謝霆鋒杭州開騷展示「燒錢式完美主義」打造新舞台 自爆致敬《鋒味》巨星好友險喊

謝霆鋒《Evolution Nic Live進化演唱會》內地巡迴首站日於杭州奧體中心體育場（綽號「大蓮花」）舉行，近五萬個座位全場爆滿。驟眼看去，舞台似是香港原裝搬到杭州，霆鋒指「錯晒」，「呢個舞台同香港嘅係兩個舞台，今次為大蓮花重新做咗一個進化舞台，我都服咗自己！」

謝霆鋒《Evolution Nic Live進化演唱會》內地巡迴首站日於杭州奧體中心體育場舉行。

霆鋒解釋，香港站是室內show，所有機關包括懸浮波、拱門及地面軌道等當初完全沒有考慮落雨打風問題，「所以好多裝置都有改動，今次就等於係一個完全新嘅舞台，我都覺得自己有啲過份！」「大蓮花」場館是露天設計，如果遇上落雨，霆鋒豁出去話自己濕身無所謂，但樂手、樂器唔淋得，「所以我哋做咗個新嘅頂篷，但成塊黑色又好難睇，結果又加多幾百盞燈！」

《Evolution Nic Live進化演唱會》

《Evolution Nic Live進化演唱會》

香港站破紀錄用了二千二百盞燈，這次杭州站再加碼，霆鋒尷尬表示：「而家加到我都⋯⋯ 我唔想睇呢個budget啦。」霆鋒透露過去半年狂搞工程，「由機械承重到軌道防風雨，全部重新計過！」問到這個巡迴最大挑戰，霆鋒望望個天，「天氣，大自然因素。」

《Evolution Nic Live進化演唱會》

《Evolution Nic Live進化演唱會》

除了舞台燒錢，鋒迷應援都癲到盡。有粉絲包起杭州地鐵「應援牆」及月台幕牆，牆身不僅印上霆鋒型仔相，又將他的經典歌名及歌詞印上，不過最癲的是有fans租用直升機於錢塘江上空播歌兼拉橫額，成個杭州抬頭都見到，認真揼本。

粉絲應援

粉絲應援

除了舞台同應援勁到爆，演唱會上還有勁感人環節，當晚播出霆鋒十三年來主理的《鋒味》精彩片段，張曼玉、楊紫瓊、甄子丹、周杰倫、陳奕迅、蕭敬騰、吳彥祖、舒淇、蔡依林、Twins等巨星輪流「登場」。片段播完後，霆鋒向熒幕鞠躬致敬，「我每次轉身睇片都差啲忍唔住（喊）。過去十二年，由2013年開始，有咁多厲害嘅朋友陪住我，造就咗呢條片。我諗再過一百年都好難再聚齊咁多人，真係好多謝你哋！」

《Evolution Nic Live進化演唱會》

《Evolution Nic Live進化演唱會》

霆鋒又謂：「我用咗十三年製作呢個作品，一睇到個畫面就想喊！頭五年個個話我黐咗線：『做乜走去煮飯？做乜拍啲咁嘅嘢？做乜去旅遊？』而家就俾你睇吓我做啲乜嘢。」霆鋒指每次講起都會起雞皮。網民亦洗版討論：「霆鋒請到咁多巨星，真係圈中人緣王！」

《Evolution Nic Live進化演唱會》

謝霆鋒昨日（4月2日）受香港大學未來媒體學院邀請，出席「創意．娛樂．創業：鋒味創新融匯」主題講座，跟大家探討他橫跨演藝、餐飲、科技、商業等多個領域的歷程及創新思考。講座以對談形式進行，由該學院總監及教授（實務）楊紫燁（Professor Ruby Yang）跟霆鋒對談，後設有問答環節，讓霆鋒答現場同學問題回。

謝霆鋒受香大未來媒體學院邀請，出席「創意．娛樂．創業：鋒味創新融匯」主題講座。

講座上，霆鋒透露自己在不同範疇的思考模式十分相似，尤其在創意方面。他舉例：「對我嚟講，寫歌嘅第一步係先收集音符；準備一道菜嘅話，就需要先收集食材，然後一步步諗點樣搭配。」他進一步解釋，第二步就是確定想做甚麼風格或菜系，「煮嘢食嘅話，你會問自己：『我想做福建菜定係泰菜？定係想做麻辣風味？』音樂方面就係揀邊種類型，你想做 Heavy Metal、Rock 定係 Jazz？呢一步就好似揀定個大方向，之後從中再發揮。成個思維路徑都係一脈相承。」

謝霆鋒

霆鋒特別提到歌曲《推倒重來》並有感而發，指現今正處於文化、科技與人性的交匯點，AI發展速度指數級增長，幾乎每星期都有新突破，令所有事情都要「推倒重來」。他更觀察到，就連價值觀也正在被挑戰：「以前大人教我哋要努力工作、努力讀書先有美好未來，但而家有人話工作只係其中一個options , 甚至未來可能根本冇工做。咁我哋仲點解要咁努力工作？呢個就係價值觀被重新審視、改變嘅過程。」

謝霆鋒

霆鋒又自爆一個十多年前被視為「黐線」的想法。他指自己曾營運電腦特效公司，經常掃描自己的樣貌製作數碼版本。有次掃描時突然靈機一觸，跟經理人Mani說：「如果英皇娛樂十年後想繼續成功經營藝人管理部門，每個藝人都應該好似我咁樣scan自己個樣。」說到這裏，坐在旁邊的Professor Yang突然拿出電話對準他拍照，並說：「呢個係Best View！」哄得全場大笑，就連霆鋒也忍不住笑起上來，隨後霆鋒建議掃描不同年齡階段的藝人，例如20到30歲的謝霆鋒和容祖兒，然後將數碼形象進行數位授權。

謝霆鋒

霆鋒解釋：「我相信十年後、十五年後，人類已經唔需要再親自出鏡去拍廣告、拍電影。你諗吓，我拍好多動作電影，嗰啲場面連買保險都有困難。如果可以用數碼形象代替，就解決咗好多問題。」他認為這個做法同樣適用於運動員，讓他們毋須擔心受傷或體能限制。

謝霆鋒

回想當年，霆鋒笑說：「當然，十幾年前我講呢啲說話嘅時候，所有人都覺得我好黐線。」但他指出，時至今日大家已經歷NFT、Blockchain等概念洗禮，技術上完全做到。他認為現在只差一步：「關鍵就係要睇吓邊個願意做嗰隻白老鼠，第一個去嘗試呢個新方向。」言下之意，這個當年被視為天方夜譚的構想，隨時可能成為娛樂圈的未來趨勢。

謝霆鋒

最後，霆鋒寄語大家：「當然大家要去擁抱、接受同埋點樣利用AI呢個科技，其實講到尾最令你嘅難忘、最設身處地嘅嘢，就係要有自己嘅Experience。」