許秋怡同王書麒這對老父老妻，結婚已13年，最近接受電視台訪問，大談娛樂圈中高低起伏，盡顯恩愛。許秋怡透露，當年老公工作遇上樽頸，是她鼓勵對方接拍三級片。
許秋怡同王書麒育有12歲囝囝Cody
許秋怡憑《現代愛情故事》一曲，90年代紅到回內地登台，工作接過不停，有指她坐擁過億身家，她堅決否認：「益生菌就有過億！佢地只係計我收入，但無計開支。」
兩夫婦唱遍大江南北，當中有苦有樂，書麒說：「台上唱歌的滿足感係即時性，開心之餘又可以賺錢，不過以前都試過做完騷收唔到錢，或者收到假錢。」秋怡更因經常乘長途車到偏遠地方而患坐骨神經痛，她說：「有次我坐咗18個鐘車由深圳去江西，真係呢一世都記得！」
10歲開始做童星的王書麒，當時收入甚豐，可惜後來星途未見順利，接拍過幾套三級電影，原來是秋怡鼓勵丈夫這樣做，她說：「佢係一個演員，唔應該諗咁多，而且我信任佢為人老實。如果連佢身邊最親的人都唔支持佢，佢做咩都會好大壓力。」2人結婚13年，秋怡甜蜜表示：「佢去外地工作時，我一個電話都唔會打畀佢，反而係佢打畀我多。相反我去內地工作，佢每日都打成20個電話畀我，擔心我一個女仔有危險。」相處多年難免有所爭執，秋怡總怪責對方不會道歉，丈夫書麒笑說：「我每次一講對唔住，佢就叫我行開，唔好以為道歉就得。」
2人對12歲的兒子Cody寵愛有加，秋怡更早已計劃好將來，「我同書麒講將來一定要對新抱好好，而且我地老咗會住老人院，因為仔仔始終有自己家庭，唔想佢咁辛苦照顧我地。」