打工仔有時返工做到無時停，意志力唔夠嘅咪詐死請假唞返日囉。歐美亦有唔少人選擇詐死，有時背後原因非常騎呢，或者係詐死時用埋晒啲無厘頭藉口，以下係幾單比較著名嘅例子。
設計圖片
染瘋牛症去委內瑞拉醫死咗？
美國傢俱店老闆Jose Lantigua債台高築，為咗避開債主而選擇詐死。佢2013年聲稱因為感染瘋牛症，唔知點解唔係去較先進嘅美國醫院做治療，反而話要飛去委內瑞拉，最後更加喺當地離世，家人隆重其事搞咗場喪禮。實情係佢根本就無瘋牛症、無去委內瑞拉，同埋根本未死得，而係搬咗去北卡羅來納州藏身過新生活。不過幾年後，佢因為染上小病要去睇醫生，試圖借用一名早於1917年死去嘅女士個社會保險號碼時穿咗煲落網。佢上星期出庭受審承認干犯欺詐罪，案件押後宣判，最高可判監禁50年！
Jose Lantigua係佛羅里達州一間傢俱店老闆
為咗拒絕交電話費？
芝加哥男子Corey Taylor不滿電話公司收取過高費用，要求朋友代發傳真通知電話公司佢已經死去。電話公司認為有可疑，派員去調查事件，因為朋友口窒窒無法交待到底佢點死去而事敗。警方後來調查得悉，Corey Taylor共欠175美元電話費，折合1357港元。
Alison Matera
想知有幾多人會出席自己喪禮？
佛羅里達州新里奇港女子Alison Matera因為想知道自己死後會有幾多人出席喪禮，特登花上幾個月時間詐死，先向合唱團團友表示自己患上癌症就快釘蓋，仲喺網上假扮護士日日更新博客描述佢自己嘅「病情」。有一日佢離開教堂後，打電話同合唱團總監Tim Paquin講話自己已經死去。Paquin不疑有他，決定為佢舉行葬禮；Matera知道後忍唔住出席，並向其他人表示自己係Matera家姐。Paquin覺得太可疑，打電話去殯儀館求證以及報警，最終揭發事件。
為辭職去到咁盡？
蘇格蘭律師Alastair Liddle 1997年某日打電話通知妻子已經抵達一場重要會議嘅地點，自此之後再無親友聯絡到佢，有傳佢已經遭人殺害，但警方一直未能破案。直到一年後，英格蘭康瓦爾郡警方調查一宗謀殺案時，發現一名中年男子上報名號同資料庫有出入，進一步追問落去先知道原來佢就係Alastair Liddle，送返蘇格蘭法院審理判監12個月。當年佢喺庭上表示，從小到大夢想就係成為一位花農，日日種花為樂，但到大個搵到錢又有家庭時，先發現放棄身份同地位追夢實在難，所以唯有詐死搬去第二度生活。計我話，如果真係覺得搵夠錢，唔憂柴米嘅，放膽同家人講咪得囉。
神州快訊
** 博客文章文責自負,不代表本公司立場 **
膠仔最近迷上睇美劇，其中一套故事以哥倫比亞大毒梟巴勃羅．埃斯科瓦爾（Pablo Escobar）一生為藍本。睇完第一季，我心急搜尋咗啲資料，驚悉呢位大毒梟一生故事精彩到不得了。佢係有史上最有權有勢嘅毒販，曾經係世界第七大富豪，掌握上億人生計，權力大到連哥倫比亞政府都要忌佢三分，美國政府亦一度對佢束手無策。
巴勃羅1949年喺哥倫比亞一戶農家出生，因為家貧，好細個已經要開始用唔同手段搵錢。佢極富生意頭腦，少年時期睇準鄰近社區石料不足，靜雞雞拆走其他人墓碑變賣；大個少少做汽車銷售員時，佢又學得一手偷車神技，只要佢鍾意，架車篤定成為佢囊中物。
隨住巴勃羅年紀漸長，喺江湖撈耐咗，結識到三山五嶽嘅人，諗頭亦愈嚟愈大。1970年代起，佢同幾位老友開始建立毒品王國，最初只係偷運小量可卡因出境到美國，漸漸愈做愈大，吸引好多麥德林市古惑仔加入，形成一股惡勢力。外界就叫呢班人做「麥德林販毒集團」。
哥倫比亞人窮，人人想搵兩餐晏仔，販毒成為一條出路。當地政府同埋鄰近國家制度立立亂，貪污嚴重，政府班友收晒錢，乜都隻眼開隻眼閉，同樣助長麥德林集團愈做愈大，甚至有能力建立武裝部隊，火力同正規軍有得揮。
1980年代初，麥德林集團已經控制咗墨西哥、波多黎各、多明尼加等國家嘅黑市，供應全球80%可卡因，最大市場係美國，搞到美國政府勁頭痕。集團由秘魯同玻利維亞採購原料，分到各地加工同銷售，最遠可以賣到去亞洲，每日淨收入據說達到數百萬美元。
每日搵幾百萬，錢係多到一個咩概念？巴勃羅哥哥羅伯托（Roberto）2009出版一本回憶錄寫道：「巴勃羅賺得太多啦！每年有10%收入都要報廢，啲錢一係俾老鼠咬爛咗，一係俾水淹沒，再唔係就係佢自己忽然心血來汗掉咗。」
福布斯1989年富豪排行榜上，巴勃羅排行第七，「保守估計」資產超過220億美元，並寫明佢身分係「商人、慈善家」。咪住，慈善家？是咁的，正當美國和哥倫比亞政府視之為眼中釘，麥德林市民眾反而視佢為英雄，因為巴勃羅熱愛體育，出錢興建棒球場同埋贊助多支球隊，又經常送錢送禮扶助貧民。亦係因為咁，唔少人都甘願幫佢頂罪或逃避追捕。
後來巴勃羅終於俾人捉到定罪，然而朝野間不少官員早已俾佢收買，竟然同意佢「自己監獄自己起」，內有各項娛樂設施同美食，仲有無數靚女出出入入，唯一壞處只係必須駐足於此。直到有消息話南美另一大販毒集團卡利集團（Cali Cartel）計劃炸毀監獄暗殺巴勃羅，加上有傳言話哥倫比亞政府打算引渡佢去美國受審，佢先逃離監獄。
就喺巴勃羅逃獄之後，哥倫比亞政府逼於各方壓力，下令警方成立特別行動組，追蹤、逮捕或殺死呢位大毒梟。1993年12月2日，軍方追蹤無線電訊號發現巴勃羅藏身地點，派遣重火力部隊圍攻，經過一輪激烈交戰，終於殺死呢位傳奇毒販。
雖然巴勃羅係個殘酷毒梟，但對妻子始終如一。他一生中經歷了一次次高山低谷，始終都無離棄妻子，逃亡之前都必定會安排手下照顧好家人，呢點溫柔又令我有點意外。
巴勃羅嘅傳奇一生成為唔少影視娛樂作品題材。1994年電影《Clear and Present Danger》中，Miguel Sandoval所飾演主角Ernesto Escobedo，就係以巴勃羅為藍本。Mark Bowden 2001出版《Killing Pablo》一書，講述美國政府同軍隊點樣逼哥倫比亞政府出招搞掂巴勃羅，後來改篇成同名電影。最近Netflix美劇《毒梟》亦係改編自佢一生故事，有興趣嘅可以去睇睇。
