5月17日，大致多雲，間中有幾陣雨，初時局部地區有雷暴，下午間中有陽光及又氣炎熱。美國債務上限陷入僵局，國會領袖跟總統拜登談判未有共識，財長耶媽警告時間緊迫，美股借機回軟。加上全球最大的家居建材零售商Home Depot業績不及預期，股價低開4%拖累道指低開，中段TSLA股東大會上Elon Musk大派定心丸，TSLA由跌轉升，美股一度反彈，尾市地區銀行由升轉急跌，美股跌至全日低位收，道指跌336點；標指跌26點；納指跌22點。
美股目前靠幾隻重磅科技股支撐大市，其他股份早已轉弱回吐，美國國債上限困擾下，資金避開銀行股及零售股，流入FAAMG等股份，留意標指一旦跌穿4100支持位，美股或急轉直下，連FAMMG呢啲股份都未必頂得住。美國零售數據經過1月及2月大幅反彈後，3月明顯轉弱，4月初值環比增長0.4%，較預期0.8%低，同比增長1.6%更加係36個月以嚟最低增幅。Home Depot公布不似預期業績，管理層更下調全年目標，原因係銷售疲弱，零售股開始反映美國經濟衰退嘅部份。
至於中概股則個別發展，百度(09888)業績炒上，不過富途及老虎證券APP喺內地下架，股價盤前急跌，但開市後見有買盤趁低吸納，主要係以目前估值計算仍算合理，資金仍然選擇低吸。
至於港股真係一場悶局，仍然未擺脫弱勢，噚日恒指高開低走，收市升幅大大縮水，成交額不足800億元，呢個係古天后經常強調，成交未能配合下，港股抽升亦不過係挾淡倉，完全欠缺上升動力。今日恒指回試10日線(19894)尋找支持機會較大，失守再度下試250日線(19701)，至於20日線(19972)及50日線(19990)成為短線阻力。暫時20000關未能企穩，向上突破100日線(20425)難度更大。
京東(09618)日前公布業績好過預期，帶動股價反彈，不過150-160元阻力難以突破，主要係內地經濟復甦不似預期，過往京東每季增長保持喺25%以上嘅日子不復見，今年第一季更降至只有5%增長。內地4月工業生產較3月更差，環比下滑0.47%，其實從CPI及PPI數字可以睇得出，3月的天量貸款，實體經濟基本未見受惠，尤其反映工廠嘅PPI數字，按月繼續下跌。16歲至25歲的年青人失業率高達20%，呢批年青人一向最捨得使錢，連佢哋都無嘢做，無錢使，內地嘅消費有點會有睇頭。內地經濟谷極都唔起，就算阿爺持續托住啲中特股，子彈都有用盡一日，中港股市仍然係有波幅，冇升幅，暫時都係逢高做淡勝算較高。
