《香港靈宵藝傳》促進保留香港粵劇特色與優點 創會董事謝曉瑩：守正之餘就是創新

首屆青年粵劇傳播視頻比賽「吾乃XOL」頒獎禮，嘉許一眾年輕參加者。

香港靈宵藝傳有限公司 (註冊慈善編號：91/19092) 涵蓋了多個專業領域，成立宗旨是為了促進和保留香港粵劇的特色與優點，並按照傳統訂立規範，日前香港靈宵藝傳更舉行了藝傳啟動禮，除了對一眾會董與顧問進行委任外，也舉行他們較早前和香港電台聯合主辦的青少年粵劇傳承計劃：首屆青年粵劇傳播視頻比賽「吾乃XOL」頒獎禮，嘉許一眾年輕參加者。

藝術顧問團成員阮兆輝表示：「講到粵劇我哋需要好多人參與，梗係一代傳一代，我希望小朋友又好，中朋友又好，可以首先去嘗試粵劇，就當玩都可以玩一陣先，如果你玩到有興趣就繼續練，繼續加入，就算你唔做戲，去做研究粵劇都得㗎，而且學粵劇可以鍛鍊身體，唱嘅時候就練呼吸，仲有一樣嘢就係粵劇講《忠、孝、哲、義》，所以小朋友學完粵劇都應該係乖啲嘅。」

創會主席高潤鴻說：「我哋靈宵藝傳都有一啲好新嘅粵劇推廣，好似我哋舉行咗一個叫做《吾乃XOL》嘅網上短視頻比賽，對象係一班高小或者初中嘅青少年，希望佢哋可以透過比賽接觸粵劇，喺保留傳統精粹嘅前提下，加入佢哋年青人嘅思維，TRAIL & ERROR，將戲曲重新包裝，喺網上平台推廣俾多啲唔同嘅人去認識香港粵劇，將戲曲推向社區，走向世界。」

民政及青年事務局 副局長 梁宏正先生 BBS JP，藝術顧問團成員阮兆輝

創會董事謝曉瑩說：「我係土生土長嘅香港人，我係粵劇演員，對於粵劇係別有情懷，我哋辦香港靈宵藝傳呢個慈善團體嘅初衷，就係希望可以為香港粵劇訂立一個新嘅標準，等大家可以知道香港粵劇係靈活多變，之後就會一直梯隊式咁傳授落去，我哋係守正之餘就係創新，會用新嘅方法就好似今次嘅《吾乃XOL》視頻比賽，參賽嘅學生喺學剪輯視頻之前就上咗五課，呢五課除咗有一課係視頻課，其餘全部都係藝術課，有《唱、唸、做、打》，劇本研定，音樂同伴奏等等，我哋喺學習期間訂立咗一啲科班式或者戲班式嘅規矩比佢哋，要佢哋上堂前講早晨，落堂嗰陣同我哋講辛苦晒，呢啲都係訓練佢哋嘅禮儀，原來小朋友喺督促底下係可以做到好好，上課都會更加認真，所以小朋友學粵劇好處真係有好多。」

董事會成員兼傳承第一梯隊導師李龍則表示：「其實小朋友學粵劇基本上好多嘢都唔識，像最初階段嘅《唱、做、唸、打》都要去練，好似佢哋《唱》之餘可以睇埋譜，知多啲音樂同旋律就會更好，係《做》嗰方面，就會有導師幫佢哋排練，我哋亦會將演出同舞台嘅經驗慢慢灌輸俾佢哋。佢哋唱粵曲同學粵劇可以認識更多廣東話同中國文字，雖然喺唱詞入邊唔係句句引經據典，但有一啲會係成語，諺語或者歇後語，亦都可以知道更多歷史人物，對大家嘅中文根底會有更好嘅幫助。」

高潤鴻最後補充：「香港靈宵藝傳以《藝傳》命名，顧名思義 - 以《藝》術《傳》承為重中之重。作為香港非物質文化遺產的一個重要項目，港式粵劇可持續發展是一項極具意義且充滿挑戰的使命。靈宵藝傳很有信心在大灣區共融的情況下，保留、突顯香港粵劇的獨特個性，在各地文化共融中發光發亮。」

南海十三郎是香港粵劇史上重要的編劇家，其作品《女兒香》自1939年問世以來深受戲迷愛戴，並曾被譽為「世紀名劇」。電影《南海十三郎》中唐滌生口述劇本的經典場面，正是本次演出的根基。近二十年來，香港舞台較少上演《女兒香》，反而內地版本《定情劍底女兒香》較為流行。香港浸會大學朱少璋講師指出，該劇對演員唱功與演技要求甚高，挑戰不小，但作為香港粵劇重要基石，「女兒香」必須保存與推廣，籍此傳承香港粵劇根脈。

由李龍與謝曉瑩領銜主演的粵劇《女兒香》（香港復刻版），訂於10月21日在香港文化中心大劇院上演。

本次《女兒香》演出以南海十三郎版本重整為藍本，融合曲王潘一帆及粵樂名家梁素琴女士收錄在唱片的元素，並加入葉紹德潤飾，保留濃厚的廣東南派風格，全面展現具香港特色的文字、唱腔及演繹方式。

謝曉瑩

李龍

今由金靈宵主辦，大老倌李龍、謝曉瑩和阮兆輝將領銜主演是次「香港復刻版」《女兒香》，帶領青年優秀演員郭啟煇、劍麟、周洛童一起參與演出，並訂於2025年10月21日在香港文化中心大劇院上演，票價分別為$480、$380、$280和$180 四種，並已在城市售票網公開發售。今次龍哥飾演的反派魏昭仁，當年由「一哥」陳錦棠擔演，而曉瑩所飾的梅暗香，則在劇中展示花旦、武生、青衣、刀馬旦四種功架，更有輝哥坐陣飾演溫明奇一角。劇情講述武藝高強的梅暗香代兄掛帥抗敵，與魏昭仁、溫明奇並肩作戰，歷經忠義與情感考驗，最終為國捐軀，保家衛國的動人故事。

粵劇《女兒香》（香港復刻版）海報