馮專員啲票無俾民主黨

馮煒光去咗做新聞統籌專員，空咗個南區區議會海怡西選區出來，昨日補選新民黨陳家珮大勝，但排第二得票的人民力量袁彌明好似開心過第一嗰個，相對地民主黨單仲楷排第三，承認係意料之外的慘敗。

三個人得票係咁，新民黨陳家珮得2,023票當選，彌明BB得1,083票，單雞只得920票。睇番2011年上次同區選舉的得票可以作參考，當時馮煒光得1906票，以12票之差險勝排第二的新民黨的施俊輝，佢得1894票，人民力量林雨陽得182票，獨立季詩傑得42票。

第一個問題係點解新民黨咁勁? 其實上次新民黨都只係差12票輸俾馮煒光，所以佢地從來在呢區都有實力。另外你玩吓數學，再計一計，彌明BB和單雞兩個泛民加埋有2003票，比陳家珮少20票，若不是泛民內鬥，鹿死誰手未知。

第二個問題係點解單雞老貓燒鬚? 彌明BB同上次人力林雨陽得票比的確係大躍進。彌明BB好興奮咁話非常滿意結果，仲話自己係進步民主派，單雞係溫和投降民主派，選民選擇咗佢地咁話。

Ariel就話牌面睇彌明BB咁省鏡，單雞選唔贏本來都唔使自卑，係正常賽果啦。但另有一個無乜人留意的角度，個位本來係馮專員的，佢啲鐵票俾咗邊個呢?

斷估無痛苦，馮專員即使愛美女，都無咁大膽俾票彌明BB。但唔好以為佢出身民主黨，就會過票俾單雞。屢傳馮專員同民主黨高層不和，覺得個黨無比機會佢，會唔會無出力過票俾民主黨呢，而且佢入咗政府做，大條道理保持中立，各不相幫。

今次新民黨候選人比2011年選舉只多了129票，佢地啲票應該係自己票。民主派自由博擊，結果單雞就不敵美女了。馮專員就澄清佢無過票俾新民黨，總之保持中立。

Ariel

** 博客文章文責自負,不代表本公司立場 **

米歇爾帶住一屋女人去到中國高調玩足一星期，中國第一夫人彭麗媛就冇咁好氣陪足全程，請佢食餐晚飯，第二朝就陪老公出訪歐洲，本網的博客「毛拍手」已有文章分析中美第一家庭點可能糖黐豆呀。

 

呢兩日你估吓喺內地最流行的段子（笑話）係咩嘢，就係以下呢段：

 

 

從呢段網民熱傳的段子，可見內地民眾對美國欠債有幾不滿，當然官方媒體都只會集中在米歇爾如何領略中國文化的主旋律，相當友善。實情呢類段子卻在網上瘋傳，一定程度反映了民間對美國的怨氣都唔細。

 

可能亦係因為咁，原先俾媒體煲到好大，話已長得亭亭玉立的習千金會亮相晚宴，陪父母一齊接待美國第一女兒，結果官方公布的相片並沒有見到習千金的蹤影。不過，英國《每日郵報》在晚宴前的一篇報道，就引述保安人員話收到通知，正在哈佛求學的習姑娘趁著春假，番咗北京，亦係為咗參加今次的家宴，有外媒更推測習姑娘只係冇參與合照，其實有去晚宴。

 

到底真相如何睇怕有份食的先知，早前Ariel亦收過風，話今次習主席同夫人彭麗媛出訪歐洲，習姑娘亦會隨行，可惜喺公開場合的照片，都搵唔到習姑娘的風采，到底有冇同行又成為一個謎。

 

習姑娘隨父親一同出外，其實有前科，2011年當時未做總書記的習近平去西藏出席活動，Ariel就好肯定，習夫人彭麗媛同習姑娘當時有同行，只係要求非常低調，講明唔用開路車，又唔跟車隊，當然亦冇上到官方媒體啦。

 

習姑娘今年22歲，講落仲有一學期就讀完哈佛本科課程，唔知會繼續讀書定係回國呢，《每日郵報》就引述同學形容習姑娘好學而謹慎。