前「無線咪神」梁政珏（Jeanette）自去年初低調嫁予北海道牧場餐廳老闆何思源（John）後慢慢退隱，仲一擊即中閃孕生仔，但35周剖腹出世的B仔僅重4.2磅，要插喉瞓氧氣箱，嚇親媽咪。不過Jeanette坐月百日調理身體更餵人奶谷肥baby。日前下午，何氏一家三口溫馨出巡，靚媽極速回復苗條葫蘆身材，5個半月Johnson B首度曝光！

爸爸梁衛民是大律師兼酒店老闆的梁政珏，早年未有因家境富裕而怠慢事業，經常以性感打扮拍劇兼出席活動，被巴打封為「無線咪神」。但咪神自與何思源拍拖後，戀愛大過天，封胸歸隱。去年更閃婚閃孕，一年間做人妻兼當了媽媽。

產後一直專心湊仔的索人妻，日前下午三時許和丈夫推BB車現身中環太子大廈。當日人妻穿Leggings貼身衫露出巨咪筷子腳，又束上髮髻方便抱B，一家三口以灰色tone「家庭裝」遊走三樓童裝樓層。見他們走入書局揀幼兒書，慈母放長頭髮拎圖書遞畀愛子睇，講一輪故事後即抱B坐在沙發繼續睇圖書又玩玩具，戴口水肩的Johnson B頭髮稀疏，面珠啖啖肉，睇落個樣似足Daddy。 而母親講故事時，B仔郁手郁腳而且成日「奸笑」好趣緻，親子樂逾半小時才走人。


初為人父的何思源無戴眼鏡、剃晒鬚，加上一身運動裝個樣後生晒。兩公婆輪流抱B推車，狀甚溫馨。最後人妻帶B在東方文華酒店大堂等丈夫取車接載，索媽咪就把握時間，幫愛子影幾張萌照，放B仔在沙發高抄影相，影完一臉滿足抱仔離開。