生活事
香港四面環海，仲有好靚的維多利亞港，但咪以為香港地人人識游水，有調查發現原來識游水的香港人少過一半，呢個比率同外國比都算低。好似澳洲，雖然內陸係大片沙漠，但全國八成人都識游水。
游水強身健體，唔單止係運動仲係求生技能，一旦跌咗落水都能夠保到命仔。所以家長們真係要諗諗係咪安排仔女學游水，游得唔叻唔緊要，但至少多樣求生技能傍身！
據聞馬會有見及此，即將推出新計劃，安排讀小一的小朋友免費學識游水，計劃初步諗住分三年進行，合共有一萬六千個名額，即係有一半小一學生有機會參加，馬會會同游泳總會合作，由康文署協調提供場地，等班小朋友唔駛錢就學到游水。
點為之學得識？聽聞會以識游20米為目標，呢個係水中求生的基本要求，跌落水可以救到自己﹔加上所有水上活動都要求參加者識游水，所以學識游水真係好有用。
小朋友成日被批評唔識照顧自己，有學校甚至要教學生如跌親時，教佢地用雙手保護自己，所以呢啲有得玩、有得傍身的游泳課程，相信亦會大受歡迎，這種慈善項目亦值得推廣。
Sebastian
** 博客文章文責自負,不代表本公司立場 **
針灸名醫張勇醫館今日喬遷，由油麻地搬到灣仔謝菲道90號豫港大廈，好多巨富名人明星都係張醫師的客人，所以都有唔少人俾面到賀。
張勇（左）、張太（中）及其公子（右）一起出席喬遷切燒豬儀式。
最受注目的係巨星梁朝偉，佢來到的時候，個個都爭住同佢拍照留念，張師傅仲介紹偉仔詠春係有真功夫，但偉仔就唔願耍番兩手。
另一位來捧場就係港鐵主席馬時亨，Fit馬咁忙都來捧場，可見佢真係相當俾面。
張醫師的針灸真係要有兩手，有位報紙老總的九十歲媽媽，前排腰痛，痛到雙腳又痛又麻，企到企唔到，搵咗張醫師針灸，慢慢就康復番，痛症呢樣嘢總有一個根源，張醫師好有心找出病因，將病人慢慢醫番好。
唔講唔知張醫師都係非常之打得的詠春師傅，佢仲喺新的醫館劃出新的位出來做詠春教室，樹咗個木人樁，即場仲表演咗兩手，打到啪啪聲，非常有力，令到賀者大開眼界。
