韓國性感歌手泫雅周日來港舉行單飛後首個簽唱會，自爆對男神要求高，在現實好難找到，或許在純情漫畫才找到。
泫雅勁歌熱舞回饋粉絲。
泫雅當日在簽唱會雅勁歌熱舞兼近距離跟粉絲玩遊戲，接受記者訪問時大談單飛後的感受以及對男神的要求。
點擊看圖輯
泫雅勁歌熱舞回饋粉絲。
泫雅親切與粉絲互動。
泫雅自爆對男神要求高。
泫雅大受粉絲歡迎。
泫雅接受專訪態度親切。
泫雅親切與粉絲互動。
記者：一直被喻為「性感Icon」，你對性感嘅定義又係點呢？
泫雅：我覺得最重要都係有自信，因為我上舞台見粉絲好多時都係得幾分鐘，會想將最好一面俾佢哋睇，將成個專注力放咗喺演出度，咁嘅時候嘅自己應該係最性感嘅。
記者：邊個係你心目中「性感Icon」呢？有冇男仔同女仔方面嘅代表呢？
泫雅：真係好難選擇！但係我覺得每個人只要專注去做一樣嘢時候，就會好性感，希望我自己都係其中一個咁樣嘅人啦！
泫雅自爆對男神要求高。
記者：你係唔少男性嘅女神，你心目中嘅男神係邊個呢？點樣先可以成為你嘅男神呢？
泫雅：我本身係個好現實嘅人，我覺得喺現實裡面真係好難搵到男神，或者係純情漫畫裡面嘅男主角先搵到，好似對眼好大，但係有好man嘅魅力，又好溫柔，相信真實中真係好難搵到。
記者：香港男仔有冇機會成為你嘅「男神」？
泫雅：今日喺商場活動都見到好多男粉絲好靚仔又好身材，覺得佢哋都具有男神條件。
泫雅大受粉絲歡迎。
記者：離開咗4 Minute後，呢段時間開始單飛舉行個人宣傳活動，感覺點呢？
泫雅：開始咗個人宣傳活動後，感覺自己係好幸福嘅人，好似噚晚就算好夜時間嚟到香港，都有好多粉絲接機，同埋商場活動好多粉絲支持，所以今次由唱片宣傳活動，到亞洲巡迴粉絲活動，都令我更加覺得自己非常幸福。
記者：今次製作新碟《A'wesome》有咩難忘事可以同大家分享吓呢？
泫雅：今次唱片同咗唔同嘅藝人合作，譬如《喇叭花》係姐姐（創作人鮮于正雅）送畀我嘅禮物，另外，又喺峇里島拍咗MV送俾粉絲。我覺得今次專輯有好多新鮮體驗，感覺真係好有趣。
記者：現在的工作目標係咩呢？
泫雅：最近開始亞洲巡迴粉絲聚會，多咗好多機會同粉絲見面，同埋喺舞台演出機會，好想以後都有多啲呢個機會，同埋好似今日喺商場活動，啲粉絲成首歌都識唱，所以我都會苦惱，下次以咩面貌嚟同粉絲見面呢！
記者：既然嚟香港同歌迷玩得咁開心，有冇計劃下次幾時嚟呢？
泫雅：依家仲未有具體時間，希望將來會有驚喜俾大家，敬請多多期待啦！如果再有聚會時間嘅話，好想同粉絲傾偈同合照，總之大家可以有多啲交流嘅時間就最好啦！
記者：睇到你喺綜藝節目演短劇好出色，將來會多參與戲劇方面嘅演出？
泫雅：多謝你讚賞呀！音樂同拍MV都係有故事性嘅嘢，所以都會俾大家睇我演戲嘅機會，不過，由於我對舞台仲係有好多渴望，所以短期內都未必拍劇同參與電影演出，同埋有好多藝人演戲比我更出色，所以我未敢挑戰住。
泫雅接受專訪態度親切。
記者：你平日好為食，好鍾意食炸醬麵同烤腸，仲有咩美食令你忍唔到口呢？
泫雅：我係個唔偏食嘅人，所有嘢食我都覺得好好食，香港都有好多美食，好似雲吞麵、蛋撻、芒果汁同點心，所以每次嚟香港都會好期待，好想帶晒啲美食返韓國。
記者：籌備呢張碟前，你勁減咗11磅，平日有咩保持身材健美方法呢？
泫雅：最幫到我減肥嘅方法，就係約埋好好感情嘅姐姐去一齊做運動或者散步，有佢哋陪住我，就算做幾個鐘都唔會倦，時間會好快過。
