民主派元老發功擺硬

泛民主派周初宣布絕食，大家有少少奇怪，泛民這招都算硬招，但點解早前港澳協調小組組長張德江講硬嘢時不出招，但隔咗一排又突然出招？

Ariel八咗一八，傳聞係咁。阿爺舞龍舞鳯，軟招包括請泛民食飯、請去酒會、請去上海；硬招由張德江喊話，講普選有「一個立場三個原則」、暗罵泛民賣假藥，又話普選關乎國家安全。但泛民好似好被動，無乜反應，搞到一班老人家好唔高興。

傳聞話在泛民公布絕食前兩天，民主黨元老李柱銘搵埋陳日君，同民主黨班高層談心，話你地唔好去上海啦，人哋設個局叫你地踩啫。張德江咁強硬民主黨都唔出聲，唔係路喎，要做啲嘢啦，不如絕食爭普選啦。馬丁李和陳主教仲話可以帶頭絕食。

元老一出招，民主黨就要轉，結果就搞出一個泛民絕食行動出來。有長者八卦友話，當年基本法起草時民主派爭直選，都搞過在天星碼頭絕食，那時的港澳辦秘書長李後仲贈咗一句：「絕食危害健康」，絕食都係老調重彈啫。Ariel就話橋唔怕舊，至緊要受啫。

呢次民主派元老出招，唔止叫民主黨發起絕食，其實係叫佢地擺硬，唔好同共產黨妥協，其實是另類綑綁，將民主黨和其他泛民政黨綁在一起，不讓他們可以好像上次政改咁，同阿爺傾出妥協方案出來，都係薑是老的辣呀。

Ariel

** 博客文章文責自負,不代表本公司立場 **

商業電台推出節目改革，原先《光明頂》和《國際線》的時段將改播新節目，引起關注。

下周一起，由已經移民英國的陶傑及香港政策研究所前研究顧問馮智政主持的政論節目《光明頂》同一時段，即周一至五晚上11時至12時，將改播陳志雲及立法會前議員江玉歡的新節目《又係時候同一天講再見》，前半小時由陳志雲做主持，後半小時由江玉歡講人生。

而由潘小濤、沈旭暉等輪流主持的節目《國際線》，同一時段（星期一至五晚上10 時）亦會改播由樂樂主持的《樂和心事》。商台指，今次節目改動方向是「日給力，夜喘息」，在晚間時段加入「生活分享與陪伴元素」，為港人「注入更多情緒價值」。

陶傑回覆傳媒查詢話，停播是商台正常的節目調動，形容每晚11點做足22年都好攰喇，天下無不散之筵席，「短暫的光明之後，不妨等待黎明」。不過佢轉頭在Patreon又表示，節目調動相當「及時」，因為商台明年中需續牌，暗示商台因為續牌受壓，出手「清洗」相關節目。

翻查資料，商台牌照將於2028年8月25日到期。睇返這兩個停播節目的主持人，大多係移民海外的反對派KOL，遙距主持本港政論節目。其中陶傑就經常在《光明頂》唱衰香港及攻擊特區政府，例如預言「香港經濟末路」、「大灣區龍頭夢碎」，早前佢又形容上屆立法會議員不爭取連任係「立法會政變」。而《光明頂》另一主持馮智政，早前則因立法會選舉前夕的言論引發罵戰，備受爭議。

高人話，每逢續牌前後，相關人事變動容易引發聯想甚至掀起風波，但事實上作為一家商業機構，調整營運策略以管控節目口碑、法律風險，都係好正常的動作。