成就解鎖邀恭碩良合作 曾傲棐爆與偶像見面第一句被問「著幾號鞋」

曾傲棐（Arvin）2025年首支派台作品《時間的碎片》日前上架，這次找來全新音樂班底合作，歌曲由徐繼宗作曲，小克填詞，探索他熟悉的因果循環和時間觀，編曲方面亦首度與偶像恭碩良（Jun）和蘇道哲合作，Arvin更力邀Jun擔任歌曲監製。

曾傲棐推出2025年首支派台作品《時間的碎片》。

邀來恭碩良擔任歌曲監製。

經歷去年的新人年後，新歌Arvin以成長為題，是他腦中發酵已久的想法，「係中五、六時嘅idea，成日都聽人講『早知乜乜乜啦』、『如果可以重新嚟過我一定會點點點』，但我覺得就算俾你重新嚟過，以你當時嘅思想、經驗，其實已經係做咗最好嘅選擇。與其不停咁返過去，不如放眼未來。有啲控制唔到嘅嘢就由佢啦，盡人事聽天命就係咁解，所以我將呢個idea講咗俾小克聽，佢就幫我寫咗呢份詞。」

觀看相關影片按連結：https://youtu.be/FeH37qTnsII

歌曲講述成長，Arvin在這首歌中亦成就解鎖，邀得偶像恭碩良（Jun）合作。他直言對Jun的第一印象並非因為打鼓，而是從幕後製作開始，「細個鍾意Eason、阿Paul黃貫中先生，好多好鍾意嘅作品嘅製作，好多時都會見到Jun嘅名，呢個就係我對佢嘅第一個印象，之後先係打鼓。我記得係2010年Eason Duo嗰個演唱會隻碟，佢打得好有感染力，見到佢打鼓enjoy個表情、個律動，令到我更加投入去聽隻歌。」Arvin表示Jun的作品很有溫度、感染力，很希望做出感染人的作品，於是膽粗粗邀請Jun合作。

MV圖片

MV圖片

Arvin坦言跟自己偶像合作，是一件很神奇的事，他曾想像過「藝人」是否表裏不一？但Jun跟他看到的，「好玩得，同佢做嘢冇乜壓力，因為佢真係一個好叻嘅人，諗到啲咩idea同佢講，佢就會試、就會做出嚟。」跟Jun的首次見面，亦令Arvin十分難忘，「我諗好多人認識阿Jun嘅第一隻作品就係《你着幾號鞋》，我同Jun喺Studio第一次見面，佢同我講嘅第一句嘢，唔知有心定無意，好好笑，因為我哋入去室內要除鞋換拖鞋，打開門佢就叫我：『喂！Arvin，你着幾號鞋㗎 ？』我已經笑到黐咗線，哈哈，呢個就係我哋之間嘅第一個conversation。」

MV圖片

MV圖片

MV圖片

MV圖片

隨後，Arvin又分享跟Jun創作歌曲點滴，「有陣時一啲靈感都冇，我記得Jun同我講：『要enjoy呢個好lost嘅moment，因為呢個你唔知點算好嘅moment就係呢隻歌最後出到嚟好神奇嗰個vibe嘅來源，你唔使驚，冇就冇啦，冇就落去食飯啦。』所以我哋係咁食飯嘅，哈哈！日日都係去同一間茶餐廳食晒晏晝、夜晚，但係幾好玩幾好笑，我從來都未試過有咁樣嘅writing camp嘅體驗。」

MV圖片

MV圖片

去年曾傲棐（Arvin）跟女團Lolly Talk成員Sinnie合作年度Medley，影片上架後，即一度停留Youtube熱門音樂影片二十大。今年Arvin再下一城，他的「年度歌曲精選Medley」企劃，找來今年殺入「叱咤2025我最喜愛組合」五強之一的樂隊「晚安莉莉」一齊玩，將2025年的年度歌曲一次過大晒冷！

今年與「晚安莉莉」一齊玩

去年影片成績亮眼，今年更犀利！影片上架未夠24小時，已經極速衝上YouTube香港區熱門影片榜二十大，兩日內更升至第九位，不少網民都話要瘋狂重溫，又謂是每年最期待的影片之一。問到是否想將這個Medley變成年度指定動作，Arvin話：「希望有呢個能力啦！每年都有好多好歌，有啲係Greatest Hit，有啲係遺珠。做呢個Project除咗想大家回顧一年嘅作品，都想自己聽返啲聽漏咗嘅好歌。」

做呢個Project除咗想大家回顧一年嘅作品，都想自己聽返啲聽漏咗嘅好歌。

找來「晚安莉莉」合作，原來他們早於今年八月的「JFFTLIVE音樂擂台現場版」已經結緣，「演唱會搵咗佢哋，然後上年又搵咗Sinnie（晚安莉莉主音），佢哋（晚安莉莉）又作為今年新人單位，成件事就好自然咁樣走埋咗一齊。」佢就超級興奮：「唔理大家覺得夾唔夾硬，啲歌編排夾唔夾，或者出嚟效果好唔好聽，我哋就玩得好爽！好少有呢種一齊Produce件作品出嚟嘅感覺。」一年下來有不少歌曲推出，Arvin揀歌準則直接又霸氣，「每年都係一樣：我哋中意。」問到眾多歌曲中他最喜歡哪一首？他笑着說：「《第三人稱》，唔係唔推自己歌下話！」

玩得好爽

影片出街後，除了獲得不少網民大讚「好正」，同時亦有網民留言指Arvin跟Sinnie合作很有火花，畫面好Sweet，Arvin搞笑回應：「我係清白的。」唔知fans收唔收貨呢？除此之外，Arvin又透露正在籌備拍攝更多音樂向的影片，目的是自肥一番，「俾自己過多啲歌癮，但講到年度歌曲咁就梗係keep返一年做一次就夠晒數，哈哈。」

有網民留言指Arvin跟Sinnie合作很有火花