死的死皮剪掉，連續四星期，每星期一次，冇問題㗎啦，嗰啲藥水已經殺曬啲細菌，嗰啲黑筋死皮，沒有喇，好番㗎啦 ，擔保你不會復發。搞咗幾個禮拜，終於擺脫雞眼的痛苦啊。用腦想想，鷄眼藥水咁利害，可不可以試試，點塗在撐甲腳拇指痛患處，再想起張燦勳中醫老師，常常鼓勵我，「什麼塗抹的藥，都可以試，有不好反應，除掉就可以啦，我想到新藥方，都給我兒孫試，當然要小心喇。正所謂，大膽假設，小心求証。」攞住張老師的教導，我將鷄眼藥水 ，用牙籤一滴落個痛患處，連續兩至三日，用牙籤撞擊嗰個痛患處，沒多久就俾我撞出，一粒好硬死皮，痛就停止，從此以後，我除了用指甲鉗修腳撐甲 ，不再深入，防止流血，再用鷄眼藥水滴在痛處，從此解決，接近廿年的撐甲痛楚問題。

小強

** 博客文章文責自負,不代表本公司立場 **

最近返咗去青龍頭村屋住，濕寒翻風天，晚上不夠七點，天已黯然沒光，黑暗在冬夜，準時到達，青龍頭漆黑的天空，在今天光污染中，還有數點微弱星光。

買了兩條耙齒蘿蔔，用十片大薑，中火白鑊，先輕輕來回數次快炒羌片，再放下蘿蔔段，與羌片同兜亂，灑小小熱水，冚蓋熄火，焗五分鐘，再開火翻炒，見蘿蔔與羌，轉成深黃，熄火下三蒸米酒蓋掩蘿蔔，一定要熄火才下酒呀，否則火會燒起來，充滿全個廚房㗎。接著蓋好，才開小火，煮廿分鐘，放鹽少許上碟，絕對好吃過，日本清酒煮大蘿蔔。再加個鴨潤腸煲仔飯，在濕寒風底下的黑夜，一定得回人間溫暖啊。

吃完晚飯，老人家就要吃小小甜湯，因為吳衛平老師吩咐，為了養肝，晚餐後必要食甜湯，可以養肝㗎。少中年青人，就不必哪，因為您們仍健壯，等肝自己運行，幫肝臟等如擾亂肝功能，我們老了，就需要幫忙。等如老人家，要持拐杖行路，才可安穩㗎。切記任何物品，都有好壞，小小糖可養肝，但是太多就傷腎成糖尿呀。晚上睡覺，小便增多就要停啊。每次美心餅店，杏仁餅加合桃酥，兩盒五十元，回家連包裝敲碎成粉，才撕開加半包白沙糖沖滾水焗，就是甜湯，半碗好喇，否則晚上小便多，就麻煩喇。

一入冬，我們嗰代人，吃了好多苦，一出世就窮到褲子穿窿嗰代人，一到冬天第一時間，就諗起名聆新馬師曾的絕唱，「好心啦福心啦，可憐我依個乞兒仔呀。」苦寒濕風刺骨的晚上，沖沖吓涼，淋浴時突然熱水變冰，眨眼間由燙熱水轉了冰水，返去卅年前民間的冰火三重天世界，由美麗華酒店的一百度桑拿房，跳落零度下冰冷水池，年輕時常常與三個小生一齊玩的祖尊，享受冰火浴，那時就爽哪，現在老哪，分分鐘爆血管㗎。聽聞祖哥哥，近幾年在桑拿房出事，好彩新聞傳來百分百康復，我才不用擔心。所以年紀老，機器壞，就要避免刺激㗎，我經過港九任何花街，必定放下個頭，直行直過，否則見到刺激尤物，就腦充血，分分鐘爆血管呀。冰火桑拿浴，小強已經絕唱廿多年啦。

講回我當時由頭髮到腳趾罅，都塗滿肥皂泡，才發現熱火爐石油氣用哂喎，即時關掉水，跳出浴室，用毛巾草草將身體泡泡抹掉，穿回地上衣服，怕頭中風，用小毛巾包住個濕頭，就衝下樓，走出門外，在廚房外面位置，將駁在煮食爐石油氣樽，轉移到熱水爐位置駁好，衝返入浴室，快快開熱水，將殘留身上頭髮上泡泡沖走，搞了我十多分鐘，才由寒風底下，重回溫暖人間。

一覺無話，翌早，吃了麥皮麵包，就去深井，唯一的一間，石油氣供應商，對老闆話，我要四大樽，石油氣啊。老闆答，你條村太高太多石級，員工抬得辛苦，只賣兩樽，用完再叫喇。付完錢返上車就諗，麻煩呀，想買多兩樽石油氣作後備，都不能，他都不賣喎，再整多次，分分鐘，凍到身子弱有新冠瘟疫怎麼辦。即時打電話，給我電腦手機電器郭顧問，將昨夜苦況告給郭腦知，叫他查查，什麼電熱水爐，電煮食爐總之什麼都要電能源，我要取替石油氣能源呀，最安全最耐用最好。不到半小時，回到公司未坐下，他把資料送到，手機亮出長長電熱水爐電煮食爐，評選分級資料，包括消費者委員會列出五種最信得過嘅電磁爐，第一種樂聲牌，第二種樂信牌，第三種小米，其餘兩種我都忘記睇。

我的小米電器。

看完所有郭腦傳來電熱水電磁爐電器資料，就打電話郭腦問清楚，「消委會推薦五個牌子，郭腦專家，你覺得買什麼牌子最好啊? 」聽筒傳來回話: 「梗係買日本牌子啦。」我即時講，「先說電磁爐，樂聲牌雙頭爐要六千元喎，樂信牌都要三千多元呀，小米單頭爐四百九十九，買兩個都不用一千元咋，比日本仔牌子的價錢，平了五倍喎，還有消費者委員會保證啊。」怎知嗰位郭腦，大大聲講，「日本出品最好，六千元買喇，你睇睇，日本AV女優，就知道日本出品，人與物件，什麼都是最好㗎。」我即時講「我哋中國冇女優喎，我哋中國只有，日本仔強逼我們同胞作慰安婦咋喎，你試過日本女優真係咁正咩？」對方即時無語。

我決定入市，買小米電器。收線我就去咗荃灣廣場，小米嗰間米舖，買個電鍋爐電熱水機電風筒返屋企，用咗一個星期，非常之好用，所以我決定盡快換埋沖涼房嘅電熱水爐，永遠不再用石油氣熱水爐。