特首CY較早前在策略發展委員會問起，如果減兩成自由行大家點睇。CY放出呢個巨型氣球，即時舉座嘩然。後來消息傳咗出街，零售界的反應尤大，不過大家對政府削減自由行都係半信半疑。
當日在策發會座上，有九倉主席吳光正，佢當然大力反對削減自由行。這也難怪，九倉旗下在尖沙咀廣東道有連串貴重物業，又在銅鑼灣有時代廣場，都唔講其他各區商場，若削減自由行，單係睇佢在尖沙咀和銅鑼灣物業的租金收入，都會大受影響。
不過今日吳光正公開講起呢個問題時，口風有少少轉。他提到集團已有對策，應付政府計劃削減自由行配額對旗下商場的影響。他認為自由行應否設限，各方也有理據，但認為政府要做平衡，為香港大局及最大利益著想。但他亦強調，若政府最終有任何調整，他也會支持政府的決定。
吳光正呢種大老闆，唔會反對佢無法反對的事情，今日如此口風，有點大勢已去的味道。
我嘗試了解一下大局，發現大方向都係朝減少自由行方向去思考，雖然未必是一下子減少兩成咁多，但話完全唔減，機會唔太大。因為過去一段時間，香港反對自由行旅客的聲音太強烈，而商界亦沒有發聲去平衡，變成香港一面倒罵內地旅客，這種變化亦挑起內地民眾的反彈情緒。
在阿爺的心目中，既然香港人覺得內地客來港太多，香港食唔晒，影響了香港人的生活，順勢減一啲都係好事。至於減多少、減那一種類型，就要同特區政府詳細研究，而CY比較想減「一簽多行」的旅客，因為當中有不少是水貨客。但現實上一話開始減自由行數量，也要預咗會影響內地旅客對香港的整體感覺，其他無減的類別，都會少啲人嚟。
再者內地減少到香港的自由行旅客，亦會順手影響澳門，估計唔止對香港旅遊業、零售業有影響，對澳門的賭業也有影響。到自由行水喉開始關細之後，大家才可以較冷靜理性地討論呢個問題。
盧永雄
在一個巨變時代當中，無論是科技革命、或者經濟飛升，大家通常都不會感受到變化如此巨大，可以講是身在變中不知變。或許10年以後，回首過去，才驀然發現，原來世界已經變晒。蘋果iPhone 3自2008年出現之後，手機變成了電腦，就有這種巨大影響。
大家日常經常接觸的娛樂八卦雜誌，原來已被打到傷殘。有一本曾經係最暢銷的娛樂八卦雜誌，幾年前高峰時每期銷量20萬份，連番急跌後，最近的銷量跌到8萬份，睇嚟好快見7字。短短幾年之間，銷量急跌6成，只能夠用「恐怖」兩字來形容。
有人搞笑地問，「娛樂八卦雜誌無人睇，香港的八卦公八卦婆忽然唔見晒？」當然不是，八卦人永遠存在，而是佢哋太忙，唔得閒睇娛樂八卦雜誌。
對於娛樂八卦雜誌急跌的現象，行內最普遍的解釋係網上娛樂新聞當道，搶了八卦雜誌的讀者。如果八卦雜誌搞番個網上版，就可以搶番班讀者。開出這條藥方的人，有沒有留意地鐵上、巴士上、甚至路上的人在看什麼？
娛樂八卦雜誌係消閒產物，好多人睇，但唔一定事必要睇。透過手機，就可以睇戲、睇《星星》、睇《Running Man》，還有facebook, Instagram, whatsapp, wechat，大家搭地鐵的時候，個個做低頭族，忙得不亦樂乎，愈來愈少見人揸本娛樂八卦雜誌啦，他們甚至不大看網上的八卦新聞。以前，大家在等人、搭車這些時間碎片內，買本娛樂雜誌讀讀消閒。現時，一機在手，已經填滿了所有時間碎片，何需再花錢去買八卦雜誌呢？
更加好笑的是，有報館與大電視台嗌交，電視台不讓大報館採訪。報館的回擊係不報道該台的娛樂消息，專報韓星新聞，以為可以拖低電視台的收視率，還要宣佈勝利。但慘痛的地方卻是，正正就係因為韓星的興起，帶來本地娛樂八卦雜誌的末日。現時老中青都追捧韓星，但本地的八卦雜誌，又如何發掘韓星的獨家消息？怎樣爆韓星醜聞？雜誌找不到韓星獨家料，欲報無從。所以那間報館話加大韓星報道去隊死大台，結果大台未死，自己同系的娛樂雜誌已經死先。
時代正急速轉變，如果摸不清變化的根源，胡亂反應，盲目行動，時代巨輪還未輾到，有些人卻撞上去自殺了。
盧永雄
