今天開始班立法會議員就去上海，參加阿爺擺下的鴻門宴，阿爺請得泛民去開餐，雖然唔會殺頭，但當然必有所圖，泛民又如何回應呢?
令我想起28年前的一幕。那時阿爺搞基本法起草委員會，內裏有兩個民主派草委，一個是李柱銘，一個是司徒華，李馬丁行事大開大合，似鬼佬作風，華叔較為深謀，有中國人的智慧。
當時傾到政制方案的關鍵部位，有親北京委員提出保守方案，街外有人建議佢地辭職唔玩。我那時是記者，去到廣州白天鵝酒店華叔往的房間，問佢點睇。華叔開門迎客，等我入房後先把電視聲開到大一大，嘈到我要貼近佢咀邊先至聽到佢講乜。華叔話：「小心有偷聽呀! 呢個係最原始的方法防止偷聽。」
華叔話除非去到必要時候，否則佢唔會辭草委之職，「一日有得同共產黨爭取，都要盡力爭。辭職好易，反枱好易，反咗枱又點呀?」佢的理念好簡單，一方面堅持民主原則，一方面爭得幾多得幾多，盡爭。(後來華叔在八九年六四事件後辭去草委一職，這又是後話了)你睇華叔咁驚偷聽，就知佢幾唔信共產黨，但佢亦無話唔傾唔講，大有「怕乜同你傾」之勢。
如今泛民在政改問題有兩種態度，民主黨這類溫和民主派都有少少想有協調方案，但激進民主派就認為同阿爺傾都無謂馬上上街啦，溫和派比較弱勢，所以阿爺叫佢地去上海，佢地係遲遲唔想去咁款，結果民主黨派咗單仲楷和黃碧雲去上海，唔係最大粒的陣容，攞出一個「叫做出席吓」的態度。唉，未去都預咗無乜好傾，又係唔係一個合理態度?
有人話最近的區議會海怡西選區補選，更嚇怕了民主黨，因為人民力量的袁彌明有1083票，得票仲多過民主黨的單仲楷，係激進民主派打贏溫和民主派咁話，經此一役，民主黨更唔想同阿爺傾，以免未來失票更多。喂，大佬，唔該大家睇睇，單仲楷一個白髮中坑，袁彌明一個後生靚女，大家都無乜在地區做嘢，人地梗係選靚女唔選中坑啦，同激唔激進關係有限啦，選民覺得區議員都無乜用，選個靚女得閒落區同我匯報吓工作都好呀。若民主黨被海怡區選結果嚇怕，頭腦又係唔係簡單咗啲?
講番政改，阿爺擺明硬，但又係唔係寸步不可以讓呢? 同佢傾，向佢爭取，又係唔係一定無結果呢? 傾都唔敢傾，或者預咗只係做騷唔預有結果，又係唔係辜負咗市民的期望? 好多人都希望泛民和阿爺傾出一個妥協方案，等2017年有普選，唔係未傾就想住反枱。如果華叔還在，佢唔會怕同阿爺傾，當然，傾的時候，也不會丟失立場啦。
盧永雄
還在3年才選特首，但特首賽早前跑得好熱，又話政務司司長林鄭、又話前財政司司長梁錦松，愈講愈人多，好似明天就開跑那樣，不過最近就有少少冷卻跡象，特別是跑了一陣子的阿松正急促降溫。
近日政圈傳出消息，話阿松身邊有人放風，話「阿松暫時唔會去馬選特首，大家不用吹到咁厲害」。
聽到這種傳聞，自然要搵阿松老友馬時亨求證，馬時亨兩個星期前還在戲稱自己玩緊「馬拉松」(馬時亨為梁錦松拉車)，但今日再問他阿松選不選特首時，他口氣已變，話「有排未選，而家未成氣候，而家講去選快咗啲，阿松自己都覺得快咗少少。」
馬時亨又話，「Too early to tell(太早去講)，有人想冷卻吓，阿松想冷卻吓，想靜一靜都好。等定咗普選方式至算，咁合理啲。」
牌面分析，阿松這幾個月出來熱身玩特首賽，事前都知2017年選舉方式未定，但仍然要出來，顯然是擔心太遲出來無人預他會玩。所以如今話因為選舉方式未定而不玩，不太合乎邏輯。
揭開表皮，應該有事情變了。是阿爺變了? 選舉局勢變了? 阿松想尋求的支持者不支持他了?
阿爺對下屆選舉的態度未似有大變，她從來都覺得如今選舉方式都未定，太早有人出來玩，擾亂了大局，亦削弱了市民對梁振英政府的支持，所以從來不太喜歡太早有人出來搞局，問題是何時發功啫。
選舉局勢或許亦變了，過去好像覺得特首CY無機會連任，但自從他在施政報告大灑金錢派錢予低收入家庭後，基層支持穩固了，他亦開始露出爭取連任的苗頭，若想玩下屆遊戲的人，不計算CY可能爭取連任在內，似乎不太現實。但CY想玩，按理不會嚇退阿松，阿松若是如此膽小，從一開始就不應該參加這個高風險的遊戲。不過CY氣場愈勁，影響到的人也愈多了。
更可能是阿松的支持者變了，由支持他早早出來，變成叫他冷靜一下，這樣可以導致他180度轉變。幾個因素加在一起，支持阿松參賽的力量減弱了。
阿松一去，少了一個香爐少隻鬼，最有力的角逐者就是CY對林鄭了，妙就妙在林鄭態度亦有變。今天有記者問林鄭會否參選下屆特首選舉， 她說到2017年她在政府工作37 年，應該回家做家庭主婦啦。林鄭過去對這類問題都有少少迴避，但不會說出「不選」的答案，今日變成想「做主婦」，難道她又如阿松那樣玩冷卻?
有政壇中人話，而家傳阿爺認為若CY落場爭取連任，林鄭就不能落場。阿爺到時點諗唔知，但這個特首局，看起來都發生了不少變化。
盧永雄
