藝人胡渭康（William）9月29日到新城廣播接受譚玉瑛（阿譚）、何基佑及麥皓兒主持的《QK玉瑛室》訪問，大談當年參加完第一屆新秀歌唱大賽後，首個主持的就是兒童節目《430穿梭機》，阿譚笑指：「你當年咁虛榮要做明星？」William澄清：「唔係虛榮，我嗰時成日參加歌唱比賽，一星期出去比賽兩三日。」
左起：何基佑、胡渭康、譚玉瑛、麥皓兒
問William比賽完即調入兒童節目可有失望？他表示：「我嗰時只有15歲，點會識得失望，可以上電視，又可以同阿譚做兒童節目，我就係咁認識阿譚。」阿譚揚言當年跟William相當投契，William即表示：「可能我細個，妳母性又好。」他指當年自己只是小朋友，對電視台每樣事物都感到很新奇，令他大開眼界，William笑稱：「不過我成日畀人笑，生得牛高馬大，明明係細路，但我嘅動靜同身高唔匹配。」
之後William與林利和蔣慶龍組成小虎隊，並獻唱多首經典歌，包括《忍著淚說Goodbye》及《伴我啟航》等，何基佑即表示：「我四歲就成日聽你唱歌，好深刻，《忍著淚說Goodbye》我日日聽，嗰時覺得呢班哥哥好勁，首歌好好聽。」William亦一臉自豪：「以我所知《伴我啟航》到今日警隊步操都有用，因為好代表到嗰種精神。」
胡渭康接受新城廣播《QK玉瑛室》訪問。
詳細節目內容，請重溫9月29日，下午3:00 – 4:00，新城知訊台《QK玉瑛室》節目，網址：新城知訊台 (FM 99.7 - 102.1)
歌手林德信（Alex）6月10日到新城廣播接受歐陽德勛主持的《沿途有我》訪問，歐陽德勛在節目開場時表示，與Alex已多年未見，但一直留意他的動態。「當時佢就係一個好瀟灑嘅Single Man，單身一個靚仔，後來突然間收到佢結婚消息，大個仔喇，我估佢應該好快會做爸爸，又畀我估中咗，唔使好耐就真係做咗爸爸。」
林德信（Alex）接受新城廣播《沿途有我》訪問。
被問及成為爸爸及丈夫後的感受，Alex坦言自己的轉變過程與其他朋友不同。「我覺得我嘅感受同其他做咗爸爸嘅朋友好唔同，好多朋友話BB一出世成個生活變晒，但反而我呢個轉變嘅時間好長。我覺得到今日，我仲係度吸收、消化緊呢件事，可能因為我本身性格都比較慢熱。」
Alex爆兩歲女兒愛聽《十分十二吋》、《阿里巴巴》。
談到兩歲的女兒，Alex笑言她遺傳了家族的音樂天份。「佢好細個已經好鍾意聽快歌，如果播慢歌氹佢瞓覺，佢唔鍾意。佢鍾意《十分十二吋》、《阿里巴巴》呢啲好快嘅Disco歌，好細個就已經識得跟住拍子又跳又叫。」
Alex以獨立歌手身份發展已經差不多六年，他透露今年計劃推出專輯，靈感來自一個家庭循環：「我爸爸（林子祥）以前有一張專輯叫《最愛》，個封面係佢抱住1歲嘅我。嗰陣佢39、40歲，我1歲。而家呢個循環啱啱返嚟，我40歲，我個BB而家2歲。我好想做返呢件事，專輯個封面就係林德信抱住個女，儘量將個pose重現番出嚟。」
Alex演音樂劇讀父親林子祥家書。
上月在西九龍戲曲中心大劇院完成了一場音樂劇《3026：音樂環遊記》的Alex，介紹故事背景設定在1000年後，AI毀滅了所有音樂和文化，他飾演的角色進入戲曲中心，與被AI刪除記憶的音樂人一同透過經典廣東歌找回回憶。他特別提到劇中重新演繹父親的經典金曲《分分鐘需要你》時，獲得了全新的理解。導演引導他思考：「如果你真係冇晒音樂，音樂唔再存在，你冇咗生活、呢個身份，或者你會珍惜啲咩？」
後來他找到一封父親小時候寫給他的手寫信。「佢寫嘅全部都係好無聊嘅嘢，『你而家返學點呀？最近讀書點呀？考試成績點呀？』、『我喺意大利行路嘅時候會諗起你』。我讀出嚟嘅時候，個個都覺得呢啲嘢好無聊，但係最珍貴。」他續說：「佢哋就係咁啟發到我，用一個全新嘅角度去唱《分分鐘需要你》。就係你係一個好細個嘅小朋友，好渴望你爸爸喺咁無聊嘅時候陪住你。我從來冇諗過可以咁樣唱。」
唱《分分鐘需要你》感觸走音。
Alex坦言當晚險些唱不下去：「我嗰晚差啲講唔出封信，我讀唔出……唱歌音都亂晒、走音，但係有真實嘅感覺。」當晚全家人都在場，包括爸爸林子祥，令他情緒更加波動。「我感覺到爸爸喺出面，感覺到所有家人喺出面，差啲崩潰。不過點都要講完對白、唱完先，忍住先。」
重溫節目，請於6月10日晚上九時登入知訊台《沿途有我》：https://www.metroradio.com.hk/MetroInfo/
