新世界發展（0017）三供一集資，供股權（2985）本周開始買賣，一些散戶唔想供，睇報紙話有券商建議投資者沽正股套現，再買入供股權補倉賺取差價，究竟制唔制得過？
供股其實係上市公司集資常見手法，正路來講好處係成本低，叫股東科水俾公司發展，但以往屢見不鮮係賊佬公司借供股掠小股民水，或借大量發行新股攤薄敵對股東百分比。
供唔供得過，其實很視乎股民自己點睇公司前景。覺得好就供，麻麻就唔供，將供股權放出市場賣，袋番一千、幾百都係錢。
講到話沽正股買供股權補倉賺差價，真係高難度動作，券商客戶目標可能係大戶，老實講唔係好適合散戶玩。
供股權本來是給予正股持有人，以供股價買入正股的權利。新世界今次三供一，供股價係6.2元，若以本周二（8日）收市價7.95元計，比市價有折讓，似乎都博得過。
不過，散戶千萬不能忘記買個供股權番來都要成本，新世界供股權當日收市價係1.7元。真係買供股權來補倉的話，總成本係6.2元加1.7元，即是7.9元，同正股差價只係5仙。新世界每手1,000股，即係要買1,000個供股權，先可以供番一手正股，咁1,000股正股可以賺幾多差價呢？50元咁多！
如果以周二收市價沽出三手正股，以同日收市價買番3,000供股權，最多都係賺150元，真係連買賣手續費都未必夠冚，又何必搵功夫來做呢！除非真係揸住好多新世界，否則真的不建建議散戶白忙一場。
除此以外，以供股權供股的彈性較買入正股低，隨時「無仇報」。
因為買入正股，升可即沽，跌可即止蝕；但透過購買供股權而吸納正股，則要承受新股認購期及買入供股權時間之間股價的波幅。
至於話買供股權來炒賣，就純粹係炒作，同買窩輪牛熊證差不多，一樣係炒槓桿，風險完全自負。
要留意的是，供股權買賣日子一般不多，以今次新世界供股權為例，最後交易日為下周一，換言之，供股權只有多四個交易日買賣，同買末日輪差唔多。若到期未沽出，除非真係諗住每股多付6.2元出來供股，否則供股權將變廢紙。