姜皓文演技爆發零對白都發揮淋漓盡致 盧慧敏首演驚慄片愛上特技化妝

《失衡凶間之惡念之最》於7月27日上映。

寰亞電影《失衡凶間之惡念之最》是「失衡系列」繼《失衡凶間》和《失衡凶間之罪與殺》之後第三部曲，由《要命的溫柔》、《逃殺》和《死亡回憶》三部懸疑短篇組成。首次拍驚慄片的盧慧敏（Amy）在《逃殺》中，表現令人眼前一亮，在殘破不堪的廢墟與飾演前夫的姜皓文（黑仔）無論吵架甚至打架都出䀆力。黑仔更是演技大爆發，溶屍和吸毒戲，雖算零對白亦發揮淋漓盡致，他坦言開工前煲古天樂電影《門徒》偷師，而Amy更自爆上網睇真人「死相」汲取靈感，黑仔聞言亦嘩然。

《逃殺》劇照

《逃殺》劇照

鏡頭前，黑仔強忍淚水，將一桶又一桶的液體倒進石坑內，在溶屍戲零對白，近十分鐘內心戲，傷心欲絕，淚水在眼眶內打滾，令人看得心痛，演技大爆發。導演李巨源大叫Cut後，上前安慰並大讚他演得非常到位，但黑仔仍然默不作聲，情緒還未平伏。事後他說：「嗰場溶屍戲，好有愛殺Feel，心情複雜。」Amy亦被動容，她說：「佢係你深愛嘅人。」黑仔苦笑對她說：「成日話『溶咗你』，今次我真係溶咗『你』，我溶咗我老婆。」他又表示因為要有煙霧效果，雖然不是真正溶液，但倒出來的液體亦會散發出白煙，而且相當刺眼。

黑仔強忍淚水將一桶又一桶的液體倒進石坑內。

成段溶屍戲是零對白。

導演叫Cut後，黑仔的情緒仍未平伏。

至於Amy，露肩長髮造型，躺在黑暗而且很骯髒的石坑內演死屍，但死狀非常優雅，李導讚她演得「非常好」。拍攝結束，工作人員準備木梯讓她爬出大坑，但她以43吋長腿一步就跨出，旁人笑讚她長腿好處。Amy說：「我收返頭先話好舒服！個坑嘅地面有啲凍，依家成個頭都係眼淚和油漆，隻眼要擘到好大Hold好耐，扮死真係好難。（辛苦嗎？）OK啦！」她透露為演死屍上網找參考，「我上網搵啲死咗嘅人相嚟睇妝容和表情。」黑仔亦表示其吸毒場面睇戲偷師，「今朝參考過追龍睇《門徒》睇老闆（古天樂）點樣拍吸毒戲，導演好滿意，我含蓄和有型版本。不過拍綁住條止血帶，一陣間隻手就瘀晒。」

Amy要躺在骯髒的石坑內演死屍。

Amy指演死屍隻眼要擘到好大Hold好耐，好難！

第一次拍驚慄電影的Amy表示勁興奮，她說：「每日開工都好開心，尤其是睇人化特技妝，𥄫到實，好好玩。（對黑仔感覺？）頭幾次見面已經夾到，因為佢好nice，唔使特別恭恭敬敬咁拘謹，大家都好友善，加上我哋要飾演一對愛人，好快就唔尷尬。連導演都話我哋一齊就特別化學作用，所以加咗少少戲，少少曖昧，以前有過一段深厚感情嘅關係。佢真係勁Nice，埋位前有說有笑，因為我哋都係食素，傾吓食素心得，我又問佢拍戲經驗偷吓師，聽吓佢講經驗，短短幾日就學咗好多嘢。」

Amy覺得拍驚慄電影好好玩。

而另一場Amy被怪人追殺，更被恐怖手襲擊嚇到尖叫，驚恐表情和尖叫聲令人毛骨悚然。不過鏡頭後就笑料百出，Amy說：「鏡頭前我同呢隻手好近，要表現好驚、好恐懼。但我面前嘅攝影師個樣好nice，我唔可以望到佢個樣，要專心望住攝影機。仲有第一次喺鏡頭前尖叫，幾好玩。（好玩？）我平時好少尖叫，原來尖叫都幾好發洩架喎！」

第一次喺鏡頭前尖叫，Amy笑指原來尖叫都幾好發洩！

「Red Flag」，近年成為年輕人間的潮語，代表一段感情關係出現警號，同時亦成為Amy Lo盧慧敏首支個人單曲的歌名。

Amy Lo盧慧敏推出首支個人單曲《Red Flag》。

雖然是Model出身，但Amy原來好唱得，過去曾多次與專業歌手同場合唱，歌藝獲外界一致好評，今年，Amy正式出道，首支個人作品《Red Flag》，Amy坦言對此曲，一聽鍾情，「我首新歌《Red Flag》，作曲有謝芊彤，作詞係陳詠謙，監製T-Ma，第一次聽到芊彤嘅Demo，覺得呢首歌好有趣，個旋律好有我想表達嘅性格喺入面，可能我平日好少表達自己，又唔多玩社交網站，比較少人見到我真正嘅面向，其實盧慧敏都幾瀟灑，希望我可以透過每一首歌、每一首作品，慢慢俾大家睇到我性格，所以揀咗呢首比較瀟灑嘅歌曲。」

觀看相關影片按連結：https://youtu.be/HLt8AlVayfc

在model範疇，Amy形象百變，在《Red Flag》MV中，同樣以不同造型，表達出愛情三步曲。「用三個唔同嘅造型，去表達三個唔同嘅感情狀態，第一個我同導演叫佢做『Delulu』，因為有好多Delusion（幻想）、沉咗船、好開心；第二個係發現有問題，第三個階段決定離開，所以有三個look。」

Amy在《Red Flag》MV中有不同造型。

MV當日，Amy與拍攝團隊，朝早七點已到南生圍開機拍攝，穿上大露背吊帶裙的她，帶笑遊走叢林間，代表正投入一段快樂的戀愛關係；之後回到自己的家，穿上貼身白色襯衫加紅色短褲，盡騷長腿的Amy，心情變得忐忑不安，開始發現感情出了狀況，卻沒勇氣承認、面對。導演和Amy合作構思用檸檬來表達愛情，檸檬的酸味，彷彿代表一段叫人心酸的關係，MV其中一幕，當她打開家中廚櫃時，檸檬排山倒海地卸下，代表關係破裂的心酸情感。

穿上大露背吊帶裙的Amy代表正投入一段快樂的戀愛關係。

在家中穿上貼身白色襯衫加紅色短褲則代表開始發現感情出了狀況，卻沒勇氣承認、面對。

最後，Amy換上大V領黑色迷你裙，化上冷艷的妝容，代表MV女主角決定做回自己，走出這段關係，導演更加插一幕漫天羽毛的場景，代表女主角堅定離開的決心，雖然拍攝期間，因為羽毛不時落在Amy的頭上、或甚擋著她的臉，要不斷NG，但為了有更好的效果， Amy毫不介意重新整理妝容重拍，務求拍出最佳效果，表現相當專業。

最後，Amy換上大V領黑色迷你裙，化上冷艷的妝容，代表決定做回自己，走出這段關係。

Amy表示：「點解呢首歌叫《Red Flag》呢？歌詞中都有提到，代表一段關係出現咗『警號』，其中一句歌詞提到對方已經消失咗六日，如果大家聽呢首歌嘅時候，好不幸地正正身處喺呢種關係，大家不妨聽吓呢首歌清醒吓，即使對方已經離開，唔再理你，你都可以保持清醒，好瀟灑咁離開呢段關係，尋找你自己嘅幸福同快樂。」

MV圖片

問到Amy的愛情觀，與MV中的女主角有沒有相似的地方？她說：「我自己嘅愛情觀，同《Red Flag》嘅歌詞都有相類似，但係我會比MV女主角更加快走出呢段唔健康嘅關係，雖然我唔知到真正面對時，會唔會咁瀟灑，但我覺得任何人都必須先去愛自己，因為當你都唔識得去愛自己嘅時候，又點會有人去愛你呢？」

MV圖片

正式加入樂壇，但Amy對「歌手」這個身份仍帶點猶豫，她希望日後可以繼續以不同身份，讓大眾更加認識自己，「我暫時唔知我係咪想用『歌手』嚟定義自己，因為人可以有好多嘅身份，希望日後除咗歌手，演員、同各大品牌合作，仲係未來我好想做嘅事情，但我都幾期待唱多啲Live，因為有Live Band嘅感覺係好正！」

MV圖片