梁小冰、陳法蓉同場出席慧妍雅集活動時，小冰不滿陳法蓉兜口兜面訓斥未有穿着慧妍雅集外套，因而嬲爆離場，更爆Seed稱：「以後唔出席呢啲活動！」但風騷的陳法蓉則自問無訓斥任何人。因一件外套而起爭執，自認受軟唔受硬的小冰在活動結束後相隔約五小時，依然未下火，更在微博大呻委屈兼宣洩怒火，直斥陳法蓉是「惡女人」。
梁小冰微博圖片
小冰上載自拍照兼罵陳法蓉「毫無禮貌」、「惡女人」，她留言道：「陽光普照，心情開朗，難得在港一天，受邀出席慈善活動，怎知一早抵達現場即被人當眾斥責，連招呼都唔打，毫無禮貌不懂尊重人的惡女人！難道我身上車上的不是制服，難道我好欺負。」
梁小冰微博圖片
再隔兩小時左右，仍未呻夠的小冰再貼長文，爆埋陳法蓉今日當面質問過她「使唔使玩到咁大」，再加多幾錢肉緊直指陳法蓉「無修養」、「架係你自己丟」。詳文如下：
「我本來真係好開心出席活動，老公同囝仔仲揸車早成十幾分鐘抵達現場以示尊重，正在同其他在場賓客打招乎（呼）之際，就莫名其妙被一個不知所謂的人當眾斤責我無著制服，我呆在當場不懂反應，鬧完我就若其事行開繼續同其他人好有禮貌握手招呼......我真係好嬲，但我都忍住度氣完成所有儀式合照先走，.....點知在室內臨離開的時候，當時場內無記者，佢衝埋嚟再質問我使唔使玩到咁大！我就當住所有人面前直斥其非，我話，請你撿（檢）討你同人講嘢嘅語氣態度同禮貌，我依家比個機會你，你反省過後，我仍然會接受你道歉！但如果你毫無悔意，以後我唔會再出席慧妍雅集所有活動，亦退出唔做會員，因為我唔會比任何無修養的人再一次傷害自己！！！！！！！面我已經比足你！架係你自己丟嘅！」
