見Lilian開口BB埋口BB，以為 BB好裙腳，但望落又唔似，而且重算係斯文有禮大方得體果種，以剛畢業做一個普通officer嚟計，唔應該咁難搵工喎！不過坐低傾左兩句，我有少少估到佢點解搵唔到工。
佢走左之後，我同Lilian講：「你個仔有啲燥喎！」「嗄？」Lilian唔明。我話唔好意思我都要講，你個仔有口氣！佢答：「咩？我唔覺喎！」
對阿媽嚟講，所有阿仔都是香的！不過現實中，一個人係香係臭，係有公論的！如果你去見工，時間上又被安排在下午的話，唔該你在午飯時別吃大蔥大蒜之類的重口味食物，不然在見工時一個飽嗝，臭人唔死也一定會扣分的。對，這與工作能力無關，但見你的都也是人，被氣味影響判斷是一定的，冇人要求你呵氣如蘭，但都唔好排出毒氣呀！俾著係你，有兩個水平相近的人，一個有口臭，一個冇，你請邊個呢！
何嘉麗
** 博客文章文責自負,不代表本公司立場 **
Mary來電約我下星期去觀塘hightea！雖說今日的觀塘已儼然一個CBD(Central Business District)，但hightea就當然要去high卡士的半島喇！問落至知原來我呢個個同學個女要去觀塘見工。哦！但係我都未哦得完，問題就來了，阿女見工關Mary乜事呢？
原來佢要陪阿女去見工，佢話阿女都想，但係老公就叫佢唔好，所以約我hightea當係飲茶唔係陪見工，冇咁罪惡感喎！哈，搵我過橋！
「你唔好陪阿女去見工呀！」我話。知道自己睇住佢大的小女孩要見工，不無感動，但也一定要阻止這個阿媽行錯第一步！
我的理由很簡單，反正這是他第一次見工，就讓他自己撞下，當一個有潛質的年青人知道過程中只有自己時，會懂得格外小心，這是他成長的機會，大人不應搶走！而且面試過程中，「等」是不可缺少的一環，一來這可能是公司刻意安排的考驗，二來也是公司為了方便自己而同一時間安排幾個人同一時段見工。
當然是你等佢好過佢等你喇！在「等」的過程他未必會打電話給朋友又或打回家，但如果他知道媽媽在附近，在等得太久時他可能會打電話叫媽媽唔好陪佢等；另外你又可能見乜咁耐重未走得，又或擔心有甚麼意外而打電話去問佢有冇事，於是佢悶悶地又乘機同你呻下，你心掛掛又問多兩句，呢幕母女情深確係好感人，但係就真係乜工都唔駛見，你養埋佢下半世算喇！
不過，唔陪個女去見工唔等於唔理佢，好似今次去觀塘，雖說果度今日已經唔係工廠區，但係搭巴士唔知幾時至有車到；搭的士又怕塞車；搭地鐵又驚觀塘九龍灣不分而盪失路，咁做父母就可以先陪佢去一轉，肯定左見工地點，計埋所需交通時間，咁見工果日就擔心少一樣。
另外，在見工前幫佢對下文件，記住係幫佢對，唔係幫佢執！亦可提佢帶定幾張相，雖然而家講求「平等機會」，好多大公司都唔會硬性規定俾相，但係人地問起，你有就總好過冇！而且佢個女咁好樣，交相有著數囉！最後就是前一日要養足精神，睇下見工果間公司的資料，雖說是青衣(trainee)，請左你之後會有好多機會認識公司，但係知多尐總好過口啞啞，何況而家個個都係名校畢業生，預備越足機會越大！
至於hightea，當然出番半島喇，我鍾意飲濃茶嫁，果度啲茶葉要幾多有幾多呀。
