現今騙徒手法層出不同，連見多識廣的「金牌主持」林盛斌（Bob）都不慎中招，雖然沒有金錢上的損失，但浪費了無數時間和心血，令他都不禁表示：「呢件事，其實係要報東張嘅！」
林盛斌
林盛斌在IG晒出一張咭片，並詳述被騙經過，「話說早兩個禮拜之前，我經理人Kaman收到個查詢，對方李先生send咗張卡片過嚟，話係旺角一間老人院嘅負責人，對上仲有個院長，佢自己係第二把交椅，負責行政，佢話佢哋想搵我做代言人拍廣告，做吓宣傳，仲想我哋棋人做埋廣告公司去幫佢喺唔同媒體落廣告，然後Kaman同佢溝通咗好幾次，感覺都正常嘅，跟住大家傾到代言人價錢同埋詳細嘅工作內容，專登約埋個電話會議，我同對方直接溝通落實，咁Kaman仲好俾心機咁做咗一份合作建議書，分析埋俾佢知唔同媒體廣告嘅報價同效用，亦都寫到好清楚喺代言人期間我會做啲乜乜乜，最後大家決定去馬，好開心，job confirmed！」
View this post on Instagram
林盛斌指自己經理是一個好上心、好有交代、好有交帶的人，「佢為咗確保所有嘢妥善處理同埋順利執行，佢約咗客戶、我、廣告導演上星期五下晝三點開會，因為Kaman想喺拍廣告同影宣傳相之前大家見一見面，順便睇睇佢哋老人院實質環境，兼傾一傾個拍攝內容，等大家可以好好準備同規劃之後嘅工作。」
林盛斌IG圖片
然而到了見面當日，林盛斌他們去到老人院，李先生謊稱記錯相約的日子，要他們等半少時等他回來，「好啦，高潮嚟啦……..入到去，我哋同接待處個職員講話我哋約咗李生開會，然後個職員就黑人問號：『李生？邊個李生？我哋呢度冇呢個人。』吓！跟住有位女仕行咗出嚟，佢叫林主任，佢同我哋講，原來過去呢段日子，呢個所謂嘅『李先生』，已經用過唔同嘅名字、身份、卡片同資料，利用佢哋老人院嘅名義去訂唔同嘅物件同貨品，甚至搵啲裝修公司話老人院要維修quote價，又試過book咗一個按摩師上到去話幫啲老人家按摩，林主任話呢張卡片嘅內容有啲係真，有啲係假，同埋其實之前佢哋已經報咗警，備咗案，喺呢個時候，Kaman不斷打電話俾呢個李先生，對方已經冇再聽電話，冇任何回覆。」林盛斌一行人聞言即「進入了懷疑人生的狀態」！
林盛斌IG圖片
林盛斌自嘲：「真係千年道行一朝喪，出嚟撈咗20年，第一次遇上呢啲點估都估唔到嘅劇情，喺度奉勸咁多位幕前同行，包括經理人同助手，原來呢個世界上真係會發生呢啲咁荒謬嘅事！我估一定會有人話：『下次收到卡片，都上網查吓間公司同埋電話係咪真，又或者打去人哋個總機度，check吓有冇呢個人囉！』講真，事後孔明就梗係容易啦，我都諗到啦，但係當每日都會收到唔同渠道嘅工作查詢，又真係好難個個都咁樣做，同埋如果真係打去，對方又係真嘅，又會搞到件事好怪同好尷尬。」
林盛斌IG圖片
最後，林盛斌表示：「雖然我唔知道呢啲算係騙案定係惡作劇，亦都唔知道點樣可以叫大家小心避免呢啲事，總之，就係要執生啦，唉，黐鬼線！呢單嘢，真係好癲！」
