無綫熱播新劇《一屋老友記》勁收，造就一班配角人氣急升，其中飾演廢青「細寶」的張彥博演技生鬼，現年35歲的他童顏俊臉更被激讚。人氣急升，大眼靚仔自爆仍然單身，更爆情路好坎坷：「因為童顏，女仔怕似姐弟戀，加上工作冇前景，成日被女飛。」
張彥博曾與裕美（右）傳過緋聞。
提到5年前跟裕美的一段刻骨銘心愛情，阿博否定係事實，強調當年兩人只是合作夥伴，但言談間又似乎放唔低：「每人有唔同經歷，有啲嘢要放低向前看。」
查實由唱作人出身的張彥博，05年組四人組合「赤子」入行，「人妻」裕美都係佢前度。入行逾十年先彈起的他，大呻大台6千幾蚊人工，平日要節衣縮食，生活艱苦，不過他卻自得其樂：「家陣有呢個穩定收入都比『赤子』時好啦，希望有機踏上紅館開到演唱會，先敢考慮成家立室，反正仲未有對象。」
同千雪BB拍過《EU超時任務》
童顏張彥博做音樂人入行，組Band唔成，前幾年曾在內地參加歌唱比賽，惜皆落空。14年把心一橫，加入TVB藝訓班，轉型做演員，過去一年演過無數「老臨」，阿博笑說：「哈哈！我係全職露宿者、家丁！最搞笑喺《張保仔》入面仲一人演四個大咖角色。雖然係咁，但都有好多學習空間。今次《一屋老友記》入面嘅廢青角色「細寶」係融入我當年嘅親身經歷，以前對家人嘅相處態度，加埋被追問動向時，煩厭發脾氣元素，再表達出來。呢個戲係我人生第一個擔得咁重戲嘅電視劇，所以要特別用心去演。」
熱愛音樂的張彥博，將會出歌繼續追夢，最想係有朝一日可以踏足紅館開到個唱，終極目標做到張國榮、譚詠麟由歌手進軍影視，成多棲藝人。