從政好難唔忿氣

教育局局長吳克儉昨日早上出席在伊利沙伯中學舊生會湯國華中學舉 辦的校慶活動，離場時遇到該校學生及校友請願，部份人穿着印有「 熱血公民」字樣的恤衫。 部份請願學生突然衝出馬路堵塞停車場出口，和警方對峙， 事件擾攘了差不多一小時，吳克儉在警方保護下離去。

吳克儉可能條氣唔順，午後出席香港女教師協會十周年會慶時話， 對社會一有問題即歸咎教育制度差，感到「深深不忿」；又指「 自己每日皆與老師、同學、家長、校長溝通， 我覺得佢哋做咗好多好好嘅嘢， 點解一句說話就話香港教育制度唔好，就將佢哋（努力）抹煞晒？ 我係好唔順氣嘅」。

吳局長呢句「深深不忿」，在政界惹來好大爭議。有建制派中人話， 近日批評教育局的聲音唔少， 好似星島新聞集團主席何柱國前晚在他們主辦的2015年傑出領袖 選舉頒獎典禮上，批評母語教育及通識教育失敗， 更直言希望下屆政府有魄力帶領教育行番正路。

建制中人話，雖然昨日湯國華中學的示威搞到咁唔係好啱，但吳局長一句「 深深不忿」，亦唔係好掂，人家批評你有乜唔啱，可以講道理講出嚟 ，而唔係講情緒，市民其實唔理政府高官條氣順唔順，只關心你做得好唔好，從政好難唔忿氣，若然覺得政府教育做得唔夠好，而你覺得自己好好，也可以攞出來討論一下，而唔係講「深深不忿」囉。

Ariel

** 博客文章文責自負,不代表本公司立場 **

早前醫管局為了紓緩公立醫院因流感而逼爆，宣佈推行5項措施，包括安排護士為病況穩定的病人配藥。此建議一出，馬上被護士和醫生都鬧爆，特別是護士指開藥不是他們的職責，加上他們也人手短缺，不明白為何推這項措施。

群情洶湧下，政府都知衰，食物及衛生局局長高永文的回應逐步後退。高永文後來指該項措施針對病情穩定的病人，且會由資深護士按指引進行評估，再向醫生報告才配藥，認為此舉令更多病人受惠。

不過護理界對呢個「護士評估、向醫生報告」的講法，都未收貨， 繼續鬧爆。政府都覺得係「護士配藥」呢個講法太深入民心，唔改唔得。

聞說政府高官會再出來解話，強調不是「護士配藥」，只是「 重覆配藥」，再進一步淡化護士的角色。按街坊式的理解，去睇醫生時，如果自覺食藥好咗，只係差少少手尾，病人唔想排長龍等睇醫生，就會同護士講自己想配藥。護士向醫生報告，醫生睇一眼覺得無問題就批准。唔知高局長將會講的「重覆配藥」，係唔係呢種情況？