中電晨曦島用太陽能供電

在西貢的晨曦島，中電正進行一個太陽能供電計劃，昨天去現場參觀，就知搞可再生能源發電，唔係想像中咁易。

西貢的晨曦島

晨曦島上有一個福音戒毒中心，呢個到島本來冇電力供應，要運柴油入去發電，中電考慮用各種方法去供電，建立太陽能供電系統需要幾千萬成本，並不便宜，但平過用海底電纜供電，設架空䌫入島又破壞附近景觀，所以最後決定設立太陽能供電站。

太陽能發電設備

中電市場及客戶服務部高級總監張寶中話，島上有兩組太陽能供電系統，各有一台風車輔助，太陽能加風車發電，無風時有太陽，冇太陽時有風，可以互補。再加儲電系統，可儲到1100度電，足夠供島上兩三天使用。加上管理系統，在估計儲電量少時配給用電。最主要保持供水及食物冷藏系統，有電供應。

中電市場及客戶服務部高級總監張寶中

兩組太陽能發電站合共有672塊太陽能板發電，可發電180千瓦，足夠島上100人用電量，但無得用冷氣。風車用來在太陽光不足時輔助發電，風電只佔10%以下發電量。

風車只是輔助發電設施

中電投資幾千萬在晨曦島搞太陽能發電計劃，只係收番正常的電費，好明顯唔係咁容易回本。中電除了支持福音戒毒中心外，亦藉此試驗太陽能發電的成效，研究在什麼環境下，在香港可以用再生能源發電。

另一方面晨曦會總幹事葉陳幔利就介紹島上的情況，佢話入來戒毒的人，通常在這裡逗留九個月就可以成功戒毒，但唔等於佢哋唔會再番入來，平均的數字係要戒7.5次毒才可以最後成功脫癮，所以好多吸毒者都係出出入入。

晨曦會總幹事葉陳幔利

這裡不單收戒毒人士，各種癮都可以戒除的。戒毒、戒賭、戒煙、戒酒、戒打機，甚至戒色都得。那些戒毒者或戒煙者，煙癮發作，會游水出去用錢向遊艇上的人買煙，幾個人一齊用樹葉重新包起啲煙絲，一支煙就拆成六、七支煙來吸。

葉陳幔利就負責懲罰這些違規人士，扮演一個「黑臉」的角色。聽完她介紹，雖然島上風光如畫，但亦想像到他們沒有冷氣的生活，十分刻苦。

Sebastian

** 博客文章文責自負,不代表本公司立場 **

隨住亞視免費廣播成為歷史，ViuTV月初推出，有大熱韓劇《太陽的後裔》同話題真人騷帶住矛盾去旅行，引來不少話題，上周三開台，對無記收視帶來幾大衝擊有待觀察，但電視風雲戰況升級。

大台無記近年受的狙擊不少，亦靜靜地起「革命」，今個月中正式推出OTT機頂盒服務，通過myTV SUPER 電視盒子或App，俾基本月費可以睇到依家TVB五條免費頻道，同15條主題頻道，即係依家無記在Now收費電視播緊的收費頻道，全部都可以在自己的OTT平台睇到。

有人問，依家免費都可以睇到的頻道，放上OTT好像有啲多餘，原來OTT服務有個特點，可以隨時睇番過去3小時播過的節目內容，或者點播更早前播出的內容，即係唔再要定時定候睇劇啦。

呢個OTT平台，有3000小時無記自己的節目，8000外購節目，最吸引係李英愛事隔 11 年復出電視的話題作《師任堂》遲啲都有得睇，而且同南韓方面傾掂數，在南韓播完8小時後就可以在OTT平台睇到。

Sebastian問無記高層，佢哋買咗咁多亞視劇集點用，佢笑笑口話如果唔侵權，可以開個「亞視台」喎，咁到時真係「亞視不死」啦！

無記今次推出的OTT服務，基本組合的5+15個頻道，用機頂盒在電視機睇，68元月費，如果在電器商買一次俾一年費用，就780元睇一年兼買咗解碼器，至於App就38元月費。聽落唔算貴，但在網上乜到免費的時代，係唔係咁易打開市場？

無記高層爆料，已簽咗香港寬頻同和記3，包銷大量盒子和apps。香港寬頻推出月費148元計劃，包100M寬頻同myTV SUPER服務，和記電訊同3亦都推包含myTV SUPER優惠月費。無記消息人士話，香港寬頻包銷40萬個機頂盒(解碼器)、40萬個apps，而和記3就包銷15萬機頂盒、45萬apps，包銷期18個月。

咁大批包銷，一定係超級低價，隨時10元8塊有交易。無記高層唔願意講幾多錢，但係承認係超級低價，我諗無記咁樣即係等於「半賣半送」，用等同免費的策略，大量推出盒子同apps，搶佔市場。先透過電訊公司鋪咗55萬機頂盒同85萬apps出街，佔咗網上電視的客源再算，否則俾樂視同埋Netflix 搶晒啲客，無記仲更加頭痕。

無記呢招以半買半送，先搶佔市場，好處是不只是有免費收視廣告時間可賣，亦可以有一個擁有140萬機頂盒同apps用戶的OTT平台可以賣廣告，唔使等自己免費電視嘅客不斷留香網上電視市場。但壞處就係而家無記的觀眾，可能會轉移去機頂盒睇節目，亦都會減低無記免費廣播節目的收視率。

不過，調查公司Nielsen 正計劃將OTT的收視計算在收視率內，據了解希望今年尾提供OTT 的收視率。無綫大搞OTT，一加一減望保住收視，仲可以博一舖搶網上電視客源。雖然有風險，但面對咁劇烈的競爭，無記唔做嘢都係死，焗住都要打呢場仗啦。