夥李思捷「兄妹檔」加國開騷落力跳唱 黃智雯喜見黃淑儀捧場開心送抱

《今晚睇李思捷加黃智雯一個因慈善演唱會2025》日前在溫哥華列治文河石劇院隆重舉行，Mandy黃智雯相隔10年再度與李思捷合作，更難得是二人在音樂領域上首次同台演出，叫座力當然十足，吸引不少當地華僑到場支持，其中前輩級人馬黃淑儀亦驚喜成為座上客，令黃智雯受寵若驚，感動不已。

李思捷、黃智雯

為著舞衣 節食健身

演唱會上，黃智雯獻唱多首歌曲，又跳又唱，演繹《隆重登場》及《另眼相看》，黃智雯說：「為咗今次演出，事前都有練歌同排舞，呢兩個月都有健身做運動，保持最佳狀態，因為今次會有勁歌熱舞，件舞衣都有少少性感，為咗件舞衣，我都刻意節食，唔食最愛零食、雪糕，務求有好嘅體態。」

黃智雯

黃智雯

除了獨唱，黃智雯首度與李思捷合唱《來夜方長》與《陪著你走》，令觀眾大叫encore，黃智雯表示：「初出道就同思捷合作《老婆大人II》，飾演佢女朋友，當時我係一個新人，新到不得了，而佢又係一位前輩、又鍾意玩，當時同佢合作心情係戰戰兢兢，到第二次合作係《超能老豆》，思捷可以話睇住我成長，不過音樂舞台上我哋今次係第一次合作，佢好專業，好有台風，同思捷合唱好開心。」李思捷則表示同黃智雯合作感覺儼如兩兄妹：「咁多年來，都知Mandy跳舞叻，係個全能藝人，但估唔到我哋兩個把聲黐埋一齊都幾夾，聽落好舒服，好似兩兄妹咁，同聲同氣，幾有默契。」

黃智雯

黃智雯

演唱籌款 別具意義

此外，對於今次演唱會，黃智雯表示有很意義，除了可以為兒童醫院籌款，亦可以重臨舊地、與昔日的「戰友」、前輩見面，特別見到Gigi姐黃淑儀到場，更是受寵若驚，黃智雯謂：「對上一次嚟呢個舞台，係12年前嘅事，重臨呢個地方，亦見番之前合作過嘅工作人員，佢哋見證住我演藝路成長，所以內心有啲激動同感動，特別見到前輩Gigi姐，我同佢合作過好幾次，佢仲飾演過我媽咪，見證不同階段嘅我，所以見到佢，我忍唔住第一時間要同佢擁抱。」

黃淑儀、黃智雯

李思捷、黃淑儀、黃智雯

「扮嘢王」李思捷歌藝綜藝瓣瓣掂，近年他與麥長青、曹永廉、黃智賢和唐文龍組成「Hey Brother」中港兩地累積了一定人氣，日前李思捷重返成長地多倫多舉行一連兩場《今晚睇李思捷演唱會》，期間座無虛席，當中不乏圈人：杜麗莎、張崇基等到場支持，星光熠熠，難得在「樂壇教母」杜麗莎面前演出，李思捷坦言有壓力，認真少有！

李思捷

李思捷

李思捷在台上獻唱多首廣東歌，勾起多倫多粉絲的回憶和情懷，為入鄉隨俗，李思捷亦獻唱了英文歌，更穿上多倫多棒球隊波衫，以示對球隊的熱愛。多倫多是李思捷的成長地，他受訪道，重回舊地開騷感覺親切，他又透露，上次回到多倫多已是八年前，今次開騷，有很多認識30多年的老朋友現身支持，李思捷直言：「小時候讀書的美麗畫面，以及童年回憶都走出來了。」

顏米羔

當年導師今日座上客
席間李思捷貫徹「扮嘢王」作風，獻唱譚詠麟、鄭少秋、張國榮及四大天王等多首名曲，並邀請《中年好聲音2》季軍顏米羔擔任嘉賓合唱，將氣氛炒熱至最高點。對於獲得「樂壇教母」杜麗莎和張崇基到場觀賞，李思捷表示受寵若驚， 他憶述17年前首次與王祖藍、阮兆祥開福祿壽演唱會時，就是由杜麗莎擔任歌唱導師，糾正當年歌藝尚未成熟的李思捷，他說：「喺杜麗莎老師面前唱歌，有啲壓力！好彩我有用佢教過我嘅歌唱技巧獻唱，佢都話『今次演出OK，睇得好開心』，佢開心，我都好開心。」

張崇基

適逢農曆新年，李思捷在演唱會期間獲現場粉絲狂派利是，主辦單位老闆娘更向李思捷派送「銀紙扇」，絕對錫到李思捷燶，對此他也難以置信表示：「今次收利是真係收到手軟，而且每封都唔輕手，估唔到多倫多粉咁熱情，所以我都有少少唔好意思。」問到李思捷多倫多歌迷有否向他催婚？他笑言這類問題一定有講：「好多朋友同粉絲都叫我快啲結婚，成日都講，我都聽慣晒。我覺得順其自然，睇時機，最重要係同對方互相尊重。」談及今年大計，李思捷透露會與Hey Brother舉辦演唱會，以及搞創作和綜藝節目，計仔多多。

杜麗莎