有市民目睹一名年紀老邁的的士司機，於隧道內「一邊揸車一邊瞓覺」，當時更載著客人，場面非常驚險。
有網民拍到的士司機疑似「一邊揸車一邊瞓覺」的片段。（FB影片截圖）
有網民於Facebook群組「車Cam L（香港群組）」以「欣賞你，瞓住都行到直線」為題上載1段片長13秒的影片，片段可見一輛紅色的士正在隧道內行駛，而的士內的司機目測年約7旬，他坐姿前傾，臉部靠近方向盤，看似「中吓中吓，瞌眼瞓」，疑似「一邊揸車一邊瞓覺」，的士後座當時更坐著一名乘客，畫面觸目驚心。
司機看似年紀老邁，他坐姿前傾，臉部靠近方向盤，疑似「恰眼瞓」。（FB影片截圖）
此片一出即引起網民熱議，不少網民為司機伯伯辯護「我搭過佢車，佢唔係瞓呀，係駝背」、「相信唔係瞓左，似係坐姿，或者視力問題」、「似係駝背，佢隻手有郁」、「我坐過佢車，個司機係咁㗎喎，唔係瞓著」、「呢個司機係甘架，好多人都比佢嚇親，佢通常都係港島區」、「佢年紀大個人向前中，腰骨坐唔直啫」。
車上有更載有一名乘客。（FB影片截圖）
亦有人稱曾經被該司機伯伯載過「我都搭過呢個伯伯車，頭頭我都好驚，但我發覺佢雖然開得快，但係上到highway 避開其他車快而準，成程快但好定」、「我都係初時驚驚地，但坐坐下又覺得佢幾安全，可以快既時候佢就踩油去，唔會亂咁攝，所以坐得都安心既」。
有不少網民為司機平反「我搭過佢車，佢唔係瞓呀，係駝背」。(FB影片截圖）
很多網民亦慨嘆「見到這種情況反映香港老人好淒涼，咁嘅年紀都要出來揸的士。這個政府是否要反省一下點樣比到生活保障給長者。」、「如果老人生活保障健全啲，啲阿公阿爺就唔駛咁老都出去搵命搏啦」、「社會悲歌，咁大年紀都要揾食」、「七老八十仲要出嚟搵食，真係唔容易，令人心酸」。
帖文來源：「車Cam L（香港群組）」
