博客文章
通靈之術，古今中外皆有之。或者霸戲哥見識少啦，感覺西方通靈術比較刻板，不外乎用靈擺、探靈儀之類。近年好似興番Ouija board，其實咪即係鬼佬版碟仙。
我國通靈術五花百八，門派之多唔在講，所用嘅道具更係千奇百趣，目不暇給又極具創意。好似標童扶乩呢類更又埋視覺享受，專業得嚟又有幾分滑稽。
至於講到邊個門派邊家學說最堅，坊間好似未正式比較過，唔似得武術咁可以搭個擂台即場比試。不過TVB今晚10點半有個新節目《通靈之王》，由梁思浩帶領兩位靚女王嘉慧（Cathy）同伍韻婷（Juliana） 做主持，15名嚟自不同流派嘅「通靈專家」，透過比賽比拼通靈術，大家聽慣聽熟嘅好似「茅山術」、「紫微斗數」、「九宮飛星」固然有，瑪雅巫術、功夫通靈你又見識過未？
想知咩胡蘆賣咩药，今晚就要留意啦。
霸戲哥
** 博客文章文責自負,不代表本公司立場 **
無意中睇咗集單元劇《母親的乒乓球》，勾番起兒時嘅乒乓回憶。嗰個時代，乒乓球絕對係草根玩意，每個屋邨總有幾張封塵嘅石枱，每張枱總有幾個踢住人字頭嘅死豆丁。霸戲哥就係其中一個。
窮等人家如我，波板、乒乓波都喺文具舖度買。波板最平12蚊一塊「流星板」，前面一塊擋唔到「西」嘅膠粒，後面係形同虛設嘅木板。進階一啲有紅雙囍，前面一塊「進攻形」正膠，後面木板，記憶中要40至50蚊一塊。再高級啲又有紅雙囍「雙星」、「三星」，但個人感覺只係個名「虛張聲勢」而已。乒乓波都有平有貴，最平嘅有「冠軍」、「盾牌」，幾蚊一筒六個，通常打兩打唔係踩扁就爆波。貴少少有「友誼」、「双魚」，有一期仲出咗啲橙波，打夜波時易睇啲。
屋邨仔打乒乓波叻唔叻唔係重點，最重要夠氣勢，正是輸人唔輸陣也。因為波枱係公家嘅，同成日有人打緊，你想打兩板就要同陌生人「猜枱」。通常係打鋪「六分四」，贏留低輸就夾尾巴走。當年「猜枱」仲有個霸氣口號——「留波、留板、留底褲」，意思係輸一方係都賴死嘅話，就要輸波、輸板同底褲。
霸戲哥自問打乒乓波幾有天份，從來猜枱贏多輸少，又因為串串貢（如開波拋波要到十樓高），都得罪同區唔少豆丁。後來升中一，先發現天外有天，打得叻嘅同學有跟開教練，用嘅球拍動輒過千，仲見佢哋時不時拎支洗板水出嚟噴噴抹抹……我就知乒乓波其實唔太啱我。
我只係享受猜枱贏完，睇住輸家落荒而逃嗰種快感。
