Kelly Chu
香港家庭福利會一直關顧長者福祉，推出各項服務，支援長者日常生活以至晚年照顧，自二〇一七年仲開展「預設照顧計劃」，等有意商討預設照顧計劃嘅長者同家人，喺醫療取向、財產安排、殯葬喪禮意願、器官捐贈等方面，可以深入探討，減少遺憾同壓力。家福會日前就舉辦咗「預設照顧計劃如何踏前一步？」社區論壇，邀請唔同界別嘅專業人士同公眾交流，期望透過呢次論壇，提升公眾對「預設照顧計劃」嘅認識同關注。
今次論壇有家福會長者服務委員會主席鄧守廉，以及醫務衞生局顧問林啟忠出席，林啟忠就透露，「預設照顧計劃」着重病人自主權，正積極同不同持份者溝通，期望明年將草案提交立法會討論，進行相關立法。
Kelly Chu
聽日就踏入兔年啦！文化體育及旅遊局局長楊潤雄，同副局長劉震及政治助理招文亮，齊齊着兔仔裝，拍片同市民拜個早年，恭祝「兔（吐）氣揚眉」。
影片喺文體旅局facebook專頁開心分享，只見三位高官唔怕麻煩去着呢套兔仔裝，Kelly都感覺到佢哋好有誠意，三人仲祝大家「兔年吉祥」、「鴻兔（圖）大展」。帖文還提到，兔仔充滿活力，所以今年香港都會活力四射；局方亦會學習兔仔嘅迅速、靈活、敏捷，把握二十大及《十四五規劃綱要》帶來嘅新機遇，利用香港獨特優勢，成為世界級中外文化藝術交流中心。
■楊潤雄局長同可愛兔兔一齊祝大家兔年吉祥！
KellyChu - 文體旅局高層 盞鬼化身「兔男郎」拜年！｜Executive日記
