過埋今日，坐港鐵又要俾多少少錢，因為即日回程九折優惠聽日起就消失。港鐵上星期又預告咗六月會加價，即刻俾人鬧到飛起。
據知港鐵都覺得佢地係眾多公營機構當中的「箭靶」，皆因每日有超過五百萬人次坐港鐵，加上社交網絡發達，服務稍有延誤，訊息就會喺咁傳開，佢哋都要打醒十二分精神做人。講到加價，佢哋而家都諗緊計，睇吓點樣平息民怨，包括利用啲社交網絡。
早前政府開到聲，要港鐵諗計提高載客量，有個方向係引入「晨早乘車優惠」，即係early bird，不過港鐵就話要喺香港行呢套，真係唔容易。
佢哋計過數，而家搭程港鐵平均只係七蚊，究竟要俾幾多優惠，先吸引到大家肯瞓少啲，早啲返工呢？
如果有九折，即係平均平得七毫子，試問你又會唔會為咗區區七毫子，瞓少一個鐘頭呢？睇嚟都要再諗吓計，點樣先可以做少啲箭靶。
Ariel
** 博客文章文責自負,不代表本公司立場 **
呢兩日CY連任話題熱爆政圈，正喺廣東訪問緊的振英哥笑笑口回應記者提問，唔似唔LIKE有呢啲消息流出喎。
睇番CY的回應，最直接部份就係否認「連任辦」的存在。諗真的，傳媒咁講有「連任辦」都係一個花名啫，呢個係幾乎不會存在的實體，因為一但有咗「連任辦」成立，咁咪要計選舉經費囉，所有「連任辦」的人出親去同人食吓飯，吹吓水，咪全部要計入經費內囉，選舉經費由依家到2017年，好快就爆表啦。仲有呀，如果一齊請人食飯，請中個選委(將來若有普選普通選民都唔掂)，咁咪有賄選之嫌，所以在參選人未正式宣佈參選前，任何被傳做緊的選舉工程都會否認架啦！
「連任辦」在技術上一定唔會存在，但並不代表就冇一班人圍住CY係咁轉，幫佢為連任做準備喎，咁如果戲稱佢哋為「連任辦」，CY一路否認，果個「辦」都可以繼續存在㗎。
你聽真啲，CY的答案並冇否認佢會爭取連任喎，而且成功地引發咗佢連任的話題，呢種叫Agenda setting(議題設定)，以後有人提起特首跑馬仔，睇吓邊個仲敢當佢透明呢？
