美情報差定政治錯判？

神州大地不平靜，新疆再爆大鑊，兩架汽車撞向人群再引爆，造成百多人死傷，最慘情係死者大部份係習慣行早市的老人家，多國紛紛向中國表達慰問，毛拍手就發現咗一個稀客，就係美國喇。

 

 

 

美國白宮發表聲明，譴責早些時候新疆烏魯木齊發生的暴力恐怖襲擊案件“卑鄙兇殘”，向遇難人員及其家屬表示哀悼。

 

聲明仲表示，這是一起針對無辜平民卑鄙兇殘的暴行，美國堅決反對各種形式的恐怖主義行為，「我們向此次襲擊事件中的遇難人員、他們的家屬和所有受到影響的人員表示哀悼和慰問」。

 

本來對一個國家遭受咁嚴重的恐襲，美國發表一份咁樣的聲明似係正常不過，但內地傳媒都炒到幾大。唔講可能大家冇留意，關鍵就喺「恐怖襲擊事件」呢六隻字，原來今次係美國首次在正式聲明中將在新疆發生的暴力事件定性為恐襲。

 

 

中國一直都認為，最困擾新疆安全來自新疆獨立運動或東突厥斯坦伊斯蘭運動，官方多次認定在新疆多地，乃至去年天安門前的汽車爆炸、今年三月的昆明火車站斬人血案都認定係疆獨勢力發動的恐襲。

 

但美國一直對中國的判斷有保留，早前美國國務院都講緊仲未能得出結論，天安門爆炸事件是恐怖襲擊，對新疆之前發生的多宗襲擊事件亦從來不承認係恐怖襲擊。直至到三月的昆明火車站斬人血案，美國先承認係恐襲，今次就係第一次承認係新疆內發生的暴力事件係「恐襲」。

 

美國點解遲到依家先承認新疆的襲擊係恐襲，一係佢情報工作原來唔係想像中咁勁，一係就政治判斷有偏差。其實美國對新疆獨立運動的態度一直模糊，甚至有時搬出人權標準來質疑中國的新疆政策，因為佢一直支持新疆西藏的獨立運動，成日話要保障當地人權。雖然2002年聯合國已定性「東伊運」係恐怖組織，但近期更有報道指美國將東伊運剔除出監察名單，可見兩國喺呢個問題分歧有幾大。

 

今次新疆恐襲後，靈通消息人士對毛拍手話，相信美國應該係被逼要表態，一來事件太明顯係有組織的恐怖襲擊，傷亡咁大，唔當佢係都唔得。更重要係美國亦開始不得不考慮，東伊運同拉登為首的恐怖份子網絡，有重要關連。美國從來對伊斯蘭世界都不是友好，加上前車可鑑，為對付前蘇聯入侵阿富汗，自己親身培植的拉登，最終傷害自己最深，睇嚟今次表態只係唔想俾人覺得支持伊斯蘭極端勢力，並唔係同中國關係有好轉的趨勢。

毛拍手

** 博客文章文責自負,不代表本公司立場 **

呢兩日國際政局焦點放咗喺上海，中國主辦「亞洲相互協作與信任措施會議」(簡稱亞信)，係咪聽個名都有啲頭大，成員除咗中俄兩個大國，仲有中亞一大堆國家、南亞同埋部份東南亞國家，都幾大堆頭。

 

不過，西方政界就放喺普京同習主席身上喇，今日爆出美國越洋告解放軍事件，中美關係睇嚟都聞到燶味喇，而之前美俄因為烏克蘭已經反枱咁滯，今次中俄元首會面，都幾受關注，加上兩位元首仲會一齊出席中俄聯合軍演的開幕式，難怪內地網站今日都用一個題：「普京迎風抵滬，美國媒體擔憂」。

 

 

毛拍手都學人將焦點放去上海睇吓，特登去睇吓相關新聞啦，點知睇到個現象，張張會談相片都好似少咗啲嘢…

 

 

有冇發現兩邊會談的官員中，少咗個翻譯姐姐或者翻譯哥哥呢？再睇埋中央電視台的片，習大大同其他官員都戴咗耳機，原來為了節省時間，簡化程序，官式會談用即時傳譯，唔再好以以前咁，我講幾句就停，等翻譯譯完，又到你講幾句，又再等你的翻譯譯完…實情毛拍手聽官員話過，有時都覺呢種方式幾浪費時間。

 

 

20140520_會談用同傳不用交傳 01

 

你計吓，一場官方會談，關係一般的，都會見20分鐘，關係好的，就會見40分鐘，咁樣講講停停等翻譯，其實有一半時間係冇內容的，實質傾到的事情有幾多，有數得計啦。

 

 

用即時傳譯就唔同喇，20分鐘會談就傾足20分鐘，實質好多啦，習大大上場以來，已經推咗唔少簡化措施，睇怕今次都係其中一項，外交工作雖然要講禮節，但盡量節省時間，傾多啲實質嘢仲好啦。聞說，大型宴會上的祝酒詞以後都會提前翻譯好，將文本放在與會領導人的座位上，到致詞時就唔再翻譯喇，這樣咪又節約時間囉。

 

一向以來中方同外方的會談，多數都係用所謂交傳(交接傳譯)，即係大家睇一年一度總理見記者會咁，總理講一段，然後翻譯就譯一段，唔似我哋開立法會咁即時傳譯，喺內地呢種叫同傳(同步傳譯)。同傳的工作比交傳壓力更大，國際慣例，翻譯20分鐘就換一換人，但有翻譯員都同毛拍手講，其實做交傳壓力都唔細，全世界靜晒咁聽你一字一句咁譯，少少沙石都會被人抽秤到。

 

總之呢個改革，都係幾符合習大大成日講要辦實事的風格，睇怕內地官員都要多多適應喇。