幼子打乞嚏弄污的士司機要求抹走 港爸叫「驗DNA」被鬧「賤種」掀罵戰

幼童搭的士途中打乞嚏弄污車廂，司機要求父母抹走鼻涕，港爸叫「驗DNA」焫着司機，遭罵「賤種」回應起爭執。

有一家四口與的士司機在灣仔街頭爆口角。（FB影片截圖）

有網民於Facebook群組「的士乘客及司機行為分享區」上載影片，事發地點為灣仔，當時一輛的士停泊在馬路邊，司機及一家4口乘客已經下車，男女乘客似是夫妻各抱住一名幼兒，司機大罵「整污糟人哋㗎車」、「仲叫人驗DNA」、「你咁樣教小朋友㗎咩你？」、「你報警啦」。男乘客則反嗆「你係咪黐線㗎？」，女乘客亦低聲問道「邊度呀？」司機怒指「佢初頭話啲口水唔係佢嘅」，男乘客反駁「我無話冇…」。

知情人士稱幼童搭打乞嚏弄污車廂，司機要求父母抹走鼻涕。（FB影片截圖）

女乘客嘗試拉扯老公勸其離開，司機因男乘客寸爆話要「驗DNA」而被焫着，繼而不斷怒斥「賤種」、「咁樣教小朋友」，更爆粗「X你老母」。男乘客不願離去又不甘示弱反問「你有冇病呀？」、「你係咪傻㗎？」，司機則繼續怒罵「死賤種」，然後架車離去，最後聽到男乘客一句「你都黐黐地嘅」，影片就此結束。

港爸一句「驗DNA呀」，加上話司機「係咪聾㗎」，即焫着對方。（FB影片截圖）

有知情人士留言解畫「首先要更正小朋友冇食野冇玩口水，（司機）亦冇要求乘客比清潔費。小朋友途中打咗個乞嗤，司機收完錢見到後叫爸爸抹埋個篤鼻涕，爸爸初時以為的士佬挑骨頭回應咗一句『驗DNA呀』，司機叫佢過嚟睇睇，見到後佢話佢抹返，見爸爸心不甘情不願，的士佬連聲話自己唔岩唔需要佢清理。（爸爸）仲要話司機係咪聾㗎。司機着哂然後互相指駡。」

港媽不斷勸老公離開。（FB影片截圖）

影片引網民熱議，不少網民茅頭指向乘客「被呢啲賤精客人攪到的士車箱咁污槽，叫人哋個的士司機點做生意呀！」、「我覺得無論自己又好 自己小朋友又好，整污糟左人架車 好應該清潔反。」、「講真畀你都嬲啦，搞到人哋架車污糟邋遢，仲使做生意咩」、「佢鬧得無錯，乘客整污糟架車就應該清潔返/比清潔費」。

司機怒斥「賤種」、「咁樣教小朋友」。（FB影片截圖）

帖文來源：Facebook群組「的士乘客及司機行為分享區」

興趣班並非小朋友專利！滿大街琳瑯滿目的興趣班，可能總有一班係為你而留！近日有網友就仔細研究工聯會的興趣班目錄，爆笑稱「睇完成個課程目錄，好似去咗趟奇幻之旅咁！」

網上圖片

有網友近日瀏覽工聯會課程目錄，發現竟然有「第七感研習班」，課程簡介聲稱技術由蘇聯耗資過億元研發，目的是「運用結構和意志力在任何想要知的資訊區域自由游走」，更指「身在蘇聯境內也可以遙視美國軍機的內部情況」。

網上圖片

這個索價530元、共五課的超能力班很快掀起網民熱議：「真心想知有咩人會讀？」、「人係香港，學完仲要特登去蘇聯試吓work唔work」、「要唔要着套黄金聖衣上堂？」。還有疑似舊生現身說法，分享十年前上過類似課程嘅奇幻經歷。

示意圖片

該位網民憶述當年導師「男人大叔衣著都寒酸」，課堂上教「用精神力估牌」，又指去賭場「只能用幾次要走」。

網上圖片

隨住第七感班爆紅，網民又挖出工聯會更多經典奇班，其中「懷才不遇自救法」索價150元，3小時的課程，聲稱教「如何去發展自己的才能、如何去 創造機會」以及「找到被人賞識的方法」。網民戲稱報讀「自救」課程「先收個150」，「工聯會真係可以 話係濟世為懷」。

以上除了兩大奇班，網民指工聯會過往還開辦過「六合彩致富」和「氣質形體儀態班」，不少網友直言工聯會課程種類廣泛到 「真係好多奇怪怪嘅班」、「睇完成個課程目錄好似去咗趟奇幻之旅咁！