38歲的無綫筍盤陳智燊（Jason），與07年國際中華小姐冠軍、年輕8載的女友宋熙年（Sarah）鐵定12月在港大婚，下年返回英國和澳洲設宴。近日經常「夫妻檔」掘金的Jason和未婚妻，日前拍拖行中環，見他們買了一大盒玩具送禮，仲細心揀多幾個公仔，睇嚟呢位準新郎之後會係二十四孝Daddy喎！
陳智燊拎住一大盒玩具拖實未婚妻笑笑口離開。
一對準新人去年底已低調到中環大排檔，搵Sarah的娛圈好姊妹陳爽、高海寧和李亞男一齊出鏡，拍了輯地道特色婚照。新娘子更意屬三人再加朱璇做姊妹團，Jason的兄弟團則有楊明和反串的龔嘉欣，星級伴娘伴郎團，12月的「陳宋聯婚」一定好熱鬧。
Jason揀了幾盒公仔問未婚妻意見。
日前傍晚，呢對準新人又現身中環十指緊扣溫馨放閃。二人先去JOYCE買衫再行太子大廈買玩具，見Jason主力揀三、四歲以上的幼兒玩具。而Sarah就手挽Hermes手袋，企埋一邊悠閒歎咖啡。
Jason說：「買盒玩具送畀朋友啲小朋友之嘛！」
Jason快手揀了一大盒售價約$950的Playmobil足球場，再揀多幾個人物公仔，他揀了幾盒再問未婚妻意見，見Sarah點頭就埋單走人。臨走時，Jason拖實未婚妻禮貌受訪說：「咁啱有時間咪一齊行吓街，買盒玩具送畀朋友啲小朋友之嘛！」
