李思捷與譚玉瑛聚舊揭常約品酒談心 成功全靠夠主動

老友鬼鬼！

李思捷日前(10月16日)到新城廣播接受譚玉瑛（阿譚）、何基佑及黃筠兒主持的《QK玉瑛室》訪問，思捷與阿譚老友鬼鬼，兩人不時相約品酒談心，訪問由思捷初入行做歌手時說起，「嗰時我幫一個網站主持節目《娛樂大知嘢》，每集都會揭報紙瘋刺娛樂圈新聞，反應出奇地好，老闆話不如幫你出碟，捧你做第一個網上歌手，之後攞咗郭富城啲歌重新改歌詞，隻碟賣咗二千隻，但我又唔忿氣上唔到無綫《勁歌金曲》。」

李思捷接受新城《QK玉瑛室》節目訪問。

於是思捷主動出擊，拿著親自創作的音樂錄影帶向《勁歌金曲》監製毛遂自薦，最終獲得簽約成為2000年樂壇新人，「我開心到不得了，仲有份提名新人獎，對手係古天樂、張家輝、陳冠希，三甲人選有齊，但坐喺佢哋旁邊都好開心。」思捷翌年再接再厲，主動上藝員科搵經理，成功簽約為藝員合約並加入《歡樂金宵》，「後尾有監製覺得我有趣，搵我拍《花樣中年》，同方中信有幾場對手戲，我做便利店收銀員，佢成日嚟買嘢氹佘詩曼，我就同方中信鬥氣。」

李思捷與譚玉瑛不時相約品酒談心。

左起：何基佑、譚玉瑛、李思捷、黃筠兒

之後與容祖兒合作拍劇集《美麗在望》，經常圍在祖兒身邊負責搞笑角色，鬼主意多多的思捷又再次「出手」，「我出晒名，好多人話我成日改劇本，但你唔改又好難突出自己，我試一次先，監製會睇playback，如果佢唔鬧我就繼續試，兩三次之後，監製唔鬧我咪OK！但惟一唔好就係影響咗對手，人哋背咗（劇本）成晚，我突然改對白，佢都諗唔切點回應，所以幫人諗埋又試過，但佢可能心諗『使你教我呀』。」思捷強調尊重所有編劇，指劇本寫得很好，只是自己想整段戲表達得更好。深思熟慮之後，思捷決定繼續改劇本，同時亦會顧及對手感受，「我要搵個中間位，就係照顧埋對方，畀對方完全可以接到對白。」

李思捷與譚玉瑛聚舊揭常約品酒談心 成功全靠夠主動

詳細節目內容，請重溫10月16日，3-4時，新城知訊台《QK玉瑛室》節目，網址：https://www.metroradio.com.hk/MetroInfo/

《今晚睇李思捷加黃智雯一個因慈善演唱會2025》日前在溫哥華列治文河石劇院隆重舉行，Mandy黃智雯相隔10年再度與李思捷合作，更難得是二人在音樂領域上首次同台演出，叫座力當然十足，吸引不少當地華僑到場支持，其中前輩級人馬黃淑儀亦驚喜成為座上客，令黃智雯受寵若驚，感動不已。

李思捷、黃智雯

為著舞衣 節食健身

演唱會上，黃智雯獻唱多首歌曲，又跳又唱，演繹《隆重登場》及《另眼相看》，黃智雯說：「為咗今次演出，事前都有練歌同排舞，呢兩個月都有健身做運動，保持最佳狀態，因為今次會有勁歌熱舞，件舞衣都有少少性感，為咗件舞衣，我都刻意節食，唔食最愛零食、雪糕，務求有好嘅體態。」

黃智雯

黃智雯

除了獨唱，黃智雯首度與李思捷合唱《來夜方長》與《陪著你走》，令觀眾大叫encore，黃智雯表示：「初出道就同思捷合作《老婆大人II》，飾演佢女朋友，當時我係一個新人，新到不得了，而佢又係一位前輩、又鍾意玩，當時同佢合作心情係戰戰兢兢，到第二次合作係《超能老豆》，思捷可以話睇住我成長，不過音樂舞台上我哋今次係第一次合作，佢好專業，好有台風，同思捷合唱好開心。」李思捷則表示同黃智雯合作感覺儼如兩兄妹：「咁多年來，都知Mandy跳舞叻，係個全能藝人，但估唔到我哋兩個把聲黐埋一齊都幾夾，聽落好舒服，好似兩兄妹咁，同聲同氣，幾有默契。」

黃智雯

黃智雯

演唱籌款 別具意義

此外，對於今次演唱會，黃智雯表示有很意義，除了可以為兒童醫院籌款，亦可以重臨舊地、與昔日的「戰友」、前輩見面，特別見到Gigi姐黃淑儀到場，更是受寵若驚，黃智雯謂：「對上一次嚟呢個舞台，係12年前嘅事，重臨呢個地方，亦見番之前合作過嘅工作人員，佢哋見證住我演藝路成長，所以內心有啲激動同感動，特別見到前輩Gigi姐，我同佢合作過好幾次，佢仲飾演過我媽咪，見證不同階段嘅我，所以見到佢，我忍唔住第一時間要同佢擁抱。」

黃淑儀、黃智雯

李思捷、黃淑儀、黃智雯